LÉSON 41
Kisa Labib-a ka di asou sèksyalité-a ?
Bokou moun jennen lò a pou palé di sèksyalité. Mé Labib-a pa ka séré anyen, é i ka palé di sa ké bokou rèspè. Sa i ka di asou sèksyalité-a, a pou nou byen. Sa nòrmal paské a Jéova ki kréyé nou. Atò, i savé sa ki miyò pou nou. Lò nou ka swiv sa i ka di nou asou sèksyalité-a, nou ka bay Jéova lònò é sa ka bay nou èspwar viv pou tout-tan.
1. Kouman Jéova ka wè sèksyalité-a ?
Gras a sa kado-a, roun mouché ké roun madanm ki maryé ansanm pouvé gen timoun é yé pouvé osi montré lanmou yé gen roun pou ròt. Labib-a ka di : « Pran plézi ké madanm-an to gen dipi to jenn » (Proverbes 5:18, 19). Jéova lé ki mouché ké madanm rété fidèl roun ké ròt, a pou sa roun krétyen ki maryé pa janmen divèt alé wè dèrò (li Hébreux 13:4).
2. A kisa ki imoralité sèksyèl ?
Labib-a ka di « sa-ya ki gen mové kondwit sèksyèl [...] pa ké érité rwayonm Bondjé-a » (1 Corinthiens 6:9, 10). Pou palé di « imoralité sèksyèl-a », sa-ya ki ékri Labib-a itilizé roun mo grèk : pornéïa. Sa mo-a ka sèrvi pou palé di 1) rélasyon sèksyèla ant moun ki pa maryé (gadé nòt-a), 2) wonm ka kouché ké wonm ouben fanm ka kouché ké fanm é 3) moun ka kouché ké zannimo. Lò nou pa ka fè « pyès bagaj sèksyèl malpròp », nou ka jwenn bénédiksyon épi nou ka fè Jéova plézi (1 Thessaloniciens 4:3).
ANNOU FOUYÉ ANNAN LABIB-A
Annou wè kouman ou pouvé rété pròp annan zafè sèksyalité-a é ki bon bagaj sa ka poté pou ou.
3. Pran kouri pou tout mové kondwit sèksyèl
Jozèf, roun jennjan ki té kontan Bondjé, briga pou rété pròp annan zafè sèksyalité-a. Li Genèse 39:1-12, épi kozé asou sa késyon-yan :
Poukisa Jozèf pran kouri ? (gadé vèrsé 9-a).
Ès ou ka pansé Jozèf pran roun bon désizyon ? Poukisa ?
Kouman jennjan-yan pouvé imité Jozèf épi pran kouri pou tout mové kondwit sèksyèl ? Gadé VIDÉYO-a.
Jéova lé ki so sèrvitèr rété pròp. Li 1 Corinthiens 6:18, épi kozé asou sa késyon-yan :
Ki sitiasyon pouvé fè roun moun fè roun bagaj sèksyèl malpròp ?
Kouman ou pouvé pran kouri pou tout mové kondwit sèksyèl ?
4. Ou pouvé tchenbé rèd anba tantasyon-an
Lò i gen roun tantasyon pou fè roun bagaj sèksyèl malpròp, a pou nou fè éfòr pou tchenbé rèd. Kisa ki pouvé randé sa pi difisil ankò ? Gadé VIDÉYO-a, épi kozé asou sa késyon-an :
Kisa roun frè fè lò i konprann ki so konpòrtman té ké pouvé fè li tronpé so madanm ?
Détan, menm roun moun ki kontan Bondjé divèt briga pou tiré di so tèt lidé ki malpròp. Kisa ki pouvé idé ou pa rété réfléchi asou bagaj malpròp ? Li Philippiens 4:8, épi kozé asou sa késyon-yan :
Asou ki kalité bagaj nou divèt réfléchi ?
Poukisa, lò nou ka li Labib-a é lò nou byen okipé annan nou sèrvis pou Jéova, sa ka idé nou tchenbé rèd anba tantasyon ?
5. Règ-ya Jéova mété, a pou nou byen
Jéova savé sa ki miyò pou nou. I ka èspliké nou kisa nou divèt fè pou rété pròp annan domenn moral é ki bénédiksyon nou ké gen si nou ka swiv sa i ka doumandé nou. Li Proverbes 7:7-27 ouben gadé VIDÉYO-a, épi kozé asou sa késyon-yan :
Kouman jennjan-an fè pou mété so kò annan roun sitiasyon ki té ké tanté l’ ? (gadé Proverbes 7:8, 9).
Dapré Proverbes 7:23, 26, imoralité sèksyèl pouvé gen konsékans ki grav. Si nou ka rété pròp annan domenn moral, ki problèm nou pa ké gen ?
Si nou ka rété pròp annan domenn moral, kouman sa ké idé nou viv pou tout-tan ?
I gen moun ka pansé i pa gen lanmou annan sa Labib-a ka di asou wonm ka kouché ké wonm épi asou fanm ka kouché ké fanm. Mé Jéova a roun Bondjé ki plen ké lanmou é i lé tout moun viv ké tchò kontan pou tout-tan. Mé pou sa, nou divèt swiv so règ. Li 1 Corinthiens 6:9-11, épi kozé asou sa késyon-an :
Zafè wonm ka kouché ké wonm épi fanm ka kouché ké fanm, ès a sèl bagaj Bondjé rayi ?
Pou fè Bondjé plézi, nou tout divèt fè chanjman. Ès sa ka vo lapenn ? Li Psaume 19:8, 11, épi kozé asou sa késyon-yan :
Règ-ya Jéova mété annan domenn moral, ès ou ka pansé yé rézonab ? Poukisa ou ka di sa ?
Jéova pouvé idé ou chanjé kou i ja fè l’ pou bokou moun.
I GEN MOUN KA DI : « Lò dé moun ki kontan yé konpanyen ka kouché ansanm, i pa gen anyen annan sa. »
É ou menm, kisa ou té ké di ?
SA NOU WÈ
Rélasyon sèksyèl, a roun kado Jéova fè pou roun wonm ké roun madanm ki maryé ansanm.
Kisa ou anprann
Dapré Labib-a, a kisa roun mové kondwit sèksyèl ?
Kisa ki ké idé nou pa fè pyès bagaj sèksyèl malpròp ?
Ki bénédiksyon nou gen lò nou ka swiv règ Jéova annan domenn moral ?
SA OU POUVÉ TRAPÉ OSI
Gadé poukisa Bondjé lé roun mouché ké roun madanm maryé pou yé viv ansanm.
« Kisa Labib-a ka di si dé moun ka viv ansanm san yé pa maryé ? » (artik jw.org)
Labib-a ka di ki zafè wonm ka kouché ké wonm épi fanm ka kouché ké fanm, a roun mové bagaj. Ès sa lé di ki nou divèt rayi moun-yan ki ka fè sa ?
« Wonm ka kouché ké wonm, fanm ka kouché ké fanm : ès a roun mové bagaj ? » (artik jw.org)
Poukisa lalwa Bondjé asou sèksyalité-a ka protéjé nou ?
« Lò moun ka fè bagaj sèksyèl ké so bouch, ès a vréman rélasyon sèksyèl ? » (artik jw.org)
Sa ki idé roun wonm ki té ka fè bagaj sèksyèl ké wonm chanjé fason i té ka viv-a (istwè mo lavi : « Ils ont respecté ma dignité »).
« La Bible transforme des vies » (La Tour de Garde, 1é avril 2011)
a Nòt-a : Bagaj sèksyèl ké ou bouch, bagaj sèksyèl annan ou dèryè épi lò ou ka karésé sèks roun moun, sa osi sa ka fè parti di rélasyon sèksyèl malpròp.