Lò ou ka batizé ou ka rousouvwè patché bénédiksyon !

Jézi di ki krétyen-yan divèt batizé yé kò (li Matthieu 28:19, 20). Mé a kisa batenm-an ? É kisa roun moun divèt fè pou i batizé ?

1. A kisa batenm-an ?

« Batizé » ka vini di roun mo grèk ki lé di « plonjé ». A sa ki rivé Jézi lò yé batizé l’ annan larivyè Jourden ; tout so kò té anba dlo-a. Nou savé sa paské apré i batizé « i soti anba dlo-a » (Marc 1:9, 10). Kou Jézi, lò vré krétyen-yan ka batizé, tout yé kò anba dlo-a.

2. Kisa roun moun ka montré lò i ka batizé ?

Lò i ka batizé, roun moun ka montré i vouwé so lavi pou Jéova. Kouman i ka vouwé so lavi pou Bondjé ? Anvan i batizé, i ka priyè Jéova pou di li ki i lé sèrvi li pou toujou. I ka promèt ki a Jéova rounso i ké adoré é ki bagaj-a ki ké pi enpòrtan annan so lavi, a fè volonté Jéova. I ka désidé ‘arété viv pou li menm é kontinyé swiv’ ansèyman-yan ké èkzanp Jézi (Matthieu 16:24). Lò roun moun ka vouwé so lavi pou Bondjé é ka batizé, i pouvé gen roun lanmityé ki fò ké Jéova é ké sa-ya ki ka adoré Jéova osi.

3. Kisa roun moun divèt fè pou i batizé ?

Anvan ou batizé, sa enpòrtan ou anprann konnèt Jéova é gen roun lafwa ki fò annan li (li Hébreux 11:6). Pi ou ké gen konésans asou Jéova ké lafwa annan li, pi ou ké gen lanmou pou Jéova. Apré sa, asiré pa pitèt ou ké anvi préché é mennen roun lavi ki ka alé ké sa Jéova ka doumandé fè (2 Timothée 4:2 ; 1 Jean 5:3) Souvan, lò roun moun « gen roun kondwit kou Jéova ka doumandé pou fè li plézi », sa moun-an anvi vouwé so lavi pou Bondjé é fè so kò batizéa (gadé nòt-a) (Colossiens 1:9, 10).

ANNOU FOUYÉ ANNAN LABIB-A

4. Nou ka anprann bokou bagaj ké batenm Jézi

Li Matthieu 3:13-17 pou anprann plis bagaj asou batenm Jézi. Épi kozé asou sa késyon-yan :

• Ès Jézi té sa roun bébé lò i batizé ?

• Kouman yé batizé l’ ? Ès a té jis ké roun tibi dlo asou so tèt ?

Apré i batizé, Jézi koumansé travay èspésyal-a Bondjé té bay li pou fè. Li Luc 3:21-23 ké Jean 6:38, épi kozé asou sa késyon-an :

• Apré Jézi batizé, ki travay i té ka mété an prémyé annan so lavi ?

5. Ou pouvé rivé pran batenm-an

Pitèt ki vouwé ou lavi pou Jéova ké batizé ou kò ka fè ou pè. Mé pi ou ké anprann konnèt Jéova ké fè sa i ka doumandé, pi ou ké anvi pran sa désizyon-an ki enpòrtan. Annou wè èkzanp moun ki fè sa. Gadé VIDÉYO-a.

VIDÉYO : Kouman nou pouvé fè nou lanmityé ké Jéova vin pi fò ? (1:11)

Li Jean 17:3 ké Jacques 1:5, épi kozé asou sa késyon-an :

• Kisa ki pouvé idé roun moun préparé so kò pou batenm-an ?

1. Nou ka vouwé nou lavi pou Jéova lò nou ka di li ki nou lé sèrvi li pou toujou.

2. Lò nou ka batizé nou kò, nou ka montré moun-yan ki nou vouwé nou lavi pou Bondjé.

6. A lò nou ka batizé ki nou ka fè parti di fanmi Jéova

Lò nou ka batizé, nou ka koumansé fè parti di roun fanmi ki ka travay ansanm asou tout latè-a. Kèlkanswa koté nou ka rété ouben nou kiltir, nou tout gen menm krwayans-ya é ka obéyi menm koumannman-yan ki annan Labib-a. Li Proverbes 3:32 ké 1 Pierre 2:17, épi kozé asou sa késyon-an :

• Apré roun moun batizé, ki kalité lanmityé i gen ké Jéova é ké ròt sèrvitèr Bondjé ?

SA NOU WÈ

Jézi anprann ki krétyen-yan divèt batizé yé kò. Pou fè sa, roun moun divèt gen roun lafwa ki fò annan Jéova, mennen roun lavi ki ka fè Bondjé plézi ké vouwé so lavi pou li.

Kisa ou anprann

• A kisa batenm-an, é poukisa sa enpòrtan ?

• Kisa nou ka montré lò nou ka batizé ?

• Kisa roun moun divèt fè anvan i vouwé so lavi pou Jéova ké batizé so kò ?

SA OU POUVÉ TRAPÉ OSI

Gadé ki ròt bagaj ou pouvé anprann asou batenm-an.

« A kisa batenm-an ? » (artik jw.org)

Kèk konsèy pou ou vansé jistan ou batizé.

« L’amour et la reconnaissance pour Jéhovah mènent au baptême » (La Tour de Garde, mars 2020)

Roun mouché konprann ki i pa té divèt désidé batizé so kò dapré sa i té ka rousanti rounso.

« Ils voulaient que je découvre la vérité par moi-même » (La Tour de Garde, 1^é févriyé 2013)

Poukisa batizé so kò a roun bon bagaj pou fè ? Kouman ou pouvé préparé ou kò pou fè sa ?

« Devrais-je me faire baptiser ? » (Les jeunes s’interrogent. Réponses pratiques [volume 2], chapit 37)