LÉSON 32

Rwayonm Bondjé-a ja ka dirijé !

Zimaj piblikasyon-an

Rwayonm Bondjé koumansé dirijé annan syèl-a an 1914. Dipi sa lannen-an, gouvèrnman imen-yan annan yé dèrnyé jou-ya. Kouman nou savé sa ? Nou ké wè profési Labib-a asou sa é nou ké palé di sa ki ka pasé asou latè-a dipi lannen 1914.

1. Kisa profési Labib-a ka di ?

Liv Danyèl-a ka idé nou konprann ki rwayonm Bondjé-a té ké koumansé dirijé a lafen di roun lépòk yé ka aplé « sèt tan » (Daniel 4:16, 17). Plizyèr syèk pita, Jézi aplé sa lépòk-a « tan yé bay nasyon-yan », é i di ki sa sèt tan-yan patékò fini (Luc 21:24). Sèt tan-yan fini an 1914.

2. Kisa ki ka pasé asou latè-a dipi 1914 ?

Disip Jézi-ya doumandé l’ : « Kitan sa bagaj-ya ké fèt é ki sign ké montré to prézans ké dèrnyé moman sa monn-an ? » (Matthieu 24:3). Annan répons i bay, Jézi di ki lò i té ké Rwa rwayonm Bondjé-a annan syèl-a, bokou bagaj té ké rivé asou latè-a. Annan sa bagaj-ya i té ké gen lagèr, lafamin ké tranblémandétèr (li Matthieu 24:7). Labib-a té di osi kouman moun-yan té ké fika annan « dèrnyé jou-ya » é ki, akoz di sa, lavi-a té ké « difisil pou sipòrté » (2 Timothée 3:1-5). Dipi 1914, sa bagaj-ya ka rivé plizanpli.

3. Poukisa monn-an ka divini plizanpli mové dipi rwayonm Bondjé-a koumansé dirijé ?

Roun ti tan apré Jézi divini Rwa rwayonm Bondjé-a, roun lagèr pété annan syèl-a kont Satan ké démon-yan. Satan pédi lagèr-a. Labib-a ka di ki « yé jité l’ asou latè-a é yé jité so zanj ansanm ké li » (Révélation 12:9, 10, 12). Satan kòlè menm, pas i savé yé ké détrwi l’. A pou sa i ka mennen bokou malò ké soufrans asou tout latè-a. A pa pou anyen tout bagaj k’alé mal ! Mé rwayonm Bondjé-a ké fini ké tout sa problèm-yan.

ANNOU FOUYÉ ANNAN LABIB-A

Annou gadé kouman nou savé ki rwayonm Bondjé-a koumansé dirijé an 1914. Annou wè osi kisa sa divèt ankourajé nou fè.

4. Profési Labib-a ki ka montré ki rwayonm Bondjé-a koumansé dirijé an 1914

Gadé VIDÉYO-a.

VIDÉYO : Rwayonm Bondjé-a koumansé dirijé an 1914 (5:02)

Nabikodonozòr, rwa Babilòn tan-lontan-an, fè roun rèv ki té ka vini di Bondjé. Annan sa rèv-a, Jéova montré l’ kisa ki té ké rivé pita. Danyèl èspliké kisa sa rèv-a té lé di. Rèv-a té ka palé di Nabikodonozòr ké rwayonm Bondjé-aa (gadé nòt-a) (li Daniel 4:17).

Li Daniel 4:20-26, épi gadé tablo-a pou réponn sa késyon-yan :

A) Kisa Nabikodonozòr wè annan so rèv ? (gadé vèrsé 20 ké 21).
B) Kisa ki rivé ké pyébwa-a ? (gadé vèrsé 23).
C) Kisa ki rivé a lafen « sèt tan »-yan ? (gadé vèrsé 26).

Pyébwa-a ké rwayonm Bondjé-a

PROFÉSI-A (Daniel 4:20-36)

Rwa-a

A) Roun gran pyébwa

Rwa-a ka arété dirijé

B) « Koupé pyébwa-a » épi lésé pasé « sèt tan »

Roun souch pyébwa maré ké roun moso fè ké roun moso kwiv.

Rwa-a viré annan so rwayonm

C) « Yé ké roubay to to rwayonm »

Annan prémyé fason sa profési-a réyalizé...

D) Pyébwa-a ka réprézanté kimoun ? (gadé vèrsé 22).
E) Kitan rwa-a arété dirijé so rwayonm ? (li Daniel 4:29-33).
F) Kisa ki rivé Nabikodonozòr a lafen « sèt tan »-yan ? (li Daniel 4:34-36).

PRÉMYÉ FASON SA PROFÉSI-A RÉYALIZÉ

Rwa-a

D) Nabikodonozòr, rwa Babilòn

Rwa Nabikodonozòr ka fè ròklò ké so kouròn ki fèt ké lò.

Rwa-a ka arété dirijé

E) Apré 606 anvan nou lépòk, Nabikodonozòr divini fou é i pa té kapab dirijé so rwayonm pannan sèt lannen

Nabikodonozor atè annan savann-an é i ka manjé zèrb.

Rwa-a viré annan so rwayonm

F) Nabikodonozòr roudivini nòrmal é i roudivini rwa

Rwa Nabikodonozòr dibout, é i ka lévé so dé bra pou louwé Jéova.

Annan dézyèm fason sa profési-a réyalizé...

G) Pyébwa-a ka réprézanté kimoun ? (li 1 Chroniques 29:23).
H) Kitan yé arété dirijé ? Kouman nou savé ki i toujou pa té gen rwa ka dirijé lò Jézi vini asou latè-a ? (li Luc 21:24).
I) Kitan ké ki koté rwayonm-an roukoumansé dirijé ?

DÉZYÈM FASON SA PROFÉSI-A RÉYALIZÉ

Rwa-a

G) Rwa Israyèl-ya ka réprézanté gouvèrnman Bondjé

Patché rwa israyélit asiz asou roun tronn roun dèyè ròt. Réyon limyèr ka désann di syèl-a asou yé.

Rwa-a ka arété dirijé

H) Yé détrwi Jérizalèm, é rwa Israyèl-ya arété dirijé yé rwayonm pannan 2 520 lannen

Difé ka détrwi Jérizalèm an 607 anvan nou lépok. Apré sa, 2 520 lannen ka pasé.

Rwa-a viré annan so rwayonm

I) Jézi divini Rwa rwayonm Bondjé-a annan syèl-a

Dipi 1914, Jézi asiz asou so tronn, i ka dirijé latè-a dipi syèl-a. Réyon limyèr ka soti di li.

Konmyen lannen sèt tan-yan ka fè ?

Sèrten vèrsé annan Labib-a ka idé nou konprann ròt vèrsé-ya. Parèkzanp, liv Révélation-an ka di ki trwa tan é dimi a menm bagaj ki 1 260 jou (Révélation 12:6, 14). Atò, sèt tan a dé fwa plis, sa lé di 2 520 jou. Détan, annan Labib-a roun jou ka réprézanté roun lannen (Ézéchiel 4:6). Alòr, profési sèt tan-yan annan liv Danyèl-a ka réprézanté 2 520 lannen.

5. Monn-an chanjé dipi 1914

Gadé VIDÉYO-a.

VIDÉYO : Monn-an chanjé dipi 1914 (1:10)

Jézi té di annan ki léta monn-an té ké fika lò i té ké divini Rwa. Li Luc 21:9-11, épi kozé asou sa késyon-an :

Kilès di sa bagaj-ya ki annan vèrsé-ya ou ka wè jòdla ?

Apot Pòl-a té di kouman moun-yan té ké fika pannan dèrnyé jou-ya di dominasyon imen-yan. Li 2 Timothée 3:1-5, épi kozé asou sa késyon-an :

Ès ou ka pansé ki moun-yan ka aji konsa jòdla ?

Montaj : Lévènman-yan ka pasé asou latè-a pannan dèrnyé jou-ya. 1. Asou roun èstrad, roun chèf militèr ka rélé, ké so lanmen lévé. 2. Sòlda-ya ka fè lagèr. 3. Moun-yan ka maché annan lari ké yé mas pou protéjé yé. 4. Roun mouché ka pran ladròg. I ka pitché so kò. 5. Roun mouché ka bat so madanm é i ka rélé asou li. 6. Boutèy tafia ké tout kalité ladròg. 7. Dé fanm ki ka kouché ké fanm ka pran yé kò an foto. 8. Roun mouché ka jité roun boutèy ké difé.

6. Nou lé soutni rwayonm Bondjé-a

Li Matthieu 24:3, 14, épi kozé asou sa késyon-yan :

Ki travay enpòrtan ka montré ki rwayonm Bondjé-a ja ka dirijé ?
Kouman ou pouvé partisipé annan sa travay-a ?

Rwayonm Bondjé-a ja ka dirijé, é jou-a i ké dirijé tout latè-a tou pròch rivé. Li Hébreux 10:24, 25, épi kozé asou sa késyon-an :

Kisa nou tout divèt fè pi nou ka « wè jou-a ka rivé » ?

Montaj : 1. Mouché, madanm ké timoun annan roun réinyon témwen Jéova-ya. 2. Roun étidyan Labib-a ka préché pou roun madanm i konèt. — Si ou ka anprann ki roun bagaj pouvé idé ròt-ya é sové yé lavi, kisa ou ké lé fè ?

SI ROUN MOUN DOUMANDÉ OU : « Poukisa lannen 1914 enpòrtan pou Témwen Jéova-ya ? »

Kisa ou ké di ?

SA NOU WÈ

Profési Labib-a ké tousa ki ka pasé annan monn-an ka montré ki rwayonm Bondjé-a ja ka dirijé. Nou ka montré ki nou sir di sa lò nou ka préché é lò nou ka alé annan réinyon-yan.