Kisa Labib-a ka di asou zafè bwè alkòl ?

Toupatou asou latè-a, chak moun gen yépa lidé asou alkòl-a. I gen sa-ya ki kontan bwè détan lò yé ké yé zanmi. I gen roun ran ki désidé pa bwè menm. É i gen ròt, a bwè pou sou. Kisa Labib-a ka di asou alkòl-a ?

1. Ès bwè alkòl a roun bagaj ki pa bon ?

Labib-a pa ka entèrdi bwè alkòl. I jis ka di ki ‘diven-an ki ka fè tchò moun kontan’, a roun kado kou tout ròt kado Bondjé bay nou (Psaume 104:14, 15). Annan Labib-a, i gen wonm ké fanm fidèl ki té ka bwè alkòl (1 Timothée 5:23).

2. Ki konsèy Labib-a ka bay sa-ya ki chwazi bwè alkòl ?

Jéova ka défann nou bwè tròp ké bwè pou sou (Galates 5:21). Labib-a ka di : ‘Pa rété ké sa-ya ki ka bwè tròp diven’ (Proverbes 23:20). A pou sa, si nou désidé bwè nou pa divèt bwè tròp, menm lò nou tousèl. Si nou ka bwè tròp, nou lidé pa ké klè é nou pa ké rivé kontrolé sa nou ka di ké sa nou ka fè. É sa pa bon pou nou lasanté. Si nou pa pouvé kontrolé kantité alkòl nou ka bwè, a pou nou paré arété bwè épi fin ké sa menm.

3. Kouman nou pouvé rèspèkté désizyon ròt-ya ?

Chak moun ké désidé pou so kò si i ké bwè ouben si i pa ké bwè. Nou pa divèt jijé roun moun ki désidé bwè roun tibi. É nou pa divèt blijé roun moun bwè si i pa lé (Romains 14:10). Si sa ka jennen ròt-ya, nou ké désidé pa bwè (li Romains 14:21). Nou ka chaché « sa ki pi bon pou ròt-a, pa sa ki bon pou [nou] » (li 1 Corinthiens 10:23, 24).

ANNOU FOUYÉ ANNAN LABIB-A

4. A pou ou désidé si ou ké bwè ouben si ou pa ké bwè

Kisa Jézi té ka pansé asou zafè bwè alkòl ? Prémyé mirak Jézi té fè ka idé nou trapé répons-a. Li Jean 2:1-11, épi kozé asou sa késyon-yan :

• Kouman sa mirak-a ka idé nou wè sa Jézi ka pansé asou alkòl-a é sa i ka pansé asou sa-ya ki ka désidé bwè alkòl ?

• Jézi pa entèrdi nou bwè alkòl, atò, kisa roun krétyen divèt pansé asou roun moun ki ka désidé bwè ?

A pa paské roun krétyen pouvé bwè ki sa lé di ki a toujou pi bon bagaj-a pou i fè. Li Proverbes 22:3. Épi pou chak sitiasyon ki ka swiv, réfléchi asou kouman sa prensip-a pouvé idé ou pran pi bon désizyon :

• Ou ké kondwi roun loto ouben ou ké travay ké roun machin.

• Ou ansent.

• Roun dòktèr di ou pa bwè alkòl.

• Ou pa ka rivé kontrolé kantité alkòl ou ka bwè.

• Lalwa pa ka pèrmèt ou bwè alkòl.

• Ou la ké roun moun ki désidé pa bwè paské anvan i té gen problèm ké alkòl-a.

Ès ou divèt sèrvi alkòl annan roun maryaj ouben lò ou ka kontré ké frè ké sò ? Kisa ki pouvé idé ou pran roun désizyon ? Gadé VIDÉYO-a.

VIDÉYO : Ès mo divèt sèrvi alkòl annan roun maryaj ? (2:41)

Li Romains 13:13 ké 1 Corinthiens 10:31, 32. Apré ou li chak vèrsé, kozé asou sa késyon-an :

• Kouman sa prensip-a pouvé idé ou pran roun désizyon ki ké fè tchò Jéova kontan ?

5. Désidé ki kantité alkòl ou ké bwè

Si ou désidé bwè alkòl, sonjé sa : Jéova pa ka entèrdi nou bwè alkòl mé i ka défann nou bwè tròp. Poukisa ? Li Osée 4:11, 18, épi kozé asou sa késyon-an :

• Kisa ki pouvé rivé lò roun moun ka bwè tròp ?

Kisa ki pouvé idé nou pa bwè tròp alkòl ? Nou divèt konnèt nou limit. Li Proverbes 11:2, épi kozé asou sa késyon-an :

• Poukisa a roun bon bagaj mété roun limit asou kantité alkòl ou ké bwè ?

6. Sa ki pouvé idé roun moun arété bwè tròp alkòl

VIDÉYO : « Mo pa té pouvé viv konsa ankò » (6:32)

• Annan vidéyo-a, kisa Dmitry té ka fè lò i té ka bwè alkòl ?

• Ès i té rivé arété bwè prémyé kou i té éséyé fè sa ?

• Kouman i rivé arété bwè tròp alkòl ?

Li 1 Corinthiens 6:10, 11, épi kozé asou sa késyon-yan :

• Lò roun moun ka bwè pou sou, ès a roun bagaj ki grav ?

• Kisa ki ka montré ki roun moun ki ka bwè tròp pouvé chanjé ?

Li Matthieu 5:30, épi kozé asou sa késyon-an :

• Lò Jézi té pran èkzanp roun moun ki ka koupé so lanmen, i té lé montré ki détan nou divèt fè sakrifis pou fè Jéova plézi. Kisa ou pouvé fè si ou ka briga pou arété bwè tròp alkòla ? (gadé nòt-a).

Li 1 Corinthiens 15:33, épi kozé asou sa késyon-an :

• Si ou gen zanmi ki ka bwè tròp kouman sa pouvé aji asou ou ?

SA NOU WÈ

Alkòl-a, a roun kado ki Jéova bay nou, mé i ka défann nou bwè tròp ké bwè pou sou.

Kisa ou anprann

• Kisa Labib-a ka di asou alkòl-a ?

• Poukisa sa danjéré lò roun moun ka bwè tròp ?

• Kouman nou pouvé rèspèkté chwa ròt-ya asou alkòl-a ?

SA OU POUVÉ TRAPÉ OSI

Kouman jennjan-yan pouvé pran bon désizyon asou zafè bwè alkòl ?

Bwè alkòl ou pa bwè : sonjé kisa sa ka poté ! (2:31)

Gadé sa ou pouvé fè si ou gen problèm ké alkòl-a.

« Quelle place l’alcool a-t-il dans votre vie ? » (La Tour de Garde, 1^é janvyé 2010)

És roun krétyen pouvé fè « Tchin-Tchin » ?

« Questions des lecteurs » (La Tour de Garde, 15 févryé 2007)

Gadé kisa ki idé roun tafyatò arété bwè tròp (istwè mo lavi : « J’étais une barrique sans fond »).

« La Bible transforme des vies » (La Tour de Garde, 1^é mé 2012)