Patché moun pa ka alé annan yé rélijyon ankò paské yé pa ka trapé ni répons asou késyon yé ka pozé yé kò ni pyès konsolasyon. Atò poukisa i bon di vini annan réinyon Témwen Jéova-ya ka òrganizé ? Ki bénédiksyon ou ké trapé ?

Ou ké gen tchò kontan paské ou ké trapé bon frékantasyon. Annan prémyé syèk-a krétyen-yan té òrganizé an asanblé. Yé té ka òrganizé réinyon pou adoré Bondjé, étidyé Labib-a ké ankourajé yé konpanyen (Hébreux 10:24, 25). Yé té annan roun anbyans plen ké lanmou koté roun té ka gadé pou ròt, yé té ka rasanblé ké vré zanmi, yé frè ké sò èspirityèl (2 Thessaloniciens 1:3 ; 3 Jean 14). Jòdla nou ka swiv yé èkzanp, sa ka bay nou tchò kontan kou yé menm té gen tchò kontan.

Ou ké anprann kouman pou swiv prensip ki annan Labib-a. Dapré sa ki marké annan Labib-a, wonm, fanm ké timoun té ka rasanblé ansanm é a sa nou ka kontinyé fè jòdla. Moun ki byen konnèt ansényé ka itilizé Labib-a pou idé nou byen konprann kouman pou nou swiv prensip-ya annan nou lavi touléjou (Deutéronome 31:12 ; Néhémie 8:8). Chak moun pouvé palé di yé lafwa ké di yé èspéryans. Pou fè sa, yé pouvé réponn lò i gen roun kozman asou roun tèm épi lò i gen chanté, yé pouvé chanté (Hébreux 10:23).

Nou kontan paské nou gen roun lafwa pi solid. Annan so lépòk, apot Pòl di moun-yan ki té annan so asanblé : « A pa ti anvi mo anvi wè zòt [...] pou nou chak ankourajé nou konpanyen ké nou lafwa, zòt lafwa ké ankourajé mo é mo lafwa ké ankourajé zòt » (Romains 1:11, 12). Lò nou ka rasanblé chak simenn ké ròt Témwen Jéova sa ka fè nou lafwa divini pi fò é sa ka ankourajé nou viv kou roun krétyen divèt viv.

Ès ou té ké lé vini annan prochen réinyon di nou asanblé pou profité di tout sa bénédiksyon-yan ? Nou ké byen rousouvwè ou ! Ou pa ké gen anyen pou péyé ; i pa janmen gen lakèt.

• Ki èkzanp nou ka swiv pou òrganizé nou réinyon ?

• Ki bénédiksyon nou ka jwenn annan réinyon-yan ?

Menm si fo nou maché an mitan danbwa, ouben menm si tan-an mové, nou ka fè tousa nou pouvé pou pa manké roun réinyon. A vré, lavi-a pouvé rèd ouben nou pouvé las apré roun lajournen travay, mé sa pa ka anpéché nou alé annan nou réinyon pou frékanté ròt Témwen Jéova. Lò nou ka fè tousa éfòr, kisa nou ka trapé ?

Nou ka santi nou kò byen. Apot Pòl di moun annan asanblé-ya ki roun té divèt gadé pou ròt (Hébreux 10:24). Lò apòt Pòl ka di sa, i ka ankourajé nou anprann konnèt nou konpanyen. Lò nou ka anprann konnèt moun-yan annan nou asanblé, nou ka konprann ki yé rivé tchenbé rèd anba menm problèm ki nou gen osi. Sa lé di ki yé pouvé idé nou fini ké nou problèm.

Nou ka jwenn bon zanmi menm. Lò nou ka alé annan nou réinyon-yan, nou pa ka jwenn moun nou konnèt konsa, mé bon zanmi. Annan ròt sitiasyon, nou ka pasé tan ansanm pou anmizé nou kò di roun fason ki pròp. Kisa sa ka fè lò nou ka frékanté ròt Témwen Jéova ? Nou ka anprann kontan nou konpanyen, sa ka fè ki nou lanmou pou nou konpanyen ka divini pi fò. Konsa, lò roun di nou ka trapé roun trafalga, nou ka idé l’ san graté tèt paské nou lanmityé fò (Proverbes 17:17).Lò nou ka frékanté tout moun annan nou asanblé nou ka montré ki nou ka gadé pou nou konpanyen (1 Corinthiens 12:25, 26).

Nou ka ankourajé ou chwazi pou zanmi sa ki ka fè volonté Bondjé. Ou ké trapé yé koté Témwen Jéova-ya. Pa lésé anyen anpéché ou rasanblé ké nou !

• Poukisa sa bon pou nou lò nou ka rasanblé annan nou réinyon-yan ?

• Kitan ou té ké lé konnèt moun-yan ki annan nou asanblé ?

Annan prémyé syèk-a, a pa té sérémoni krétyen-yan té ka fè pannan yé réinyon. Lò yé té ka rasanblé pou adoré Bondjé, yé té ka chanté, priyè, yé té ka li ké palé asou sèrten vèrsé di Labib-a (1 Corinthiens 14:26). A sa nou ka fè osi annan nou réinyon.

Roun vré ansèyman ki ka vini di Labib-a. Lò lafen simenn-an rivé, chak asanblé ka rasanblé pou kouté roun diskour biblik pannan 30 minit. Sa diskour-a ka montré kouman Paròl Bondjé itil annan nou Lavi é annan nou lépòk. Nou tout ankourajé swiv vèrsé-ya annan nou pròp Labib. Apré sa diskour-a, tout moun pouvé partisipé annan étid « Tourdégard-a ». Sa kozman-an ka fèt pannan roun lèr asou roun parti annan Tourdégard-a ki fèt èsprè pou étidyé. I ka idé nou swiv prensip-ya ki annan Labib-a annan nou lavi. Pasé 120 000 asanblé toupatou asou latè-a ka étidyé sa menm parti-a.

Nou ka anprann kouman pou ansényé. Nou ka rasanblé osi roun jou aswè annan simenn-an pou roun program ki gen trwa parti. Yé ka aplé l’ Lavi krétyen ké prédikasyon-an. I asou Kayé pou réinyon Lavi krétyen ké prédikasyon-an. Sa program-an ka koumansé ké Bijou Paròl Bondjé-a ki ka idé nou konprann pi byen déztrwa chapit Labib-a ki asanblé-a ja li anvan. Apré, annan parti Divini pi vayan annan prédikasyon-an, yé ka montré nou kouman nou divèt palé di Labib-a pou moun-yan. Roun frè ka bay konsèy asou fason pou nou li ké palé pi byen (1 Timothée 4:13). Pou fini, parti Lavi krétyen-an ka montré nou kouman pou nou swiv prensip ki annan Labib-a touléjou annan nou lavi. Toujou annan sa parti-a, i gen roun kozman késyon ké répons ki ka idé nou konprann Labib-a pi byen.

Tout bèl ansèyman biblik nou ka rousouvwè annan nou réinyon ké fè ou rété èstébékwé (Isaïe 54:13).

• Kouman sa ka pasé annan nou réinyon ?

• Annan ki réinyon ou té ké lé vini pou prémyé fwa ?

Ès ou wè ki asou foto ki annan sa ti liv-a Témwen Jéova-ya byen abiyé pou alé annan yé réinyon ? Poukisa sa enpòrtan pou nou di byen abiyé ?

Pou nou montré ki nou ka rèspèkté Bondjé. A vré ki Bondjé pa ka rété asou sa wéy ka wè (1 Samuel 16:7). Mé, lò nou ka adoré l’ ké ròt moun, nou lé vréman montré ki nou gen rèspè pou li é pou moun-yan ki la ké nou. Si nou divèt pasé douvan roun jij, pou rèspèkté so pozisyon, nou ké byen gadé ki lenj nou ké mété. A menm bagaj-a pou nou réinyon, nou lenj ka montré rèspè nou gen pou « Jij tout latè-a » Bondjé Jéova, é pou koté nou ka adoré li-a (Genèse 18:25).

Pou nou montré ki prensip nou ka swiv, enpòrtan pou nou. Labib-a ka ankourajé krétyen-yan abiyé « ké modèsti ké bon sans » (1 Timothée 2:9, 10). Lò nou ka abiyé « ké modèsti » sa lé di pa mété lenj pou fè moun wè, pa mété lenj ki ka montré tout ou fòrm, lenj tro kourt, tro séré ouben tro dékòlté. Lò nou ka palé di « bon sans », sa ka idé nou chwazi bèl lenj sa lé di lenj ki pa débrayé, é ki pa ka choké. Prensip ki annan Labib-a ka lésé chak moun lib pou yé chwazi sa yé lé mété. San menm nou louvri nou bouch, nou pouvé « fè ansèyman nou Bondjé vini pi bèl » é « bay Bondjé glwar » ké roun lenj nou byen chwazi (Tite 2:10 ; 1 Pierre 2:12). Konsa, lò nou ka byen abiyé pou nou réinyon, nou ka bay roun bon lidé asou fason nou ka adoré Jéova.

Mé a pa pou ou lésé ou lenj anpéché ou vini annan nou réinyon ! Lenj-ya pa bézwen kouté chè ouben pa bézwen gran zafè pou yé bèl, pròp ké bon pou alé annan réinyon-yan.

• Poukisa fason nou ka abiyé enpòrtan lò nou ka adoré Bondjé ?

• Ki prensip ka idé nou chwazi lenj nou ké mété ?

Si ou ka étidyé Labib-a ké roun Témwen Jéova, ou divèt ja ka fè éfòr pou préparé ou kò anvan chak léson. Anvan ou vini annan roun réinyon, a menm bagaj-a, a pou ou préparé ou kò pou ou byen profité di réinyon-an. Miyò bagaj ou pouvé fè, a gen roun bon program.

A pou chwazi bon moman-an ké bon koté-a. A ki moman ou lèspri pi klè ? Bònò, anvan koumansé travay, ouben lannwit lò timoun-yan ka dronmi ? Menm si ou pa pouvé étidyé lontan, a pou ou désidé anvan konmyen tan ou ké étidyé, épi pa lésé anyen déranjé ou program. Chaché roun koté i pa gen dézòrd épi étenn radyo, télévizyon ké téléfonn. Priyè anvan ou étidyé, sa ké idé ou mété tout ou traka di lajournen asou koté pou byen réfléchi asou Paròl Bondjé-a (Philippiens 4:6, 7).

A pou ou marké lidé enpòrtan-yan é préparé ou répons. Koumansé jité roun kout wéy asou tousa ou ké wè. Réfléchi asou tit léson ou ka étidyé-a, chaché kouman tit-a ka alé ké chak parti. Gadé zimaj-ya. Li késyon révizyon-yan ki ka montré ou sa ki pi enpòrtan. Apré, li chak paragraf épi chaché répons-a. Li vèrsé-ya épi chaché kouman yé ka alé ké sa ou fini li-a (Actes 17:11). Lò ou trapé répons paragraf-a, soulinyé déztrwa mo ki ké idé ou sonjé répons-a. Si ou lé, pannan réinyon-an, ou ké pouvé lévé ou lanmen pou bay ou répons di oupa fason.

Chak simenn, lò ou ké préparé réinyon-yan, ou ké trouvé ròt pépit èspirityèl ki ké vini rajouté annan konésans biblik ou ja gen (Matthieu 13:51, 52).

• Ki program ou pouvé fè pou préparé réinyon-yan ?

• Kouman ou pouvé préparé roun répons pou roun réinyon ?

Dipi nanninannan Jéova lé ki chak fanmi pasé tan ansanm pou randé yé lanmou pou li ké yé fanmi pi fò (Deutéronome 6:6, 7). A pou sa Témwen Jéova-ya ka pran roun tan chak simenn pou adoré l’ ké yé fanmi. Yé ka asiz ansanm é yé ka palé di bagaj annan Labib-a ki pouvé idé yé sélon sa yé bézwen. Menmsi ou ka rété tousèl, ou pouvé pran roun tan pou Bondjé lò ou ka étidyé roun bagaj ou chwazi annan Labib-a.

A roun tan pou vini pi pròch ké Jéova. « Vini pi pròch di Bondjé, é i ké vini pi pròch di zòt » (Jacques 4:8). Lò nou ka li Labib-a nou ka anprann bagaj asou kalité Jéova ké sa i fè, konsa nou ka rivé konnèt li pi byen. Lò ou ka désidé koumansé étidyé Labib-a ké ou fanmi, roun bagaj tou senp zòt pouvé fè a li Labib-a ansanm. Zòt pouvé pitèt swiv program simenn-an pou réinyon Lavi krétyen ké prédikasyon-an. Chak moun annan fanmi-a pouvé li plizyèr vèrsé. Apré sa tout moun pouvé di sa yé anprann annan sa vèrsé-ya.

A roun tan pou vini pi pròch ké ou fanmi. Lò mouché ké madanm, papa, manman ké pitit ka étidyé Labib-a ansanm, yé lanmou ka divini pi fò. Tout moun divèt gen tchò kontan é pran plézi annan sa étid-a. Tout moun divèt anvi moman-an rivé pou fè sa étid-a. I gen dé manman ké papa ka chwazi palé di bagaj ki ké idé yé timoun sélon yé laj, parèkzanp roun traka yé trapé lékòl épi fason pou réglé problèm-an. Yé ka sèrvi parèkzanp di sa yé trouvé annan Tourdégard-a ouben annan Réveillez-vous !. Rounòt fason ankò a di alé asou nou sit Web, jw.org. Yé pouvé osi gadé roun émisyon asou JW Télédiffusion (tv.jw.org), épi apré sa, palé ansanm di sa yé wè. Sèrten moun kontan chanté pou antréné yé kò pou réinyon-yan é yé kontan prévwè bagaj pou manjé ké bwè apré yé étidyé Labib-a ké yé fanmi.

Sa bèl moman-an yé ka pasé ansanm chak simenn pou adoré Jéova ké idé tout fanmi-a pran plézi étidyé Labib-a. Asiré pa pitèt Bondjé ké béni tousa ou ka fè pou sa byen pasé (Psaume 1:1-3).

• Poukisa sa byen di pran tan pou étidyé Labib-a ké ou fanmi ?

• Kisa papa ké manman pouvé fè pou tout fanmi-a pasé roun bon moman ansanm ?

Poukisa sa moun-yan gen tchò kontan konsa ? A paské yé annan roun di nou gran asanblé-ya. Tan-lontan Bondjé té doumandé so sèrvitèr-ya rasanblé trwa fwa chak lannen. Kou yé, nou présé pou alé annan sa lévènman-yan (Deutéronome 16:16). Nou menm osi nou gen trwa gran asanblé chak lannen : dé asanblé sirkonskripsyon yé chak pannan roun lajournen, épi roun asanblé réjyonal ki ka fèt pannan trwa jou. Poukisa sa asanblé-ya bon pou nou ?

Yé ka randé nou lanmou pou nou frè ké nou sò pi fò. Israyélit-ya té kontan bay Jéova glwar « annan gran asanblé-a », nou menm osi a ké tchò kontan nou ka adoré Jéova ansanm annan nou gran asanblé sirkonskripsyon ouben réjyonal (Psaume 26:12 ; 111:1). A la nou pouvé rouwè ouben fè konésans ké Témwen ki annan ròt asanblé lokal, ouben menm annan ròt péyi. Lò midi rivé nou ka rété ansanm pou nou manjé, a sa osi ki ka bay tout moun tchò kontan (Actes 2:42). Pannan sa lévènman èspirityèl-ya, chak moun ka santi annan yé tchò lanmou ki ka rasanblé « tout frè ké sò » ansanm toupatou asou latè-a (1 Pierre 2:17).

Yé ka idé nou anprann sèrvi Bondjé pi byen. Israyélit-ya té kontan osi paské yé té konprann Paròl Bondjé yé té èspliké yé (Néhémie 8:8, 12). Kou yé menm nou kontan rousouvwè ansèyman ki ka vini di Labib-a annan nou gran asanblé-ya. Chak gran asanblé gen roun tèm ki ka vini di Labib-a. Gras a diskour nou ka tandé ké démonstrasyon nou ka wè, nou ka anprann fè volonté Bondjé annan nou lavi. Anplis di sa, nou ka kouté èspéryans moun ki ka rivé swiv ansèyman Labib-a annan nou lépòk ki rèd é sa ka ankourajé nou. Annan asanblé réjyonal-ya, nou ka gadé fim ki ka fè nou wè kousidiré nou té ka viv annan lépòk Labib-a é ka anprann nou bokou bagaj. Annan chak gran asanblé, i gen batenm ki òrganizé pou sa-ya ki désidé ofri Bondjé yé lavi é fè so volonté. Yé batenm douvan tout moun ka montré désizyon yé pran annan yé tchò.

• Poukisa nou kontan lò nou annan nou gran asanblé-ya ?

• Si ou ka vini annan roun gran asanblé, ki bon bagaj sa ké poté pou ou ?

Roun ti tan anvan i mouri, Jézi di : « Sa bon nouvèl di Rwayonm-an ké préché asou tout latè-a, pou bay tout nasyon-yan témwanaj, é la lafen-an ké rivé » (Matthieu 24:14). Mé kouman sa prédikasyon-an té ké fèt asou tout latè-a ? Yé té ké swiv èkzanp Jézi lésé-a (Luc 8:1).

Nou ka préché di kaz an kaz. Jézi anprann so disip préché bon nouvèl-a di kaz an kaz (Matthieu 10:11-13 ; Actes 5:42 ; 20:20). Prémyé krétyen-yan té gen yé pròp téritwar koté yé té divèt préché (Matthieu 10:5, 6 ; 2 Corinthiens 10:13). Jòdla osi, nou prédikasyon byen òrganizé : chak asanblé gen roun koté pou yé alé préché. Konsa nou pouvé kontinyé misyon Jézi bay nou : préché é bay roun témwanyaj ki antchè (Actes 10:42).

Nou ka chaché trouvé moun tout koté yé fika. Jézi té ka préché tout koté i té savé i té ké trouvé moun, ki òbò lanmè, ki òbò roun pi (Marc 4:1 ; Jean 4:5-15). Nou ka swiv so èkzanp lò nou ka pran kozé asou Labib-a tout koté nou pouvé : annan lari-a, koté moun ka travay, koté moun ka promennen, ké ròt koté ankò. Nou ka sèrvi téléfonn osi. Épi lò sa posib, nou ka palé pou nou vwazen, nou kòlèg travay, nou kanmarad lékòl ké moun annan nou fanmi. Ké tousa nou ka fè, milyon moun ja tandé « bon nouvèl-a ki ka sové » (Psaume 96:2).

Pou kimoun ou té ké lé palé di bon nouvèl rwayonm Bondjé-a ké sa i ké poté pou nou pita ? Pa tchenbé sa mésaj èspwar-a pou ou rounso, pa pè palé di sa chak moman ou pouvé !

• Ki « bon nouvèl » divèt préché ?

• Kouman nou ka swiv èkzanp Jézi annan fason nou ka préché ?

Roun « pyonyé » a roun moun ki prémyé annan roun bagaj é i ka louvri chimen pou ròt moun dèyè li. Nou pouvé di ki Jézi té sa roun pyonyé, paské Bondjé voyé l’ asou latè-a pou koumansé préché roun mésaj ki ka bay moun-yan lavi é pou bay yé posibilité pou yé sové (Matthieu 20:28). Jòdla, so disip ka imité l’ lò yé ka bay tout tan yé pouvé pou fè ròt disip (Matthieu 28:19, 20). Sèrten moun désidé pran sa nou ka aplé sèrvis pyonyé-a.

A roun moun ki ka préché près tout tan. Tout Témwen Jéova ka préché bon nouvèl-a. Mé sèrten ranjé yé kò pou yé divini pyonyé pèrmanan, sa lé di préché 70 lèr chak mwa. Pou yé rivé fè sa, yé ka travay mwens. I gen ròt ki pyonyé èspésyal. Yé ka voyé yé koté i pa gen asé moun ka préché. Yé menm ka préché 130 lèr chak mwa ouben plis. Pyonyé-ya ka mennen roun lavi ki senp, yé ka mété yé konfyans annan Jéova paské yé savé i ké bay yé tousa yé bézwen (Matthieu 6:31-33 ; 1 Timothée 6:6-8). Sa-ya ki pa pouvé préché près tout-tan pouvé pran sèrvis pyonyé òksilyèr, é yé ka préché 30 ouben 50 lèr annan mwa-a.

A roun moun ki ka préché paské i kontan Bondjé é i kontan ròt moun-yan. Kou Jézi, nou ka wè ki roun patché moun bézwen konnèt Bondjé (Marc 6:34). É sa nou konnèt pouvé idé yé dipi aprézan é bay yé roun èspwar ki solid. Kou i kontan moun-yan, a ké tout so tchò roun pyonyé ka bay so tan ké so fòrs pou fè yé konnèt bon nouvèl-a (Matthieu 22:39 ; 1 Thessaloniciens 2:8). So lafwa ka divini pi fò, i ka vini pi pròch di Bondjé é i gen tchò kontan (Actes 20:35).

• A kisa ki roun pyonyé ?

• Poukisa pyonyé-ya ka préché ?

Dipi nanninannan Témwen Jéova-ya toujou mété lékòl pou bay konésans asou Bondjé. Sa-ya ki ka préché près tout tan pouvé profité di lékòl èspésyal pou yé byen fè yé misyon (2 Timothée 4:5).

Lékòl pou pyonyé-ya. Lò so prémyé lannen fini, pyonyé pèrmanan-an ka swiv roun fòrmasyon pannan sis jou. Sa lékòl-a ka fèt annan roun Sal di Rwayonm. I fèt pou idé pyonyé-a vini ankò pi pròch di Jéova, divini pi vayan annan tout fòrm prédikasyon é kontinyé so sèrvis ké fidélité.

Lékòl pou évanjélizatèr Rwayonm-an. Sa lékòl-a ka fèt pannan dé mwa é i fèt pou fòrmé pyonyé ki gen èspéryans. Yé paré pou lésé koté yé ka rété pou alé préché annan nenpòrt ki ròt koté yé bézwen yé. A kousidiré yé ka di : « Men mo ! Voyé mo ! », pou imité Jézi Kris, pi vayan Évanjélizatèr nou pa janmen wè asou latè (Isaïe 6:8 ; Jean 7:29). Lésé ou koté sa lé di parfwa gen roun lavi pi senp. Ou pouvé jwenn rounòt kiltir, rounòt sézon, roun manjé diféran di sa ou konnèt. Pitèt menm ou ké gen pou anprann rounòt lang. Sa lékòl-a ka idé frè ké sò ki maryé ké sa ki pa maryé ki gen ant 23 ké 65 an, pou yé travay kalité èspirityèl yé ké bézwen koté yé ké voyé yé. Yé ké divini pi kapab, konsa Jéova ké so òrganizasyon pouvé itilizé yé plis ankò.

Lékòl biblik Galaad. Annan lang ébré-a, « Galaad » lé di roun « ta ròch [ka sèrvi di] Témwen ». Dipi jou sa lékòl-a louvri an 1943, yé voyé 8 000 misyonèr pou yé préché « jis koté ki pi lwen asou latè-a » (Actes 13:47). Lò frè ké sò ki té alé annan sa lékòl-a rivé Pérou, i pa té gen pyès asanblé annan sa péyi-a. Jòdla i gen pasé 1 000 asanblé. I pa menm té gen dis Témwen Jéova Japon lò nou misyonèr koumansé préché. Jòdla annan sa koté-a i gen pasé 200 000 Témwen. Pannan sa lékòl-a ki ka fèt pannan senk mwa, yé ka alé annan mimisouk Paròl Bondjé-a. A pyonyé èspésyal, misyonèr, moun ki ka travay annan bétèl ké rèsponsab sirkonskripsyon ké yé madanm ki envité pou fè sa lékòl-a. Yé ka byen fòrmé yé pou yé idé annan asanblé-ya asou tout latè-a.

• Poukisa nou gen lékòl pou pyonyé-ya ?

• Kimoun ki pouvé swiv lékòl pou évanjélizatèr Rwayonm-an ?