Vèrsé pou li Kisa Labib-a ka anprann nou ?

CHAPIT 1

BONDJÉ : A KIMOUN ?

(Job 34:10, 12) A pou sa, zòt ki entélijan, kouté mo : nou pa pouvé pansé ki vré Bondjé-a ka fè méchansté, ki Tou-Pwisan-an ka fè roun bagaj ki mové ! ¹² Asiré pa pitèt, Bondjé pa ka fè méchansté ; Tou-Pwisan-an pa ka chanjé jistis ki pou fèt.

(Psaume 37:9-11) Moun mové-ya ké détrwi, mé sa-ya ki ka mété yé èspwar annan Jéova ké viv asou latè-a. ¹⁰ Roun ti moso tan ankò, é moun méchan pa ké la ankò, to ké gadé koté yé té fika, é yé pa ké la. ¹¹ Mé a moun ki ka fè yé kò toupiti ki ké viv asou latè-a é yé ké pran plézi annan lapè i ké gen tout koté asou latè-a.

(1 Pierre 5:7) Toupannan zòt ka jité tout zòt enkyétid asou li paské i ka pran swen di zòt.

(Actes 17:11) Jwif ki té ka rété Béré té gen roun pi bon mantalité ki sa ki té ka rété Tésalonik, paské yé rousouvwè paròl-a ké tout yé tchò, é yé té ka byen gadé Ékritir-ya chak jou pou wè si sa yé té ka di yé té vré.

CHAPIT 2

LABIB-A : ROUN LIV KI KA VINI DI BONDJÉ

(2 Timothée 3:16) Tousa ki marké annan Ékritir-a enspiré di Bondjé épi i itil pou anprann, pou korijé, pou roudrésé tout bagaj, pou maché drèt annan lajistis.

(Isaïe 48:17) Men sa Jéova, Sa-la ki ka sové to, Sen Israyèl-a di : « Mo menm, Jéova, mo sa to Bondjé, sa-la ki ka ansényé to pou to byen, sa-la ki ka gidé to asou chimen koté to divèt maché. »

(Isaïe 44:27-45:2) Sa-la ki ka di gro dlo-ya : “A pou zòt vini sèk, é mo ké fè zòt tout vini sèk”, ²⁸ sa-la ki ka di asou Siris : “I sa mo bèrjé, é tousa mo lé i ké fè l’”, sa-la ki ka di asou Jérizalèm : “Yé ké roukonstrwi l’” é ki ka di tanp-a : “Yé ké pozé to fondasyon.” »

45 Men sa Jéova ka di Siris, so wen, sa-la i tchenbé so lanmen drèt-a, pou fè nasyon-yan kouché plat douvan li, pou tiré zarm annan lanmen rwa-ya, pou louvri douvan li dé lapòrt-ya, konsa lapòrt vil-a pa ké fronmen : ² « Mo ké maché douvan to, é mo ké fè ti montangn-yan vini plat. Lapòrt kwiv-ya, mo ké krazé yé, bar fè-ya, mo ké krazé yé. »

(Nombres 23:19) Bondjé pa sa roun wonm, ki ka manti, ni pitit roun moun, ki ka chanjé lidé. Lò i ka di roun bagaj, ès i pa ka fè l’ ? Lò i ka di i ké fè roun bagaj, ès i pa ka fè l’ ?

(Hébreux 4:12) Paské Paròl Bondjé-a vivan ké pwisan ; i pi filé pasé pyès zépé filé dé bò épi i ka rantré fon jistan i ka séparé nanm-an ké lèspri-a, jwentir ké lanmwèl, é i pouvé wè sa nou ka pansé ké tousa nou tchò anvi fè.

CHAPIT 3

KI PROJÈ BONDJÉ GEN POU MOUN ASOU LATÈ-A ?

(Jacques 1:13-15) A pa pou pyès moun ki anba éprèv di : « A Bondjé ki ka mété mo anba éprèv. » Paské i pa gen pyès mové bagaj ki ka mété Bondjé anba éprèv é li menm pa ka mété pyès moun anba éprèv ké mové bagaj. ¹⁴ Mé chak moun ka mété yé kò anba éprèv lò yé ka lésé yé pròp anvi mennen yé ké tanté yé. ¹⁵ Épi anvi-a, lò i ja pran ofon tchò-a, i ka bay péché-a ; é péché-a li menm lò i fèt, i ka bay lanmò.

(Genèse 3:1-5) Annan tout bèt danbwa Jéova té fè, sèrpan-an té sa-la ki té ka fè pi atansyon. I doumandé fanm-an : « Ès a vré ki Bondjé di ki zòt pa divèt manjé frwi pyès pyébwa annan tout jarden-an ? » ² Fanm-an réponn sèrpan-an : « Nou pouvé manjé tout frwi pyébwa ki annan jarden-an. ³ Mé pou zafè manjé frwi pyébwa ki an mitan jarden-an, Bondjé di : “Zòt pa divèt manjé so frwi, non, zòt pa divèt manyen l’ ; sinon zòt ké mouri.” » ⁴ Mé, sèrpan-an di fanm-an : « Zòt pa ké mouri pyès. ⁵ Paské Bondjé savé ki, jou-a zòt ké manjé sa frwi-a, zòt wéy ké louvri é zòt ké kou Bondjé : zòt ké konnèt sa ki bon ké sa ki mové. »

(Romains 5:12) A konsa, akoz di rounsèl wonm, péché-a antré annan monn-an é akoz di péché-a lanmò antré osi, é a konsa lanmò détenn asou tout wonm-yan paské yé tout té péché.

(Proverbes 27:11) Mo pitit, aji ké sajès, é fè mo tchò kontan, pou mo pouvé réponn sa-la ki ka provoké mo.

(Daniel 2:44) Annan lépòk sa rwa-ya Bondjé-a ki annan syèl-a ké mété roun rwayonm ki pa ké janmen détrwi. É rwayonm-an pa ké pasé pou pyès ròt pèp. I ké krazé tout sa rwayonm-yan é i ké fini ké yé, é li rounso ké rété pou tout-tan.

(Jean 3:16) Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi mé gen lavi pou tout-tan.

(Jean 17:3) Men sa ki sa lavi pou tout-tan-an : a pou yé anprann konnèt to, ki sa sèl vré Bondjé-a, ké sa-la to voyé-a, Jézi Kris.

(Isaïe 32:18) Mo pèp ké rété roun koté ki kalm, annan kaz ki gen sékirité é koté yé ké pouvé pozé san anyen ni pésonn pa déranjé yé.

(Michée 4:4) Yé chak ké asiz anba yé pyé rézen ké anba yé pyé fig, é pyès moun pa ké fè yé pè, paské a bouch Jéova chèf larmé-ya menm ki di l’.

(Isaïe 65:21-24) Yé ké fè kaz é yé ké rété annan, yé ké manjé rézen yé planté. ²² Yé pa ké fè kaz pou ròt moun rété annan, yé pa ké planté pou ròt moun manjé. Paské mo pèp ké viv lontan kou pyébwa, é sa-ya mo chwazi ké profité di yé travay toubonnman. ²³ Yé pa ké las pou anyen, yé pa ké gen timoun pou wè yé soufri, paské yé ké yé timoun sa jénérasyon Jéova béni. ²⁴ Anvan menm yé aplé, mo ké réponn yé ; anvan menm yé fin palé, mo ké tandé yé.

(Révélation 11:18) Mé nasyon-yan koumansé kòlè, é to menm to koumansé kòlè, é tan-an rivé pou jijé moun mouri-ya, pou rékonpansé to èsklav, sa lé di to profèt-ya, é osi sen-yan ké sa-ya ki gen lakrent pou to non, piti kou gran, é pou détrwi sa-ya ki ka détrwi latè-a.

(Isaïe 11:6-9) Lou-a ké pozé roun ti tan òbò ti-mouton-an, tig-a ké kouché òbò ti-kabrit-a, ti-béf-a, lyon-an ké zannimo ki byen gra, yé tout ké ansanm ; é a roun ti bolonm ki ké mennen yé. ⁷ Fimèl béf-a ké lous-a ké manjé ansanm, é yé pitit ké dronmi ansanm. Lyon-an ké manjé pay kou toro-a. ⁸ Timoun-an ki ka tété toujou ké jwé òbò koté kobra ka rété-a, é timoun-an ki ja sévré ké mété so lanmen asou trou koté sèrpan ki gen vénen ka séré. ⁹ Yé pa ké fè pyès méchansté, ni pyès ravaj annan tout mo montangn sakré-a, paské asiré pa pitèt latè-a ké plen ké konésans asou Jéova kou lanmè-a plen ké dlo.

(Isaïe 65:25) « Lou-a ké timouton-an ké manjé ansanm, lyon-an ké manjé pay kou toro-a, é sèrpan-an ké manjé lapousyè. Yé pa ké fè pyès méchansté, ni pyès ravaj annan tout mo montangn sakré-a », a sa Jéova di.

(Jean 5:28, 29) Pa rété èstébékwé pou sa, paské moman-an ka rivé koté tout moun ki annan tonm-yan ké tandé so vwa ²⁹ é yé ké soti, sa ki fè bon bagaj pou roun rézirèksyon pou lavi, é sa ki fè mové bagaj, pou roun rézirèksyon jijman.

CHAPIT 4

JÉZI KRIS : A KIMOUN ?

(Jean 3:13) Anplis, pyès moun pa monté annan syèl-a, mé sèlman sa-la ki désann di laro syèl-a, Pitit wonm-an.

(Jean 6:38) Paské si mo désann di laro syèl-a, a pa pou fè mopa volonté mé pou fè volonté sa-la ki voyé mo-a.

(Jean 6:62) Kisa ki té ké rivé si zòt té ka wè Pitit wonm-an monté koté i té fika anvan ?

(Jean 17:4, 5) Mo glorifyé to asou latè-a, mo fini travay to bay mo fè-a. ⁵ É aprézan, Papa, bay mo menm glwar mo té gen òbò to anvan monn-an té fèt.

(Jean 14:28) Zòt tandé mo di zòt : “Mo ka alé épi mo ké rouvini koté zòt.” Si zòt té kontan mo, zòt té ké kontan savé ki mo ka alé koté Papa-a, paské Papa-a pi gran pasé mo.

(Matthieu 9:35, 36) É Jézi té ka pasé annan tout vil-ya ké tout vilaj-ya : i té ka ansényé annan sinagòg, i té ka préché bon nouvèl Rwayonm-an é i té ka géri tout kalité maladi ké tout kalité moun enpyòk. ³⁶ Lò i wè foul moun ki té la, so tchò raché, paské yé té tou kanyankanyan ké pédi kou mouton ki pa gen bèrjé.

(Philippiens 2:8) Anplis, lò i vini kou roun wonm, i mété so kò pi bas ki lapousyè é i obéyi jistan i mouri, wi, jistan i mouri asou roun poto soufrans.

CHAPIT 5

RANSON-AN : A PI BÈL KADO BONDJÉ

(Matthieu 20:28) Menm fason Pitit wonm-an pa vini pou moun sèrvi l’, mé i vini pou sèrvi é pou bay so lavi pou péyé ranson-an an échanj di bokou moun.

(Romains 5:19) Menm fason roun patché moun vini gen péché akoz di dézobéyisans sa wonm-an, roun patché moun osi ké divini jis douvan Bondjé gras a sa moun-an ki obéyi.

(Romains 3:23, 24) Paské tout moun ka fè péché é pyès moun pa ka rivé imité glwar Bondjé, ²⁴ é a kou roun kado Bondjé ka fè yé lò i ka déklaré yé jis gras a so favèr nou pa mérité, é a grémési ranson Jézi Kris péyé-a yé libéré.

(Luc 22:19) Épi osi, i pran roun dipen, i priyè pou di mèrsi, i kasé dipen-an épi i bay yé l’ é i di : « Sa dipen-an ka rouprézanté mo kò mo ké bay pou zòt. Kontinyé fè sa pou sonjé mo. »

CHAPIT 6

KOTÉ MOUN MOURI-YA FIKA ?

(Ecclésiaste 9:5, 6) Paské sa ki vivan savé yé ké mouri mé moun mouri-ya pa savé anyen, é yé pa gen rékonpans non plis paské tout moun bliyé yé. ⁶ Anplis di sa, yé pa pouvé ni kontan ni rayi ni jalou é yé pa ka partisipé annan anyen ki ka fèt anba solèy-a ankò.

(Ecclésiaste 9:10) Tousa to lanmen ka trouvé pou fè, fè li ké tout to fòrs paské i pa gen ni travay, ni projè, ni konésans, ni sajès annan Tonm-an koté to ka alé.

(Genèse 3:19) To ké swé pou to manjé jistan to viré annan latè, paské a sa yé pran pou fè to. To sa lapousyè é to ké viré lapousyè.

(1 Jean 4:8) Si roun moun pa kontan ròt moun, i pa konnèt Bondjé, paské Bondjé sa lanmou.

CHAPIT 7

I KÉ GEN ROUN RÉZIRÈKSYON !

(2 Corinthiens 1:3, 4) A pou louwé Bondjé ki sa Papa nou Sényèr Jézi Kris, Papa ki ka fè mizérikòrd, Bondjé tout konsolasyon-an, ⁴ ki ka konsolé nou annan tout nou tribilasyon pou nou pouvé konsolé moun ki annan tout kalité traka gras a konsolasyon Bondjé ka bay nou.

(Jean 11:41, 42) Épi yé mété ròch-a asou koté. Jézi lévé so wéy, i gadé laro syèl-a épi i di : « Papa, mo ka di to mèrsi paské to tandé mo. ⁴² A vré, mo té savé to toujou ka tandé mo, mé a pou moun-yan ki doubout la mo palé, pou yé pouvé krè ki a to ki voyé mo. »

(Isaïe 40:26) Lévé zòt wéy laro syèl-a é gadé. A kimoun ki fè sa bagaj-ya ? A Sa-la ki ka fè yé soti kou roun larmé, yé chak dapré yé niméro ; i ka aplé yé tout ké yé non. Gras a patché fòrs ké pwisans i gen, pyès annan yé pa ka manké.

(Actes 24:15) Mo gen sa èspwar-a annan Bondjé, menm èspwar sa moun-yan gen osi ki i ké gen roun rézirèksyon pou jis-ya kou pou enjis-ya.

(Isaïe 25:8) I ké valé lanmò-a pou tout-tan ; wi, Souvéren Sényèr Jéova ké swiyé dlo wéy asou visaj tout moun. Asou tout latè-a, i ké tiré ronté asou so pèp paské a Jéova li menm ki di l’.

CHAPIT 8

A KISA KI RWAYONM BONDJÉ-A ?

(Matthieu 6:9-13) Atò, a konsa pou zòt priyè : « “Nou Papa ki annan syèl-a, a pou to non sanktifyé. ¹⁰ A pou to rwayonm vini. A pou to volonté fèt asou latè-a, kou annan syèl-a. ¹¹ Bay nou dipen nou bézwen pou jòdla. ¹² Pardonnen nou péché, menm fason nou menm ka pardonnen sa ka péché kont nou. ¹³ É pa fè nou antré anba tantasyon, mé libéré nou di méchan-an.” »

(Révélation 14:1) Épi men, gadé sa mo wè ! Timouton-an doubout anlè montangn Syon-an, é 144 000 la ké li é yé gen so non ké non so Papa marké asou yé fron.

(Révélation 14:4) A sa-ya ki pa sali yé kò ké fanm ; yé vyèrj. A yé ki kontinyé swiv Timouton-an tout koté i ka alé. Bondjé achté yé parmi moun ki ka viv asou latè-a kou prémyé frwi pou li ké Timouton-an.

(Révélation 12:7-10) Roun lagèr pété annan syèl-a : Michèl ké so zanj briga kont dragon-an, é dragon-an ké so zanj briga ⁸ mé yé pa ganyen, é i pa té gen plas pou yé ankò annan syèl-a. ⁹ Atò yé jité gran dragon-an, sèrpan ki té la o koumansman, sa-la yé ka aplé Djab ké Satan, ki ka bloublou tout moun asou latè-a ; yé jité l’ asou latè-a é yé jité so zanj ansanm ké li. ¹⁰ Mo tandé roun gro vwa annan syèl-a ki di : « Aprézan, nou délivrans rivé, pwisans Bondjé, so rwayonm ké pouvwar so Kris la, paské yé jité sa-la ki ka akizé nou frè-ya, sa-la ki ka akizé yé lannwit kou jou douvan nou Bondjé ! »

(Psaume 37:10) Roun ti moso tan ankò, é moun méchan pa ké la ankò ; to ké gadé koté yé té fika, é yé pa ké la.

CHAPIT 9

ÈS LAFEN MONN-AN PRÒCH RIVÉ ?

(Hébreux 10:24, 25) Annou gadé roun pou ròt pou nou idé nou konpanyen gen lanmou é fè bèl bagaj ; ²⁵ épi annou pa lésé nou réinyon-yan kou sèrten gen labitid, mé annou ankourajé nou konpanyen, plis ankò paské zòt ka wè jou-a ka rivé.

CHAPIT 10

ZANJ-YA KÉ DÉMON-YAN : A KIMOUN ?

(Genèse 6:2) Pitit vré Bondjé-a wè kouman tifi wonm-yan té jòlòt. Atò, yé koumansé pran tout fanm yé té lé pou yé divini yé madanm.

(2 Corinthiens 2:11) Pou Satan pa pran pyé asou nou, paské nou byen savé sa i lé fè.

(Deutéronome 18:10, 11) I pa ké divèt gen koté to pyès moun ka boulé so tifi ouben so tigarson annan difé, pyès divinò, pyès moun ka fè lamaji, ka chaché savé sa ki ké rivé dimen, ka fè tchenbwa, ¹¹ ka voyé pyay asou moun, ka alé wè roun gadò, pyès moun ka fè moun konnèt sa ki ké rivé dimen, ouben ka chaché palé ké moun mouri-ya.

(Proverbes 18:10) Non Jéova-a, a roun kaz byen doubout. Moun-an ki jis-a ka kouri séré anba l’ é ka jwenn protèksyon.

(Jacques 4:7, 8) Atò, asèpté Bondjé koumandé zòt ; mé pa bay Djab-a pyès chans, é i ké pran kouri lwen di zòt. ⁸ Vini pi pròch di Bondjé, é i ké vini pi pròch di zòt. Pròpté zòt lanmen, zòt ki gen péché, é tiré sa ki mové annan zòt tchò, zòt ki pa savé sa zòt lé.

CHAPIT 11

POUKISA I GEN SA PATCHÉ SOUFRANS-YA ?

(2 Pierre 3:9, 10) Jéova pa ka pran tan pou fè sa i promèt, kou sèrten ka pansé, mé i ka pran pasyans ké zòt, paské i pa lé rounsèl moun mouri, mé i lé yé tout roupanti yé kò. ¹⁰ Mé jou Jéova-a ké vini kou roun volèr, é sa jou-a syèl-a ké disparèt rounsèl kou, mé tout bagaj ki divini cho menm ké fonn, épi latè-a, ké sa moun ka fè asou l’, tousa ké vin byen klè pou tout moun wè sa ka pasé.

(1 Corinthiens 10:13) I pa gen pyès tantasyon zòt sipòrté, ki ròt moun pa janmen viv. Mé Bondjé fidèl ; i pa ké janmen pèrmèt ki zòt tanté pasé sa zòt pouvé sipòrté épi, lò tantasyon-an ké rivé, i ké préparé fason-an pou zòt soti anba l’, pou zòt pouvé andiré l’.

CHAPIT 12

KOUMAN OU POUVÉ DIVINI ZANMI BONDJÉ ?

(Psaume 55:22) Jité tout ou traka asou Jéova, é i ké idé ou. I pa ké janmen lésé roun moun ki jis tonbé.

(Psaume 15:1-5) O Jéova, kimoun to ké envité rété anba to tant ? Kimoun ki ké pouvé rété annan to montangn sent ? ² A sa-la ki ka maché drèt, ki ka fè sa ki jis é ki ka di lavérité annan so tchò. ³ I pa ka mal palé asou moun pou sali yé répitasyon, i pa ka fè so konpanyen pyès mové bagaj é i pa ka mal palé so zanmi. ⁴ I pa ka rété ké moun mové, mé i ka onoré sa ki gen lakrent pou Jéova. I pa ka rouvini anlè so promès, menm si a mové bagaj sa ka mennen pou li. ⁵ I pa ka prété so soumaké pou fè bénéfis é i pa ka asèpté soumaké anba tab kont roun moun inosan. Roun moun konsa pa ké janmen tonbé.

CHAPIT 13

LAVI-A SA ROUN KADO BONDJÉ BAY NOU : RÈSPÈKTÉ L’

(Psaume 36:9) Sours lavi-a, a òbò to i fika ; gras a to limyèr, nou pouvé wè limyèr-a.

(1 Jean 3:15) Si roun moun rayi so frè, a roun kriminèl, é zòt savé ki pyès kriminèl pa pouvé gen lavi pou tout-tan.

(Exode 21:22, 23) Si dé wonm pannan yé ka briga ka frapé roun fanm ki ansent épi fanm-an akouché anvan lèr, mé ni li ni timoun-an pa mouri, moun-an ki frapé l’ ké divèt péyé soumaké ki mari fanm-an ké doumandé l’ ; é a ké jij-ya i ké réglé sa. ²³ Mé si roun annan yé mouri, a lavi moun-an ki frapé l’ to ké divèt bay pou lavi moun-an ki mouri-a.

(Actes 15:28, 29) Paské lèspri sen ké nou menm pansé ki a roun bon bagaj di pa mété plis charj asou zòt mé sèlman sa bagaj enpòrtan-yan : ²⁹ réfizé nèt bagaj yé sakrifyé pou zidòl-ya, disan, zannimo ki mouri toufé ké imoralité sèksyèl. Si zòt ka fè tousa ki fo pou rété lwen di tout sa bagaj-ya, tout bagaj ké alé byen pou zòt. Poté zòt kò byen !

CHAPIT 14

OU FANMI POUVÉ GEN TCHÒ KONTAN

(Éphésiens 5:25-29) Mari, a pou zòt kontinyé kontan zòt madanm, menm fason Kris té kontan asanblé-a é bay so lavi pou li, ²⁶ pou sanktifyé li, é fè li divini pròp ké dlo paròl-a, ²⁷ pou i fè asanblé-a vini bèl toubonnman douvan li, san i pa gen tach, ni rid, ni pyès bagaj ki ka sanblé ké sa, mé pou i sen ké san défo. ²⁸ Menm fason-an, mari-ya divèt kontan yé madanm kou yé pròp kò. Roun wonm ki kontan so madanm kontan so kò, ²⁹ pyès moun pa janmen rayi so pròp kò; mé tout moun ka bay yé kò manjé é ka pran swen di yé kò, kou Kris ka fè l’ pou asanblé-a.

(Tite 2:4, 5) Pou yé pouvé bay jenn fanm-yan konsèy pou yé kontan yé mari, kontan yé timoun, ⁵ pou yé byen kalkilé yé zafè, pou yé lavi pròp, pou yé travay rèd annan yé kaz, pou yé sa roun bon moun, pou yé asèpté ki yé mari sa yé chèf, pou moun pa mal palé paròl Bondjé-a.

CHAPIT 15

KOUMAN ADORÉ BONDJÉ KOU I LÉ ?

(Jean 17:17) Sanktifyé yé ké lavérité ; to paròl sa lavérité.

(Jean 17:6) Moun-yan to bay mo ki té annan monn-an, mo fè yé konnèt to non. Sa moun-yan té di to é to bay mo yé, épi yé kouté to paròl.

(Jean 13:35) A konsa tout moun ké savé ki zòt sa mo disip : si zòt gen lanmou pou zòt konpanyen.

(Jean 3:36) Sa-la ki ka montré so lafwa annan Pitit-a gen lavi pou tout-tan ; sa-la ki ka dézobéyi Pitit-a pa ké gen lavi-a, é kòlè Bondjé ké rété asou li.

(Jean 18:36) Jézi réponn : « Mo rwayonm pa annan sa monn-an. Si mo rwayonm té annan sa monn-an, mo sèrvitèr té ké briga pou yé pa mennen mo pou Jwif-ya. Mé mo rwayonm pa annan sa monn-an. »

(Matthieu 24:14) É sa bon nouvèl di rwayonm-an ké préché asou tout latè-a pou bay tout nasyon-yan témwanyaj, é la lafen-an ké rivé.

CHAPIT 16

CHWAZI ADORÉ BONDJÉ KOU I LÉ

(Exode 20:4, 5) To pa divèt fè zidòl ni anyen ki ka réprézanté pyès bagaj laro syèl-a, ouben asou latè-a ouben annan dlo-a. ⁵ To pa divèt ajounou douvan yé ni lésé moun fè to adoré yé, paské mo, to Bondjé Jéova, mo sa roun Bondjé ki ka doumandé tout moun adoré mo rounso, ki ka pini pitit-ya pou fot papa-ya fè, ki ka pini trwazyèm jénérasyon-an ké katriyèm jénérasyon di sa-ya ki rayi mo.

(Isaïe 52:11) Pa rété la, pa rété la, soti la, pa manyen anyen ki pa pròp ! Soti annan l’, fè tousa zòt pouvé pou rété sen, zòt ki ka poté zouti Jéova !

(Matthieu 7:12) Donk, tousa zòt lé moun-yan fè pou zòt, zòt divèt fè menm bagaj pou yé ; a sa Lalwa ké Profèt-ya ka anprann nou.

(Hébreux 10:24, 25) Épi annou gadé roun pou ròt pou nou idé nou konpanyen gen lanmou é fè bèl bagaj ; ²⁵ épi annou pa lésé nou réinyon-yan kou sèrten gen labitid, mé annou ankourajé nou konpanyen, plis ankò paské zòt ka wè jou-a ka rivé.

CHAPIT 17

LAPRIYÈ : ROUN PRIVILÈJ BONDJÉ KA BAY NOU

(Philippiens 4:6, 7) Pa enkyété zòt kò pou pyès bagaj, mé fè Bondjé konnèt sa zòt bézwen annan tout kalité sitiasyon. Pou sa, priyè l’, sipliyé l’, épi di li mèrsi ; ⁷ é lapè Bondjé, ki ka dépasé tousa nou pouvé konprann, ké protéjé zòt tchò ké zòt lèspri gras a Jézi Kris.

(Jacques 2:26) Wi, si kò-a pa gen lèspri i mouri, menm fason-an si roun moun pa ka fè anyen pou montré i gen lafwa, so lafwa mouri.

(Matthieu 6:9-13) Atò, a konsa pou zòt priyè : « “Nou Papa ki annan syèl-a, a pou to non sanktifyé. ¹⁰ A pou to rwayonm vini. A pou to volonté fèt asou latè-a, kou annan syèl-a. ¹¹ Bay nou dipen-an nou bézwen pou jòdla. ¹² Pardonnen nou péché, menm fason nou menm ka pardonnen sa-ya ki ka péché kont nou. ¹³ É pa fè nou antré an tantasyon, mé libéré nou di méchan-an.” »

(Révélation 14:6) É mo wè rounòt zanj ki té ka volé an mitan syèl-a, é i té gen roun bon nouvèl étèrnèl pou di tout moun ka rété asou latè-a, é pou tout nasyon, piti kou gran, é pou tout lang é pou tout pèp.

(Philippiens 4:13) Pou tout bagaj, mo gen fòrs gras a sa-la ki ka bay mo pwisans.

CHAPIT 18

ÈS MO DIVÈT VOUWÉ MO LAVI POU BONDJÉ É BATIZÉ ?

(Jean 17:3) A sa ki sa lavi pou tout-tan-an : a pou yé anprann konnèt to, ki sa sèl vré Bondjé-a, é sa-la to voyé-a, Jézi Kris.

(1 Pierre 4:2) Konsa, tan i ka rété li pou i viv annan so kò fèt ké lachè, i pa ké viv li pou fè volonté wonm-yan ankò, mé pou fè volonté Bondjé.

(Matthieu 28:19) A pou sa, alé épi fè disip annan moun tout nasyon é batizé yé annan non Papa-a, Pitit-a ké lèspri sen-an.

CHAPIT 19

RÉTÉ ZANMI JÉOVA

(Matthieu 22:37) I réponn li : « “To divèt kontan Jéova to Bondjé ké tout to tchò, ké tout to nanm épi ké tout to pansé.” »

(1 Jean 5:3) Kontan Bondjé, men sa sa lé di : obéyi so lalwa. Mé, so lalwa pa fòrsan.

(1 Thessaloniciens 5:17) Priyè tout-tan.

(1 Corinthiens 15:58) Atò, mo frè-ya, a pou zòt fò, byen doubout. A pou zòt toujou gen bokou bagaj pou fè annan travay Sényèr-a, paské zòt savé ki travay zòt ka fè pou Sényèr-a a pa travay pou bon tchò.

(Colossiens 3:13) Kontinyé sipòrté zòt konpanyen ké pardonnen zòt konpanyen ké tout zòt tchò, menm si roun moun gen roun rézon pou plenn so kò di rounòt moun. Menm fason Jéova pardonnen zòt ké tout so tchò, zòt divèt pardonnen zòt konpanyen ké tout zòt tchò.