Poukisa nou bézwen vouwé nou lavi pou Jéova é batizé ?

Vouwé so lavi pou Jéova, a promèt li annan roun lapriyè ki a li rounso nou ké adoré é ki nou ké fè sa i ka doumandé nou anvan tout bagaj annan nou lavi (Psaume 40:8). Apré sa, nou ka batizé pou montré tout moun ki nou vouwé nou lavi pou Bondjé. I pa gen bagaj ki pi enpòrtan ki lò nou ka désidé vouwé nou lavi pou Jéova. Kisa ki pouvé pousé ou pran sa désizyon-an ?

1. Kisa ki ka pousé roun moun vouwé so lavi pou Bondjé ?

A lanmou ki ka pousé roun moun vouwé so lavi pou Jéova (1 Jean 4:10, 19). Labib-a ka di : « To divèt kontan Jéova to Bondjé ké tout to tchò, ké tout to nanm, ké tout to pansé épi ké tout to fòrs » (Marc 12:30). Nou ka montré ki nou kontan Bondjé annan sa nou ka di mé osi annan sa nou ka fè. Parèkzanp, lò roun mouché ké roun madanm kontan yé konpanyen, yé ka désidé maryé. Menm fason-an, lanmou nou gen pou Jéova ka pousé nou vouwé nou lavi pou li é batizé.

2. Ki bénédiksyon roun moun ka jwenn lò i ka batizé ?

Lò ou ké batizé, ou ké koumansé fè parti di fanmi Jéova. A la ou ké wè Jéova montré ou so lanmou diféran fason, é sa ké fè ou lanmityé ké li vin pi fò ankò (li Malachie 3:16-18). Jéova ké divini ou Papa, é ou ké ganyen frè ké sò asou tout latè-a ki kontan Jéova é ki kontan ou osi (li Marc 10:29, 30). Kou nou ja wè l’, i gen déztrwa bagaj pou fè anvan batenm-an. Pou koumansé ou divèt anprann konnèt Jéova, kontan l’ épi gen lafwa annan so Pitit. Apré sa, ou divèt vouwé ou lavi pou Jéova. Lò ou ké fè tout sa bagaj-ya é lò ou ké batizé, ou ké asou chimen lavi pou tout-tan-an. Paròl Bondjé-a ka di : « Batenm-an ka sové zòt » (1 Pierre 3:21).

ANNOU FOUYÉ ANNAN LABIB-A

3. Nou tout nou divèt chwazi kimoun nou ké adoré

Tan-lontan, sèrten Israyélit té ka pansé ki yé té pouvé adoré Jéova an menm tan ki Baal, roun fo bondjé. Mé Jéova voyé so profèt Éli pou di yé ki fason yé ta ka pansé-a pa té bon menm. Li 1 Rois 18:21, épi kozé asou sa késyon-an :

• Ki désizyon Israyélit-ya té divèt pran ?

Kou Israyélit-ya, nou divèt chwazi kimoun nou ké sèrvi. Li Luc 16:13, épi kozé asou sa késyon-yan :

• I gen moun ki ka krè ki nou pouvé adoré Jéova an menm tan ki rounòt moun ouben rounòt bagaj. Poukisa sa pa posib menm ?

• Kouman nou ka montré Jéova ki nou chwazi adoré l’ ?

4. Réfléchi asou lanmou Jéova gen pou ou

Jéova bay nou roun patché kado ki gen bokou valò. É nou menm, kisa nou pouvé bay li ? Gadé VIDÉYO-a.

VIDÉYO : Annou bay Jéova kado (3:04)

Kouman Jéova montré i kontan ou ? Li Psaume 104:14, 15 ké 1 Jean 4:9, 10, épi kozé asou sa késyon-yan :

• Annan tout kado Jéova bay ou, kilès ou pi kontan ?

• Kisa ou ka rousanti pou Jéova lò ou ka réfléchi asou sa kado-ya ?

Lò roun moun ka bay nou roun kado ki nou vréman kontan, sa ka bay nou anvi montré sa moun-an ki so kado fè nou plézi. Li Deutéronome 16:17, épi kozé asou sa késyon-an :

• Lò ou ka réfléchi asou tousa Jéova fè pou ou, kisa ou anvi bay li ?

5. Vouwé so lavi pou Jéova ka bay nou roun patché bénédiksyon

VIDÉYO : Jwé foutbol, a té bagaj-a ki té pi enpòrtan annan mo lavi (5:45)

• Menm si Andreï té kontan foutbol, poukisa i arété jwé ?

• Pasé i bay so lavi pou foutbol-a, i désidé vouwé so lavi pou Jéova. Ès a té roun bon désizyon ? Poukisa ?

Anvan i divini krétyen, apot Pòl té étidyé lalwa jwif-ya ké roun gran profésò. Mé i lésé sa tonbé pou divini krétyen. Ès i rigrété sa désizyon-an ? Li Philippiens 3:8, épi kozé asou sa késyon-yan :

• Poukisa apot Pòl di ki tousa i té fè anvan i divini krétyen té kou « roun patché briyé » ?

• Kisa Pòl ganyen apré i anbandonnen tousa i té ka fè anvan i divini krétyen ?

• Ès ou ka pansé ki ou ké gen plis tchò kontan si ou ka chwazi sèrvi Jéova ? Poukisa ou ka di sa ?

SA NOU WÈ

Lanmou nou gen pou Jéova ka pousé nou vouwé nou lavi pou li é batizé.

Kisa ou anprann

• Poukisa Jéova mérité nou kontan l’ ké adoré l’ ké tout nou tchò ?

• Kouman Jéova béni so sèrvitèr-ya ki batizé ?

• Ès ou anvi vouwé ou lavi pou Jéova ?

SA OU POUVÉ TRAPÉ OSI

Poukisa roun madanm ki té ka chanté é roun mouché ki té ka fè èspòr profésionèl chwazi vouwé yé lavi pou Jéova ?

Jennjan-yan ka pozé yé kò késyon... Kisa mo ké fè di mo lavi ? – Yé ka sonjé (6:54)

Gadé ròt rézon pou vouwé ou lavi pou Jéova.

« Pourquoi se vouer à Jéhovah ? » (La Tour de Garde, 15 janvyé 2010)

Gadé roun vidéyo ki ka montré lajwa sa-ya ki ka vouwé yé lavi pou Jéova gen.

Je veux t’offrir ma vie (4:30)

Gadé kouman Labib-a chanjé lavi roun madanm (istwè mo lavi : « Pendant des années, je me suis demandé pourquoi on existe »).

« La Bible transforme des vies » (La Tour de Garde, 1^é novanm 2012)