Kouman to pouvé fè èspwar to gen-an vini pi fò ? Parèkzanp, si to gen èspwar viv pou tout-tan asou latè-a, réfléchi asou sa Labib-a ka di asou paradi-a (Is. 25:8 ; 32:16-18). Imajiné to lavi annan monn nouvo-a. Imajiné to kò annan sa lépòk-a. Si nou ka mété nou lidé asou èspwar monn nouvo-a, nou ké santi ki problèm nou gen « la pou roun ti moman é yé pa lou » (2 Cor. 4:17). Grasa èspwar Jéova ka bay to, i ké fè to divini fò. Jéova fè sa ki fo pou to gen sa fòrs-a. Donk, lò to bézwen moun idé to pou fè roun bagaj, pou tchenbé annan roun éprèv ouben pou kontinyé gen tchò kontan, priyè l’ ké tout to tchò é chaché so répons lò to ka étidyé. Asèpté to frè ké sò-ya ankourajé to. É pou fini, kontinyé mété to lidé asou bèl èspwar to gen-an. Atò, to ké « trapé fòrs ké bokou pwisans grasa fòrs [Bondjé] ki plen ké laglwar, pou [to] tchenbé rèd ké pasyans épi ké lajwa » (Col. 1:11). w23.10 17 § 19-20.

Nou pa ké janmen fini di Jéova mèrsi pou tousa i ka bay nou. Nou pouvé di li mèrsi pou tout bon bagaj nou gen paské « tout bèl bagaj [...] ka soti di laro », sa lé di ki a li ki ka bay nou sa (Jacq. 1:17). Parèkzanp, nou pouvé di li mèrsi pou latè-a ki bèl toubonnman, pou tout bèl bagaj i kréyé, pou lavi i ka bay nou, pou nou fanmi, nou zanmi é pou bèl èspwar i ka bay nou. É a pa pou nou bliyé di li mèrsi paské i ka pèrmèt nou sa so zanmi. Pitèt nou ké bézwen fè roun éfòr èspésyal pou nou sonjé pou ki bagaj nou menm nou divèt di Jéova mèrsi. Poukisa ? Paské nou ka viv annan roun monn koté moun-yan pa kontan di mèrsi. Pasé yé chaché kouman yé pouvé di mèrsi pou sa yé gen, moun-yan ka chaché kouman yé pouvé gen sa yé lé. Si nou ka lésé yé détenn asou nou, pitèt nou ké fè yenki doumandé bagaj annan nou lapriyè. Pou sa pa rivé nou, annou kontinyé chaché gen rékonésans épi di Jéova mèrsi pou tousa i fè pou nou (Luc 6:45). w23.05 4 § 8-9.

Kou Jéova sa roun Papa ki plen ké lanmou, i pa kontan wè nou soufri (Is. 63:9). Mé, i pa ka anpéché tout éprèv-ya tonbé asou nou. Détan, sa éprèv-ya kou gro dlo ka charyé nou ouben difé ka boulé nou (Is. 43:2). Mé, i ka promèt ki i ké idé nou « janbé » sa éprèv-ya. Kèlkéswa éprèv nou ka jwenn jòdla, i ké toujou fè sa ki fo pou idé nou fè nou lanmityé ké li rété fò. I ka bay nou osi so lèspri sen ki fò toubonnman pou nou pouvé tchenbé (Luc 11:13 ; Phil. 4:13). Donk, nou pouvé sir ki i ké toujou bay nou èkzaktéman sa nou bézwen pou nou tchenbé é pou nou rété fidèl. Jéova lé nou fè l’ konfyans (Héb. 11:6). Détan, nou pouvé pansé ki nou pa ké janmen rivé tchenbé annan éprèv-ya. É pitèt nou pouvé koumansé pansé ki Jéova pa ké idé nou. Mé, Labib ka fè nou sir ki grasa pwisans i ka bay nou, nou ké pouvé « monté asou roun miray » (Ps. 18:29). Atò, pasé nou lésé zafè douté-a plen nou tèt, annou priyè ké lafwa é annou gen konfyans ki Jéova ké réponn nou lapriyè (Jacq. 1:6, 7). w23.11 22 § 8-9.