Kouman sé prensip-ya ki annan Labib-a pouvé édé nou ?

1. Poukisa nou bizwen dirèksyon ?

Nou Kréyatèr gen plis sajès pasé nou. I sa nou Papa : i kontan nou é i ka gadé pou nou. Anplis, i pa fè nou pou nou maché san li (Jérémie 10:23). A pou sa nou tout bizwen dirèksyon Bondjé, menm fason roun timoun bizwen dirèksyon so papa ké so manman (Isaïe 48:17, 18). A pou sa Bondjé fè nou roun kado : i bay nou prensip-ya ki annan Labib-a pou bay nou dirèksyon. — Li 2 Timothée 3:16.

Lalwa ké prensip Jéova ka ansényé nou kouman nou pouvé jwenn miyò lavi nou pouvé gen jòdla. Yé ka montré nou osi kisa nou divèt fè pou nou trapé dimen bénédiksyon pou tout-tan. Piské a Bondjé ki kréyé nou, nou divèt swiv so dirèksyon ké tout nou tchò. — Li Psaume 19:7, 11 ; Révélation 4:11.

2. A kisa ki roun prensip ?

Roun prensip a roun vérité ki jénéral. Kanta sé lalwa-ya, yé ka apliké annan roun sitiasyon byen prési (Deutéronome 22:8). Pou savé kouman apliké roun prensip ki ka vini di Labib-a annan roun sitiasyon prési, a pou nou réfléchi (Proverbes 2:10-12). Parèkzanp, Labib-a ka ansényé ki lavi sa roun kado di Bondjé. Sa prensip enpòrtan-an pouvé gidé nou annan nou travay, lò nou annan nou kaz é annan nou déplasman. I ka pousé nou pran prékosyon pou nou sékirité. — Li Actes 17:28.

3. A kisa sé dé prensip-ya ki pi enpòrtan ?

Jézi palé di dé prensip ki trè enpòrtan. Prémyé-a ka montré poukisa nou asou latè-a : pou konnèt Bondjé, kontan li é fè so volonté ké fidélité. Nou divèt sonjé sa prensip-a é apliké l’ annan tout désizyon nou ka pran (Proverbes 3:6). Sé moun-yan ki ka apliké sa prensip-a ka divini zanmi Bondjé, yé gen tchò kontan é yé ké viv pou tout-tan. — Li Matthieu 22:36-38.

Dézyèm prensip-a ka pèrmèt nou viv an pè ké sé lézòt-ya (1 Corinthiens 13:4-7). Pou apliké sa prensip-a, fo nou aji ké sé moun-yan kou Bondjé ka aji ké yé. — Li Matthieu 7:12 ; 22:39, 40.

4. Kouman sé prensip-ya ki annan Labib-a pouvé édé nou ?

Annan Labib-a i gen prensip ki ka anprann sé fanmi-ya kisa yé divèt fè pou viv ansanm gras a lanmou (Colossiens 3:12-14). Labib-a ka ansényé rounòt prensip ki ka protéjé sé fanmi-ya : lò moun ka maryé yé divèt rété ansanm pou tout-tan. — Li Genèse 2:24.

Lò nou ka apliké sé prensip-ya ki annan Labib-a, yé ka édé nou gen sa nou bizwen pou viv é yé ka édé nou santi nou kò byen annan nou lavi. Souvan, sé patron-yan préféré moun-yan ki ka rèspèkté prensip Labib-a paské yé onèt é yé ka travay rèd (Proverbes 10:4, 26 ; Hébreux 13:18). Labib-a ka anprann nou kontanté nou kò di sa ki pi enpòrtan pou viv, é osi bay lanmityé pou Bondjé plis enpòrtans pasé nenpòrt ki bagaj matéryèl. — Li Matthieu 6:24, 25, 33 ; 1 Timothée 6:8-10.

Sé prensip-ya ki annan Labib-a ka protéjé nou santé (Proverbes 14:30 ; 22:24, 25). Parèkzanp, lalwa Bondjé ki ka défann bwè pou sou ka protéjé nou di aksidan ké maladi ki ka tchwé moun (Proverbes 23:20). Jéova ka pèrmèt nou bwè alkòl mé a pa pou bwè tròp (Psaume 104:15 ; 1 Corinthiens 6:10). Tout prensip Bondjé bon pou nou : yé ka anprann nou véyé asou sa nou ka fè mé osi asou sa nou ka pansé (Psaume 119:97-100). Si sé vré krétyen-yan ka rèspèkté prensip ké lalwa Bondjé, a pa jis pou rousouvwè bénédiksyon. Yé ka fè sa pou onoré Jéova. — Li Matthieu 5:14-16.