To pouvé jwenn lapè lò sitiasyon-an rèd

1. « Lapè Bondjé » a kisa, é ki bénédiksyon i ka pèrmèt nou jwenn ? (Philippiens 4:6, 7).

I GEN roun lapè moun-yan ki annan sa monn-an pa konnèt. A « lapè Bondjé », sa lé di lapè nou ka santi annan nou tchò paské nou gen roun bèl lanmityé ké nou Papa ki annan syèl-a. Lò nou gen lapè Bondjé, nou ka santi nou an sékirité (li Philippiens 4:6, 7). I ka pèrmèt nou gen roun bèl lanmityé ké sa-ya ki kontan Bondjé épi rété pròch ké « Bondjé lapè »-a li menm (1 Thess. 5:23). Lò nou konnèt nou Papa é ki nou ka fè li konfyans é ki nou ka obéyi li, so lapè pouvé idé nou rété kalm si nou enkyèt lò sitiasyon-an rèd.

2. Poukisa nou pouvé sir ki nou pouvé gen lapè Bondjé ka bay ?

² Ès nou pouvé vréman trapé lapè Bondjé ka bay lò sitiasyon-an rèd, parèkzanp lò i gen roun épidémi, roun katastròf natirèl, sa yé ka aplé troubles civils ouben lò yé ka pèrsékité nou ? Rounsèl di sa bagaj-ya té ké asé pou mété nou anba dlo. Pourtan, Jézi bay so disip sa konsèy-a : « A pa pou zòt tchò ni enkyèt ni pran pè » (Jean 14:27). Toupannan yé té ka pasé anba bon éprèv, plizyèr frè ké sò swiv sa konsèy-a, é gras a Jéova, yé rivé trapé lapè annan yé tchò.

TRAPÉ LAPÈ PANNAN ROUN ÉPIDÉMI

3. Kouman roun épidémi ouben roun pandémi pouvé anpéché nou gardé nou lapè ?

³ Roun épidémi ouben roun pandémi pouvé boulvèrsé tout nou lavi. Sonjé sa ki rivé roun patché moun akoz di Covid-19-a. Lò yé pozé roun patché moun késyon pou savé kouman sa té pasé pou yé, pasé lanmotché di ki, dipi sa pandémi-a, yé pa ka rivé byen dronmi. Akoz di sa pandémi-a, moun-yan plis èstrésé, i gen plis moun ka fè déprésyon, ka bwè, ka pran ladròg, i gen plis vyolans annan fanmi-ya épi moun ki ka éséyé tchwé yé kò. Si i gen roun épidémi annan to koté, kisa to pouvé fè pou to pa enkyété to kò tròp é pou to profité di lapè Bondjé ka bay ?

4. Poukisa konnèt profési Jézi bay asou dèrnyé jou-ya ka rasiré nou ?

⁴ Kou Jézi té di l’, pannan dèrnyé jou-ya, i té ké gen épidémi « roun koté apré ròt » (Luc 21:11). Poukisa sa ka rasiré nou lò nou savé sa ? Paské sa ka pèrmèt nou pa rété èstébékwé lò i gen roun épidémi. Nou ka wè ki bagaj-ya ka fèt kou Jézi té di. Donk a pou nou swiv konsèy Jézi bay krétyen-yan ki té ké viv pannan dèrnyé jou-ya : « Vréman, pa pran pè » (Mat. 24:6).

5. a) Kisa nou divèt doumandé Jéova lò i gen roun épidémi ? (Philippiens 4:8, 9). b) Ki bénédiksyon to pouvé jwenn si to ka kouté frè-ya li Labib-a ?

⁵ Lò roun maladi ka kouri toupatou, sa pouvé fè nou paniké. A sa ki rivé Desib. Kou so tonton, so kouzen ké so dòktèr mouri akoz di Covid-a, sa sò-a té pè trapé Covid-a épi kontaminé so manman ki té ja gen so laj. É kou akoz di pandémi-a, i té ka riské pédi so travay, i té ka doumandé so kò kouman i té ké fè pou achté manjé épi pou péyé so loyé. Afòrs i té ka enkyété so kò, i pa té ka rivé dronmi. Pourtan, i rivé viré jwenn lapè annan so tchò. Kouman i fè ? I byen doumandé Jéova idé l’ rété kalm, épi mété so lidé asou bagaj ankourajan. (li Philippiens 4:8, 9). Anplis di sa, i té ka kouté anréjistréman Labib-a, a té kousidiré Jéova té ka « palé » pou li. Men sa i ka di : « Mo kouté frè-ya li Labib-a. Yé vwa dous. Sa idé mo rété kalm é sa fè mo sonjé ki Jéova ka gadé pou mo » (Ps. 94:19).

6. Kouman étidyé Labib-a to rounso ké alé annan réinyon-yan ké idé to ?

⁶ Lò i gen roun épidémi, sa pouvé anpéché to fè sa to gen labitid fè. Mé a pa pou sa anpéché to étidyé Labib-a to rounso ni alé annan réinyon-yan. Si to ka gadé istwè frè ké sò-ya annan piblikasyon-yan ké annan nou vidéyo, sa ké fè to sonjé ki to frè ké sò-ya ka rété fidèl menm si yé ka jwenn problèm kou topa (1 Pierre 5:9). Réinyon-yan ké idé to plen to lèspri ké bagaj ankourajan ki ka vini di Labib-a. Sa ké pèrmèt to osi ankourajé to frè ké sò-ya é yé ké pouvé ankourajé to osi (Rom. 1:11, 12). Si to ka réfléchi asou fason Jéova idé so sèrvitèr lò yé té malad, lò yé té pè ouben lò yé té yé rounso, to lafwa ké vin pi fò, mé to ké osi plis sir ki i ké idé to osi.

7. Ki bon èkzanp apot Jan ka bay nou ?

⁷ Kontinyé palé ké to frè ké sò-ya. Lò i gen roun épidémi, pitèt nou oblijé rété lwen di nou konpanyen, pa bo ni kroké yé, menm lò a nou frè ké sò-ya. Annan sa kalité sitiasyon-yan, pitèt to ka rousanti menm bagaj-a ké apot Jan lò i té lé wè so zanmi Gayis (3 Jean 13, 14). Mé, i té byen konprann ki, pannan roun tan, sa pa té ké posib. Donk i fè sa i té pouvé fè : i ékri roun lèt pou Gayis. Menm fason-an, si to pa pouvé alé wè to frè ké sò-ya, fè tousa to pouvé pou aplé yé o téléfonn, pou fè roun apèl vidéyo ouben pou voyé yé roun mésaj. Si to ka kontinyé palé ké ròt krétyen, to ké santi to kò plis an sékirité é to ké pi kalm. É si to enkyèt bokou, doumandé ansyen-yan idé to é asèpté sa yé ké fè pou ankourajé to (Is. 32:1, 2).

TRAPÉ LAPÈ APRÉ ROUN KATASTRÒF

8. Kouman roun katastròf pouvé fè to pédi to lapè ?

⁸ Si koté to ka rété-a, dlo ja monté, latè-a ja tranblé ouben si difé ja pri, pitèt to pouvé kontinyé enkyèt lontan apré katastròf-a rivé. Si to pédi moun to té kontan ouben tout to bagaj krazé, pitèt sa fè to lapenn bokou. To pa té savé sa pou to té fè é pitèt menm to té kòlè. Mé sa pa lé di ki to pi kontan bagaj matéryèl pasé to kontan Bondjé ouben ki to pa gen asé lafwa. Lò to ka jwenn roun éprèv ki rèd, si to ka réyaji kou nou fin di-a, a roun bagaj ki nòrmal (Job 1:11). Pourtan, menm annan sa kalité sitiasyon-yan ki rèd, to pouvé trapé lapè. Kouman to pouvé fè sa ?

9. Kisa Jézi di nou pou nou préparé nou kò pou katastròf-ya ?

⁹ Sonjé sa Jézi profétizé. Vré krétyen-yan pa ka krè ki pyès mové bagaj pa ké janmen rivé yé. Yé savé ki pi sa ké alé pi i ké gen katastròf é pitèt menm sa katastròf-ya ké tonbé anlè yé. Jézi di so disip ki anvan lafen-an rivé, i té ké gen « gran tranblémandétèr » ké ròt kalité malò ankò (Luc 21:11). I di osi ki ‘i té ké gen plizanplis méchansté’, é a sa nou ka wè, i gen plizanplis moun ka tchwé moun, plizanplis vyolans ké térorizm (Mat. 24:12). Jézi pa janmen di ki a sèlman moun ki pa ka adoré Jéova ki té ké jwenn sa problèm-yan. Katastròf-ya ka tonbé osi asou roun patché krétyen ki fidèl (Is. 57:1 ; 2 Cor. 11:25). Jéova pa ké pitèt protéjé nou di tout katastròf-ya, mé i ké bay nou tousa nou bézwen pou nou rété kalm é pou nou gardé nou lapè.

10. Poukisa lò nou ka préparé nou kò dipi jòdla pou roun katastròf sa ka montré ki nou gen lafwa ? (Proverbes 22:3).

¹⁰ Si roun katastròf ka tonbé anlè nou blip konsa, sa ké pi fasil pou nou rété kalm si anvan sa, nou pran tan réfléchi asou fason nou ké réyaji. Mé si nou ka préparé nou kò pou roun katastròf, ès sa lé di ki nou pa gen lafwa annan Jéova ? Awa. Sa pito ka montré ki nou gen lafwa ki Jéova ké pran swen di nou. Poukisa ? Paské Paròl Bondjé-a ka di nou préparé nou kò pou si i gen roun katastròf (li Proverbes 22:3). Anplis di sa, plizyèr fwa annan plizyèr artik annan nou journal, annan réinyon asanblé-a é annan plizyèr kominikasyon yé bay nou o bon moman, òrganizasyon Jéova-a ankourajé nou préparé nou kò pou si roun bagaj té ka rivéc. Ès nou ka fè Jéova konfyans ? Si nou ka fè l’ konfyans, nou ké swiv sa konsèy-a dipi aprézan, anvan roun katastròf tonbé anlè nou.

11. Kisa èkzanp Margaret ka anprann to ?

¹¹ Réfléchi asou sa ki rivé Margaret. Difé pri annan danbwa bò d’ so kaz donk yé di li chapé. Mé kou i té gen roun patché moun ki té ka éséyé chapé an menm tan, toupatou té bouché asou larout-a. I koumansé gen plizanplis lafimen nwè é akoz di sa Margaret pa té pouvé soti di so loto pannan roun ti moman. Mé i rivé chapé paské i té préparé so kò. I té toujou gen roun kart annan so sak pou idé li si i té pou chapé roun jou, konsa i té pouvé trapé rounòt chimen pou soti. I té jis éséyé sa ti chimen-an anvan pou i té rivé swiv li fasilman. Paské i byen préparé so kò, i rivé chapé so lapo.

12. Poukisa nou ka swiv sa yé ka di nou fè pou nou rété an sékirité ?

¹² Pou nou rété an sékirité é pou tout bagaj viré byen, gouvèrnman-an pouvé doumandé nou pa soti pannan roun ti moman, ouben i pouvé di nou chapé di nou kaz ouben ròt bagaj konsa. I gen moun ki pa lé kouté ouben yé ka pran tan, paské yé tro kontan yé bagaj. Mé kouman krétyen-yan yé menm ka réyaji ? Labib-a ka di nou : « Akoz di Sényèr-a, a pou zòt obéyi tout moun yé mété la : ki a roun rwa kou roun moun ki pi rot, ki a gouvèrnèr-ya kou moun i voyé » (1 Pierre 2:13, 14). Òrganizasyon Bondjé-a osi ka di nou sa pou nou fè pou nou rété an sékirité. A souvan yé ka fè nou sonjé ki nou divèt bay ansyen-yan nou niméro téléfonn, nou adrès. Konsa si roun bagaj rivé, yé ké pouvé aplé nou fasilman. Ès to fè l’ ? Yé pouvé di nou osi sa nou divèt fè si i gen roun konfinman, si nou divèt lésé koté nou fika, ouben kouman nou pouvé jwenn sa nou bézwen, ouben ankò kitan é kouman nou pouvé idé ròt-ya. Si nou pa ka obéyi, nou pouvé mété nou lavi ké lavi ansyen-yan an danjé. Pa bliyé ki sa wonm-yan ki fidèl ka véyé asou nou (Héb. 13:17). Men sa Margaret ka di : « Si mo rivé sové mo lavi, mo sir ki a paské mo fè sa ansyen-yan ké òrganizasyon Jéova-a di mo fè. »

13. Kisa ki ka idé roun patché krétyen ki lésé yé kaz gardé yé lajwa ké yé lapè ?

¹³ Roun patché frè ké sò té blijé lésé yé kaz akoz di roun katastròf, roun lagèr ouben di sa yé ka aplé troubles civils. Mé yé ka fè sa yé pouvé pou yé adapté annan yé nouvo sitiasyon épi lanmenm roukoumansé alé annan réinyon-yan ké préché. Kou krétyen-yan annan 1^é syèk-a ki té chapé toupatou akoz di pèrsékisyon-an, yé ka kontinyé « di bon nouvèl paròl Bondjé-a » (Actes 8:4). Lò yé ka préché, sa ka idé yé mété yé lidé asou Rwayonm-an pasé yé rété asou yé problèm. Konsa, yé ka gardé yé lajwa ké yé lapè.

TRAPÉ LAPÈ LÒ YÉ KA PÈRSÉKITÉ TO

14. Kouman pèrsékisyon-an pouvé anpéché nou gardé nou lapè ?

¹⁴ Pèrsékisyon-an pouvé anpéché nou gen roun patché bagaj ki ka pèrmèt nou gen lapè. Nou kontan lò nou pouvé alé annan réinyon-yan, lò nou pouvé préché kou nou lé é lò nou pouvé fè sa nou gen labitid fè touléjou san nou pa pè yé arété nou. Lò yé ka anpéché nou fè sa, nou pouvé koumansé enkyèt é nou pouvé koumansé pè sa ki pouvé rivé nou. Sa nòrmal. Mé a pou nou panga ! Jézi di ki pèrsékisyon-an té ké pouvé fè so disip tonbé (Jean 16:1, 2). Alòr kouman nou pouvé gardé nou lapè lò yé ka pèrsékité nou ?

15. Poukisa nou pa divèt pè yé pèrsékité nou ? (Jean 15:20 ; 16:33).

¹⁵ Paròl Bondjé-a ka di nou : « Tout sa ki lé kontinyé adoré Bondjé ké fidélité é kontinyé swiv Jézi Kris, yé ké pèrsékité yé osi » (2 Tim. 3:12). A roun bagaj Andrei pa té ka rivé asèpté lò yé entèrdi Témwen Jéova-ya annan so péyi. I té ka di annan so tchò : « I gen tèlman Témwen Jéova isi, mo pa ka wè kouman lapolis pouvé arété nou tout. » Mé, pasé sa lidé-a idé li rété kalm, sa té ka fè li enkyèt toulong. Ròt frè ké sò yé menm té pito ka lésé tout bagaj annan lanmen Jéova, yé pa té ka chaché savé si yé té ké arété yé ouben si yé pa té ké arété yé. Menm si yé té asèpté ki yé té pouvé arété yé roun jou, yé pa té enkyèt kou Andrei. Alòr Andrei désidé réfléchi kou yé, é lésé tout bagaj annan lanmen Bondjé. Roun ti moso tan apré, i viré gen lapè annan so tchò. É jòdla, menm si bagaj-ya rèd, so tchò kontan. Nou menm osi, a pou nou asèpté ki dimen yé ké pitèt pèrsékité nou, mé Jézi ka di nou ki nou pouvé rété fidèl (li Jean 15:20 ; 16:33).

16. Lò yé ka pèrsékité nou, kisa nou divèt fè ?

¹⁶ Lò yé ka défann nou adoré Jéova annan roun koté, détan filyal-a ouben ansyen-yan ka di nou sa nou divèt fè. Yé ka fè sa pou protéjé nou, pou nou kontinyé gen manjé èspirityèl-a é pou idé nou kontinyé préché. Fè tousa to pouvé pou to swiv sa yé ka di to fè, menm si to pa ka konprann poukisa yé ka doumandé to fè sa (Jacq. 3:17). Anplis di sa, pa janmen di pyès moun sa yé pa gen drwa savé asou nou frè ké sò-ya ouben asou sa asanblé-a ka fè (Eccl. 3:7).

17. Kou apot-ya, kisa nou byen désidé fè ?

¹⁷ Satan ka ataké sa-ya ki ka adoré Bondjé paské yé « divèt bay témwanyaj asou Jézi » (Rév. 12:17). Pa lésé Satan ké so monn fè to pè. Lò nou ka préché é lò nou ka fè disip menm si yé ka baré nou chimen, nou kontan é sa ka bay nou lapè annan nou tchò. Annan 1^é syèk-a, lò chèf jwif-ya défann apot-ya préché, yé chwazi obéyi Bondjé. Yé kontinyé préché é sa té ka fè yé tchò kontan (Actes 5:27-29, 41, 42). Bon, lò yé ka anpéché nou adoré Bondjé kou nou lé, a pou nou panga (Mat. 10:16). Mé si nou ka fè tousa nou pouvé pou nou kontinyé préché, nou ké gen lapè annan nou tchò paské nou ka fè Jéova plézi é paské nou ka préché roun mésaj ki pouvé sové lavi moun-yan.

« BONDJÉ LAPÈ KÉ LA KÉ TO »

18. Kisa nou divèt sonjé parapòrta lapè nou bézwen-an ?

¹⁸ A pou to sir ki menm annan sitiasyon ki pi rèd-a nou pouvé gen lapè annan nou tchò. Lò nou annan roun éprèv, annou sonjé ki lapè nou bézwen-an, a lapè Bondjé, sa lé di lapè Jéova rounso pouvé bay. Lò i gen roun épidémi, roun katastròf ouben lò yé ka pèrsékité to, konté asou to Papa ki annan syèl-a. Rété pròch ké so òrganizasyon. Mété to lidé asou tout bèl bagaj ki gen pou rivé. Atò, ‘Bondjé lapè ké la ké to’ (Phil. 4:9). Annan ròt artik-a, nou ké wè kouman nou pouvé idé nou frè ké sò-ya ki annan roun éprèv pou yé gardé lapè Bondjé ka bay.