Sa ou divèt fè pou viv annan monn nouvo-a

Artik-ya ki té anvan montré ki titalò Bondjé ké fini ké sa sistèm malonèt-a nou ka wè jòdla épi ké tout problèm i ka mennen. Nou pouvé sir ki sa ké fèt. Poukisa ? Paské Paròl Bondjé, Labib-a, ka promèt nou :

« A disparèt sa monn-an ka disparèt » (1 JEAN 2:17).

Nou pouvé sir i ké gen moun ki ké rété vivan paské sa menm vèrsé-a ka di osi :

« Sa-la ki ka fè volonté Bondjé ké viv pou tout-tan. »

Donk, sa-la ki lé rété vivan divèt fè volonté Bondjé. É pou savé a kisa ki volonté Bondjé, prémyé bagaj-a nou divèt fè, a anprann konnèt Bondjé li menm.

« ANPRANN KONNÈT BONDJÉ » POU RÉTÉ VIVAN

Séri zimaj : 1) Annan roun lopital, roun enfirmyèr djokoti a fòrs i las, é paské i gen bokou travay pou fè. 2) Pannan so poz, i ka wè annan kafétérya-a roun kolèg ki ka li roun journal ké plézi. 3) Sa kolèg-a ka li roun vèrsé annan Labib-a pou li é i ka bay li roun kart vizit jw.org.

Jézi di : « Men sa ki sa lavi pou tout-tan-an : a pou yé anprann konnèt to, to ki sa sèl vré Bondjé-a » (Jean 17:3). Donk, pou rété vivan lò lafen monn-an ké vini, nou divèt ‘anprann konnèt’ Bondjé. A pa yenki asèpté i ka èkzisté ouben konnèt déztrwa bagaj asou li. Nou divèt divini zanmi ké li. Lò nou anvi gen roun lanmityé ki solid ké roun moun, nou divèt pran tan pou sa moun-an. Ében, a menm bagaj-a nou divèt fè ké Bondjé. Nou divèt pran swen di nou lanmityé ké li. Atò, annou wè déztrwa lidé annan Labib-a ki vréman enpòrtan é ki ké idé nou gen roun lanmityé solid ké Bondjé.

Vérité ki annan Labib-a

Nou ka anprann ki Bondjé té lé nou viv annan roun paradi.

Bondjé kréyé prémyé imen-yan, Adan ké Èv, é i mété yé annan roun bèl koté yé ka aplé « jarden Édèn-an ». Yé té parfè, é Bondjé té bay yé tousa yé té bézwen pou yé té pouvé viv ké tchò kontan. Yé té pouvé gen lavi pou tout-tan. Paské, tout-tan yé té ké rété zanmi ké Bondjé, yé pa té ké janmen mouri. Mé yé chwazi dézobéyi é yé pa rèspèkté roun lòrd tou senp ki Bondjé té bay yé.

Nou ka anprann poukisa nou ka wè mizè jòdla.

Lò Adan dézobéyi, i pédi posibilité viv pou tout-tan ni pou li ni pou larèstan moun-yan ki té ké vini apré. Labib-a ka di : « A konsa, akoz di rounsèl wonm, péché-a antré annan monn-an é akoz di péché-a lanmò-a antré osi, é a konsa lanmò-a détenn asou tout wonm-yan paské yé tout té péché » (Romains 5:12). Menm fason roun papa ouben roun manman pouvé bay so timoun roun maladi, ében menm fason-an Adan bay tout so timoun so enpèrfeksyon. Rézilta pou nou jòdla : nou ka vin’ vyé épi nou ka mouri.

Nou ka anprann sa Bondjé ja fè pou idé moun-yan.

Labib-a ka di : « Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:16). Wi, Bondjé voyé Jézi asou latè-a pou i bay so lavi pou nou. Gadé sa Prabhakar, roun mouché ki gen 86 lannen é ki ka viv an End, ka di asou sa Bondjé fè pou montré so lanmou : « Sa ka montré mo ki Jéovaa kontan mo bokou. Gras a lanmou Bondjé, mo gen èspwar viv pou tout-tan. »

Nou ka anprann kouman montré nou rékonésans pou sa Bondjé fè pou nou.

Labib-a ka ansényé ki nou ka montré Bondjé nou gen rékonésans pou sa i fè pou nou ‘lò nou ka obéyi so koumannman’ (1 Jean 2:3). Bondjé Jéova ka montré nou so lanmou lò i ka di nou sa nou divèt fè pou nou viv ké tchò kontan dipi aprézan (Isaïe 48:17, 18). I pa kontan wè moun-yan ka soufri. I ka promèt nou ki, si nou ka swiv so konsèy, a pa jodla rounso nou ké viv ké tcho kontan. Mé nou ké pouvé viv ké tcho kontan pou tout-tan.

LI PARÒL BONDJÉ, LABIB-A, TOULÉJOU

Pannan i ka fè so poz pou manjé, enfirmyèr-a ka gadé syèl-a apré i soti li roun vèrsé annan Labib-a. — Pou ou rété vivan lò lafen sa monn-an ké vini, a pou ou priyè Bondjé pou idé ou aji roun fason i kontan.

Si nou pa ka manjé, nou pa pouvé viv. Kou dolo-a ka di : « Sak vid pa ka tchenbé dibout ». Mé Jézi di : « A pa dipen rounso moun bézwen pou yé viv, mé yé bézwen tout paròl ki ka soti annan bouch Jéova » (Matthieu 4:4).

Jòdla, Jéova ka palé pou nou annan Labib-a. Lò ou ké étidyé sa liv sakré-a, ou ké anprann vérité enpòrtan asou fason Jéova aji ké moun tan lontan, kouman i ka aji ké moun jòdla é kouman i ké aji ké moun-yan dimen.

PRIYÈ BONDJÉ POU I IDÉ OU

Kisa ou pouvé fè si ou lé swiv konsèy Bondjé mé ki ou pa ka rivé fini ké roun labitid ki Bondjé pa kontan ? Ében, a la ou ké wè ki lò ou konnèt Bondjé, sa pouvé vréman idé ou.

Roun madanm, ki nou ké aplé Sakoura, té ka mennen roun vyé lavi. Lò i koumansé étidyé Labib-a, i anprann koumannman Bondjé ki ka di : « Pran kouri pou tout mové kondwit sèksyèl » (1 Corinthiens 6:18). Atò, i priyè Bondjé é i doumandé l’ fòrs, é a sa ki idé l’ fini ké sa mové labitid-a. Mé jik jòdla, i divèt kontinyé briga pou pa viré annan sa bagaj-a. I ka di : « Lò i gen lidé ki pa pròp ki ka vini annan mo lèspri, mo ka di Jéova sa franchman annan lapriyè paské mo savé ki, si a pou mo rounso, mo pa ké jen rivé. Lapriyè gen roun fòrs ki idé mo vin’ pi pròch di Jéova. » Kou Sakoura, i gen milyon moun ki anprann konnèt Bondjé. É Bondjé bay yé fòrs fè chanjman annan yé lavi pou yé pouvé viv roun fason Bondjé kontan (Philippiens 4:13).

Pi ou ké anprann konnèt Bondjé, pi Bondjé ké ‘konnèt ou’, é pi ou lanmityé ké li ké divini fò (Galates 4:9 ; Psaume 25:14). É a sa moman-an, ou ké pouvé rété vivan lò lafen sa monn-an ké vini, é ou ké pouvé viv annan monn nouvo-a ki Bondjé promèt nou. Mé kouman lavi annan monn nouvo-a ké fika ? Artik ki ka vini-a ké èspliké nou sa.

a Jéova, a non Bondjé. I fè nou konnèt so non annan Labib-a.