Mésaj pi enpòrtan annan Labib-a, a rwayonm Bondjé-a. Jéova ké itilizé sa Rwayonm-an pou fè latè-a divini roun paradi. Mé a kisa sa Rwayonm-an ? Kouman nou pouvé savé ki i ja ka dirijé ? Kisa sa Rwayonm-an ja rivé fè ? Kisa i ké fè pita ? Sa léson-an ké dé ròt-ya ki ka swiv ké réponn sa késyon-yan.

1. A kisa rwayonm Bondjé-a, é a kimoun ki Rwa di sa Rwayonm-an ?

Rwayonm Bondjé-a, a roun gouvèrnman Jéova kréyé. Rwa-a, a Jézi Kris é i ka dirijé dipi laro syèl-a (Matthieu 4:17 ; Jean 18:36). Labib-a ka di ki Jézi « ké dirijé [...] pou tout-tan » (Luc 1:32, 33). Kou i sa Rwa di rwayonm Bondjé-a, Jézi ké dirijé tout moun asou latè-a.

2. Kimoun ki ké dirijé ké Jézi ?

Jézi pa ka dirijé tousèl. « Moun di tout nasyon, ti nasyon kou gran nasyon, di tout lang, ké di tout pèp ké dirijé latè-a » ansanm ké Jézi (Révélation 5:9, 10). Konmyen moun ké dirijé ké Jézi ? Dipi jou-a Jézi vini asou latè-a jik jòdla, milyon moun divini so disip. Mé ès ki tout disip Jézi ké dirijé ké li ? Awa. A sèlman 144 000 moun ki ké dirijé ké Jézi annan syèl-a (li Révélation 14:1-4). Tout ròt disip-ya ké viv anba dominasyon Rwayonm-an asou latè-a (Psaume 37:29).

3. Poukisa rwayonm Bondjé-a pi bon pasé gouvèrnman imen-yan ?

Menm si chèf politik-ya ka éséyé fè bagaj ki bon, yé pa pouvé fè tousa yé lé. Épi i gen roun moman, ròt chèf politik ka ranplasé yé, é sa nouvo chèf-ya, détan, ka gadé yenki pou yé douvan lèstomak é pa lé idé pèp-a. Mé pyès moun pa ké janmen ranplasé Jézi, Rwa di rwayonm Bondjé-a. Bondjé mété « roun rwayonm ki pa ké janmen détrwi » (Daniel 2:44). Jézi ké dirijé tout latè-a, é i pa ké trété sèrten moun pi byen pasé ròt-ya. Jézi sa roun Rwa plen ké lanmou, bonté ké lajistis, é i ké anprann moun-yan aji ké yé konpanyen di menm fason-an : ké lanmou, bonté é lajistis (li Isaïe 11:9).

4. Rwayonm Bondjé-a ké dirijé tout latè-a

Jézi Kris pi fò pasé tout ròt chèf ki ja èkzisté asou latè-a. Li Matthieu 28:18, épi kozé asou sa késyon-an :

• Ki diférans i gen ant pouvwar Jézi gen ké sa-la gouvèrnman imen-yan gen ?

Gouvèrnman imen-yan ka chanjé toulong, é yé chak ka dirijé sèlman roun parti di latè-a. Mé kisa nou pouvé di asou rwayonm Bondjé-a ? Li Daniel 7:14, épi kozé asou sa késyon-yan :

• Dominasyon rwayonm Bondjé-a « pa ké jen disparèt ». Poukisa a roun bon bagaj ?

• Rwayonm Bondjé-a ké dirijé tout latè-a. Poukisa a roun bon bagaj ?

5. Nou bézwen roun nouvo gouvèrnman

Poukisa a pou rwayonm Bondjé-a ranplasé gouvèrnman imen-yan ? Gadé VIDÉYO-a, épi kozé asou sa késyon-an :

VIDÉYO : A kisa ki rwayonm Bondjé-a ? (roun parti) (1:41)

• Ki problèm gouvèrnman imen-yan mennen ?

Li Ecclésiaste 8:9, épi kozé asou sa késyon-an :

• Ès ou ka pansé ki a pou rwayonm Bondjé-a ranplasé gouvèrnman imen-yan ? Poukisa ou ka di sa ?

6. Moun-yan ki ka dirijé rwayonm Bondjé-a ka konprann nou

Nou Rwa, Jézi, viv asou latè-a kou roun wonm, é a pou sa i pouvé « konprann nou féblès » (Hébreux 4:15). Anplis di sa, Jéova chwazi 144 000 wonm ké fanm fidèl pou dirijé ké Jézi, « moun di tout nasyon, ti nasyon kou gran nasyon, di tout lang, ké di tout pèp » (Révélation 5:9).

• Kisa ou ka rousanti lò ou ka anprann ki Jézi ké sa-ya ki ké dirijé ké li ka konprann problèm-yan nou ka jwenn ? Poukisa ou ka di sa ?

7. Lalwa rwayonm Bondjé pi bon pasé sa-ya di tout gouvèrnman imen-yan

Gouvèrnman-yan ka mété lalwa pou protéjé ké idé pèp-a. Rwayonm Bondjé-a gen osi sopa lalwa ki so pèp divèt swiv. Li 1 Corinthiens 6:9-11, épi kozé asou sa késyon-yan :

• Dapré ou, kouman latè-a té ké fika si tout moun té ka obéyi lalwa Bondjéa ? (gadé nòt-a).

• Ès ou ka pansé ki Bondjé gen drwa doumandé moun-yan obéyi lalwa so Rwayonm ? Poukisa ?

• Poukisa nou pouvé di ki moun-yan ki pa ka obéyi sa lalwa-a pouvé chanjé ? (gadé vèrsé 11-a).

SA NOU WÈ

Rwayonm Bondjé-a, a roun vré gouvèrnman ki laro syèl-a, é i ké dirijé tout latè-a.

Kisa ou anprann

• A kimoun ki ké dirijé rwayonm Bondjé-a ?

• Poukisa rwayonm Bondjé-a pi bon pasé tout ròt gouvèrnman imen-yan ?

• Kisa Jéova ka doumandé moun-yan ki anba dominasyon so Rwayonm fè ?

SA OU POUVÉ TRAPÉ OSI

Gadé sa Jézi di asou koté rwayonm Bondjé-a fika.

« Ès rwayonm Bondjé-a a roun bagaj ki annan nou tchò ? » (artik jw.org)

Poukisa Témwen Jéova-ya ka pansé ki sa pi enpòrtan rété fidèl douvan rwayonm Bondjé-a pasé rété fidèl douvan gouvèrnman imen-yan ?

Yé montré ki yé té chwazi rwayonm Bondjé-a (1:43)

Gadé sa Labib-a ka di asou 144 000 moun-yan Jéova chwazi pou dirijé ké Jézi.

« Kimoun ka alé viv annan syèl-a ? » (artik jw.org)

Gadé sa ki idé roun madanm ki té lajòl krè ki a Bondjé sèlman ki pouvé mété roun monn koté i gen jistis.

« J’ai découvert la solution à l’injustice » (Réveillez-vous !, novanm 2011)

Rwayonm Bondjé koumansé dirijé annan syèl-a an 1914. Dipi sa lannen-an, gouvèrnman imen-yan annan yé dèrnyé jou-ya. Kouman nou savé sa ? Nou ké wè profési Labib-a asou sa é nou ké palé di sa ki ka pasé asou latè-a dipi lannen 1914.

1. Kisa profési Labib-a ka di ?

Liv Danyèl-a ka idé nou konprann ki rwayonm Bondjé-a té ké koumansé dirijé a lafen di roun lépòk yé ka aplé « sèt tan » (Daniel 4:16, 17). Plizyèr syèk pita, Jézi aplé sa lépòk-a « tan yé bay nasyon-yan », é i di ki sa sèt tan-yan patékò fini (Luc 21:24). Sèt tan-yan fini an 1914.

2. Kisa ki ka pasé asou latè-a dipi 1914 ?

Disip Jézi-ya doumandé l’ : « Kitan sa bagaj-ya ké fèt é ki sign ké montré to prézans ké dèrnyé moman sa monn-an ? » (Matthieu 24:3). Annan répons i bay, Jézi di ki lò i té ké Rwa rwayonm Bondjé-a annan syèl-a, bokou bagaj té ké rivé asou latè-a. Annan sa bagaj-ya i té ké gen lagèr, lafamin ké tranblémandétèr (li Matthieu 24:7). Labib-a té di osi kouman moun-yan té ké fika annan « dèrnyé jou-ya » é ki, akoz di sa, lavi-a té ké « difisil pou sipòrté » (2 Timothée 3:1-5). Dipi 1914, sa bagaj-ya ka rivé plizanpli.

3. Poukisa monn-an ka divini plizanpli mové dipi rwayonm Bondjé-a koumansé dirijé ?

Roun ti tan apré Jézi divini Rwa rwayonm Bondjé-a, roun lagèr pété annan syèl-a kont Satan ké démon-yan. Satan pédi lagèr-a. Labib-a ka di ki « yé jité l’ asou latè-a é yé jité so zanj ansanm ké li » (Révélation 12:9, 10, 12). Satan kòlè menm, pas i savé yé ké détrwi l’. A pou sa i ka mennen bokou malò ké soufrans asou tout latè-a. A pa pou anyen tout bagaj k’alé mal ! Mé rwayonm Bondjé-a ké fini ké tout sa problèm-yan.

ANNOU FOUYÉ ANNAN LABIB-A

4. Profési Labib-a ki ka montré ki rwayonm Bondjé-a koumansé dirijé an 1914

VIDÉYO : Rwayonm Bondjé-a koumansé dirijé an 1914 (5:02)

Nabikodonozòr, rwa Babilòn tan-lontan-an, fè roun rèv ki té ka vini di Bondjé. Annan sa rèv-a, Jéova montré l’ kisa ki té ké rivé pita. Danyèl èspliké kisa sa rèv-a té lé di. Rèv-a té ka palé di Nabikodonozòr ké rwayonm Bondjé-aa (gadé nòt-a) (li Daniel 4:17).

Li Daniel 4:20-26, épi gadé tablo-a pou réponn sa késyon-yan :

• A) Kisa Nabikodonozòr wè annan so rèv ? (gadé vèrsé 20 ké 21).

• B) Kisa ki rivé ké pyébwa-a ? (gadé vèrsé 23).

• C) Kisa ki rivé a lafen « sèt tan »-yan ? (gadé vèrsé 26).

Pyébwa-a ké rwayonm Bondjé-a

PROFÉSI-A (Daniel 4:20-36)

Rwa-a

A) Roun gran pyébwa

Rwa-a ka arété dirijé

B) « Koupé pyébwa-a » épi lésé pasé « sèt tan »

Rwa-a viré annan so rwayonm

C) « Yé ké roubay to to rwayonm »

Annan prémyé fason sa profési-a réyalizé...

• D) Pyébwa-a ka réprézanté kimoun ? (gadé vèrsé 22).

• E) Kitan rwa-a arété dirijé so rwayonm ? (li Daniel 4:29-33).

• F) Kisa ki rivé Nabikodonozòr a lafen « sèt tan »-yan ? (li Daniel 4:34-36).

PRÉMYÉ FASON SA PROFÉSI-A RÉYALIZÉ

Rwa-a

D) Nabikodonozòr, rwa Babilòn

Rwa-a ka arété dirijé

E) Apré 606 anvan nou lépòk, Nabikodonozòr divini fou é i pa té kapab dirijé so rwayonm pannan sèt lannen

Rwa-a viré annan so rwayonm

F) Nabikodonozòr roudivini nòrmal é i roudivini rwa

Annan dézyèm fason sa profési-a réyalizé...

• G) Pyébwa-a ka réprézanté kimoun ? (li 1 Chroniques 29:23).

• H) Kitan yé arété dirijé ? Kouman nou savé ki i toujou pa té gen rwa ka dirijé lò Jézi vini asou latè-a ? (li Luc 21:24).

• I) Kitan ké ki koté rwayonm-an roukoumansé dirijé ?

DÉZYÈM FASON SA PROFÉSI-A RÉYALIZÉ

Rwa-a

G) Rwa Israyèl-ya ka réprézanté gouvèrnman Bondjé

Rwa-a ka arété dirijé

H) Yé détrwi Jérizalèm, é rwa Israyèl-ya arété dirijé yé rwayonm pannan 2 520 lannen

Rwa-a viré annan so rwayonm

I) Jézi divini Rwa rwayonm Bondjé-a annan syèl-a

5. Monn-an chanjé dipi 1914

Gadé VIDÉYO-a.

VIDÉYO : Monn-an chanjé dipi 1914 (1:10)

Jézi té di annan ki léta monn-an té ké fika lò i té ké divini Rwa. Li Luc 21:9-11, épi kozé asou sa késyon-an :

• Kilès di sa bagaj-ya ki annan vèrsé-ya ou ka wè jòdla ?

Apot Pòl-a té di kouman moun-yan té ké fika pannan dèrnyé jou-ya di dominasyon imen-yan. Li 2 Timothée 3:1-5, épi kozé asou sa késyon-an :

• Ès ou ka pansé ki moun-yan ka aji konsa jòdla ?

6. Nou lé soutni rwayonm Bondjé-a

Li Matthieu 24:3, 14, épi kozé asou sa késyon-yan :

• Ki travay enpòrtan ka montré ki rwayonm Bondjé-a ja ka dirijé ?

• Kouman ou pouvé partisipé annan sa travay-a ?

Rwayonm Bondjé-a ja ka dirijé, é jou-a i ké dirijé tout latè-a tou pròch rivé. Li Hébreux 10:24, 25, épi kozé asou sa késyon-an :

• Kisa nou tout divèt fè pi nou ka « wè jou-a ka rivé » ?

SA NOU WÈ

Profési Labib-a ké tousa ki ka pasé annan monn-an ka montré ki rwayonm Bondjé-a ja ka dirijé. Nou ka montré ki nou sir di sa lò nou ka préché é lò nou ka alé annan réinyon-yan.

Kisa ou anprann

• Liv Danyèl-a ka palé di sèt tan-yan. Kisa ki rivé a lafen di sa sèt tan-yan ?

• Poukisa ou sir ki rwayonm Bondjé-a koumansé dirijé an 1914 ?

• Kouman ou pouvé montré ki ou ka krè ki rwayonm Bondjé-a ja ka dirijé ?

SA OU POUVÉ TRAPÉ OSI

Gadé sa istoryen-yan ké ròt èspésyalis ka di asou sa ki rivé annan monn-an dipi 1914.

« Depuis quand ce déclin brutal ? » (Réveillez-vous !, avril 2007)

Gadé kouman profési Matthieu 24:14 chanjé lavi roun mouché.

« J’aimais le baseball plus que tout au monde ! » (La Tour de Garde n^o 3 2017)

Kouman nou savé ki profési Danyèl annan chapit 4 ka palé di rwayonm Bondjé-a ?

« Quand le Royaume de Dieu a-​t-il commencé à régner ? (1^re partie) » (La Tour de Garde, 1^é òktòb 2014)

Kouman nou savé ki « sèt tan »-yan annan Daniel chapit 4 fini an 1914 ?

« Quand le Royaume de Dieu a-​t-il commencé à régner ? (2^e partie) » (La Tour de Garde, 1^é novanm 2014)

Rwayonm Bondjé-a ja ka dirijé annan syèl-a. Titalò, i ké chanjé bokou bagaj asou latè-a. Nou ké wè déztrwa bon bagaj ki Rwayonm-an ké poté.

1. Kouman rwayonm Bondjé-a ké poté lapè ké lajistis asou latè-a ?

Jézi, Rwa rwayonm Bondjé-a, ké détrwi moun-yan ké gouvèrnman méchan-yan pannan lagèr Armagédon (Révélation 16:14, 16). Lò sa ké rivé, sa promès Labib-a ké réyalizé : « Roun ti moso tan ankò, é moun méchan pa ké la ankò » (Psaume 37:10). Gras a rwayonm Bondjé-a, Jézi ké poté lapè ké lajistis asou tout latè-a (li Isaïe 11:4).

2. Kouman nou ké viv lò volonté Bondjé ké fèt asou latè-a ?

Imajiné ou ka viv annan roun monn koté tout moun ka fè sa ki bon é sa ki jis ! Tout moun kontan Jéova ké yé konpanyen. A konsa nou ké viv annan rwayonm Bondjé-a paské « moun ki jis ké gen latè-a, é yé ké viv asou l’ pou tout-tan » (Psaume 37:29). Pésonn pa ké malad ankò, é nou ké viv pou tout-tan.

3. Kisa Rwayonm-an ké poté lò tout méchan-yan ké détrwi ?

Apré i détrwi méchan-yan, Jézi ké dirijé ankò pannan 1 000 lannen. Pannan sa lépòk-a, li ké 144 000-ya, ké idé moun-yan asou latè-a divini parfè. A lafen di 1 000 lannen-yan, latè-a ké divini roun bèl paradi é tout moun ké gen tchò kontan paské yé ké obéyi lalwa Bondjé-a. A sa moman-an, Jézi ké roubay Rwayonm-an pou so Papa. Non Jéova ké « sanktifyé » kou i pa janmen fèt anvan (Matthieu 6:9, 10). Nou ké byen wè ki Jéova sa roun bon chèf ki ka pran swen di nou. Apré sa, Jéova ké kayakaya Satan, démon-yan é tout sa-ya ki ka chwazi tounen yé do bay so dominasyon (Révélation 20:7-10). Gras a rwayonm Bondjé-a, lavi-a ké parfè pou tout-tan.

ANNOU FOUYÉ ANNAN LABIB-A

4. Rwayonm Bondjé-a ké détrwi gouvèrnman imen-yan

Labib-a ka di ki « moun ka dominé moun pou yé malò » (Ecclésiaste 8:9). Jéova ké itilizé so rwayonm pou fini ké tout bagaj ki pa jis.

Li Daniel 2:44 ké 2 Thessaloniciens 1:6-8, épi kozé asou sa késyon-yan :

• Kisa Jéova ké Jézi ké fè ké gouvèrnman imen-yan é sa-ya ki ka soutni sa gouvèrnman-yan ?

• Lò ou ka sonjé tousa ou ja anprann asou Jéova ké Jézi, poukisa ou pouvé sir ki yé ké jijé moun-yan di roun fason ki jis ?

5. Jézi a roun Rwa parfè

Jézi ké fè bokou bagaj pou idé moun-yan asou latè-a. Gadé VIDÉYO-a. Sa vidéyo-a ké montré ki Jézi lé idé moun-yan, mé osi ki Bondjé bay li pouvwar pou fè sa.

VIDÉYO : Jézi montré kisa Rwayonm-an ké fè (1:13)

Lò i té asou latè-a, Jézi montré sa Rwayonm-an ké fè. Annan tablo-a, ki promès ou présé wè Jézi réyalizé ? Li vèrsé biblik-ya ki ka palé di sa promès-ya.

6. Gras a rwayonm Bondjé-a lavi-a ké bèl toubonnman

VIDÉYO : Roun koutwéy asou bèl lavi-a nou ké gen (4:38)

Li Psaume 145:16, épi kozé asou sa késyon-an :

• Kisa ou ka rousanti lò ou ka li ki Jéova ké « bay tout sa ki vivan sa yé lé » ?

SA NOU WÈ

Rwayonm-an ké réyalizé sa Bondjé lé i réyalizé. I ké fè latè-a divini roun paradi koté sa-ya ki ka adoré Jéova ké viv pou tout-tan.

Kisa ou anprann

• Kouman rwayonm Bondjé-a ké sanktifyé non Jéova ?

• Poukisa nou pouvé krè ki rwayonm Bondjé-a ké réyalizé promès-ya ki annan Labib-a ?

• Annan tout bèl bagaj-ya Rwayonm-an ké fè, kilès ou présé wè réyalizé ?

SA OU POUVÉ TRAPÉ OSI

Anprann a kisa ki Armagédon.

« Lagèr Armagédon, a kisa ? » (artik jw.org)

Gadé sa ki ké rivé pannan « gran tribilasyon »-an (Matthieu 24:21).

« A kisa ki gran tribilasyon-an » (artik jw.org)

Gadé kouman roun fanmi ka imajiné yé kò annan paradi-a.

Imajiné to kò annan paradi-a (1:50)

Annan artik-a « J’étais tourmenté par de nombreuses questions », gadé kouman roun mouché ki té ka briga kont lapolitik trapé répons asou késyon-yan i té gen.

« La Bible transforme des vies » (La Tour de Garde, 1^é janvyé 2012)