Roun prémyé bagaj nou pouvé fè pou nou fè nou lafwa vin pi fò, a réfléchi asou ranson-an. Ranson-an ka pèrmèt nou sir ki promès Bondjé-ya ké fèt. Lò nou ka pran tan byen réfléchi asou poukisa Bondjé bay nou ranson-an, épi tout sakrifis i fè pou sa, nou lafwa ka vin pi fò. É nou sir ki nou Bondjé ki ka di ki nou ké viv pou tout-tan annan roun monn ki miyò, ké tchenbé so promès. Poukisa nou pouvé di sa ? Annou réfléchi asou sa Jéova sakrifyé pou i bay nou ranson-an. Jéova voyé so prémyé Pitit i té kontan tèlman, so pi bon zanmi, pou i fèt asou latè-a, pou i sa roun wonm parfè. Lò i té asou latè-a, Jézi jwenn tout kalité problèm. Épi apré sa, i soufri é i mouri. Jéova péyé chè menm ! Nou Bondjé ki plen ké lanmou pa té ké janmen pèrmèt so Pitit soufri é mouri jis pou bay nou roun bèl lavi mé pou roun ti moman sèlman (Jean 3:16 ; 1 Pierre 1:18, 19). Kou Jéova péyé chè pou sové nou, i ké fè tousa ki fo pou nou pouvé viv pou tout-tan annan monn nouvo-a. w23.04 27 § 8-9.

Ès Jéova lé résisité sa-ya ki mouri ? Wi, asiré pa pitèt. I promèt résisité moun mouri-ya é i fè plizyèr moun marké sa promès-a annan so Paròl (Is. 26:19 ; Rév. 20:11-13). É lò Jéova ka fè roun promès, i toujou ka tchenbé l’ (Jos. 23:14). Pou byen di, i présé fè moun mouri-ya rouviv. Sonjé sa Jòb di. I té sir ki si i té ka mouri, Jéova té ké présé wè li rouviv (Job 14:14, 15). É a menm bagaj i lé pou tout so sèrvitèr-ya ki mouri. I présé roubay yé lavi é i présé wè yé viv ké roun bon lasanté ké tchò kontan. Mé, é milyar moun ki mouri san yé pa té gen posibilité anprann lavérité asou li ? Nou Bondjé ki plen ké lanmou lé résisité yé osi (Actes 24:15). I lé bay yé posibilité divini so zanmi épi viv pou tout-tan asou latè-a (Jean 3:16). w23.04 9 § 5-6.

Kouman to pouvé fè èspwar to gen-an vini pi fò ? Parèkzanp, si to gen èspwar viv pou tout-tan asou latè-a, réfléchi asou sa Labib-a ka di asou paradi-a (Is. 25:8 ; 32:16-18). Imajiné to lavi annan monn nouvo-a. Imajiné to kò annan sa lépòk-a. Si nou ka mété nou lidé asou èspwar monn nouvo-a, nou ké santi ki problèm nou gen « la pou roun ti moman é yé pa lou » (2 Cor. 4:17). Grasa èspwar Jéova ka bay to, i ké fè to divini fò. Jéova fè sa ki fo pou to gen sa fòrs-a. Donk, lò to bézwen moun idé to pou fè roun bagaj, pou tchenbé annan roun éprèv ouben pou kontinyé gen tchò kontan, priyè l’ ké tout to tchò é chaché so répons lò to ka étidyé. Asèpté to frè ké sò-ya ankourajé to. É pou fini, kontinyé mété to lidé asou bèl èspwar to gen-an. Atò, to ké « trapé fòrs ké bokou pwisans grasa fòrs [Bondjé] ki plen ké laglwar, pou [to] tchenbé rèd ké pasyans épi ké lajwa » (Col. 1:11). w23.10 17 § 19-20.