1925 :I gen san lannen

PÈP BONDJÉ-A TÉ DIVÈT KONTINYÉ ANTANN

Roun patché Étidyan Labib té ka pansé ki latè-a té ké roudivini roun paradi an 1925. Poukisa ? Men sa Albert Schroeder, roun frè ki té ké annan Kolèj santral-a pita, èspliké : « Nou té ka pansé ki larèstan krétyen wen-yan té ké monté laro syèl pou fè parti di Rwayonm-an é ki sèrvitèr Jéova ki té fidèl kou David, Abraam ké ròt ankò, té ké résisité épi dirijé latè-a. » Kou anyen di tousa pa fèt, roun ran frè ké sò té yèg, é sa nòrmal (Prov. 13:12).

Menmsi yé té yèg, près tout Étidyan Labib-ya kontinyé préché é yé vin konprann ki, palé di Jéova, a té bagaj pi enpòrtan i té gen pou fè-a. Parèkzanp, annou wè kouman yé sèrvi laradyo pou yé préché pou roun patché moun.

YÉ KA KONSTRWI PLIS STASYON RADYO

An 1924, roun patché moun kouté radyo WBBR-a. Donk, an 1925, Étidyan Labib-ya konstrwi rounòt radyo bò d’ Chikago, an Illinois. Yé aplé sa radyo-a WORD. Ralph Leffler, ki idé pou konstrwi stasyon-an, di ki lò i té ka fè frèt lannwit, moun annan roun patché koté ki té lwen té ka kouté sa radyo-a. Parèkzanp, roun fanmi ki té ka rété pi lwen pasé 5 000 km di stasyon-an, annan vil Pilot, an Alaska, kouté roun annan prémyé émisyon-yan ki pasé asou sa radyo-a. Lò yé kouté sa émisyon-an, fanmi-a voyé roun lèt pou sa-ya ki té ka travay annan radyo-a pou di yé mèrsi pas yé té préparé roun program ki té ankourajé yé é ki té idé yé anprann plis bagaj asou Bondjé ké asou Labib.

La Tour de Garde 1^é désanm 1925 an anglé, èspliké poukisa roun patché moun ki té lwen té ka rivé tandé sa émisyon-yan. I di :« WORD, a roun annan stasyon radyo-ya ki pi pwisan Ozétazini. Tout moun Ozétazini, Kiba ké laro Alaska pouvé tandé sa radyo-a. Roun patché moun ki pa té janmen tandé lavérité anvan té anvi anprann plis bagaj paské yé té kouté sa radyo-a. »

O menm moman, Étidyan Labib-ya té ka fè tousa yé té pouvé pou sèrvi laradyo ankò plis pou préché bon nouvèl-a o Kanada. An 1924, yé té konstrwi stasyon radyo CHUC-a annan vil Saskatoon, annan provens Saskatchewan. A té roun annan prémyé stasyon radyo o Kanada ki té ka fè émisyon asou Labib. An 1925, yé té divèt mété sa ti stasyon radio-a rounòt koté. Donk, òrganizasyon achté roun ansyen sinéma yé té ka aplé Regent é yé rénové l’ pou yé mété yé radyo.

Grasa sa stasyon-an, roun patché moun ki té ka rété annan ti vil ké lakanpagn, annan provens Saskatchewan, tandé bon nouvèl-a pou prémyé fwa-a. Parèkzanp, annan vil McKague ki té 185 km pi lwen, roun madanm yé té ka aplé Madanm Graham, tandé roun émisyon laradyo épi i ékri òrganizasyon-an pou doumandé piblikasyon asou Labib. Men sa frè George Naish di : « A té kousidiré i té ka sipliyé nou : “Anprann nou bagaj asou Labib !” I té tèlman bézwen nou idé l’ ki nou voyé tout séri liv Études des Écritures pou li. » Annan roun ti moman, Madanm Graham koumansé palé di sa i té ka anprann ké moun ki té ka rété annan sèrten koté ki té ankò pi lwen.

NOU ANPRANN ROUN VÉRITÉ KI ENPÒRTAN

Annan La Tour de Garde 1^é mars 1925 an anglé, i té gen roun artik enpòrtan. So tit, a té : « La naissance de la nation ». Poukisa sa artik-a té enpòrtan konsa ? Étidyan Labib-ya té ja konprann ki Satan gen so òrganizasyon. I ka dirijé démon-yan, rélijyon-yan, gouvèrnman-yan ké sistèm ékonomik-ya asou latè-a. Mé grasa sa artik-a, « èsklav fidèl ké avizé-a » idé frè ké sò-ya konprann ki Jéova li menm osi gen sopa òrganizasyon ki pa gen anyen ka wè ké sa di Satan é ki so òrganizasyon kont Satan (Mat. 24:45). Anplis di sa, èsklav fidèl ké avizé-a èspliké ki rwayonm Bondjé-a koumansé dirijé an 1914 é ki sa lannen-an menm, akoz di ‘lagèr ki pété annan syèl-a’, yé mété Satan ké so démon dèrò di syèl-a, é aprézan, yé blijé rété pa bò d’ latè-a (Rév. 12:7-9).

Pou roun ran frè ké sò, sa té rèd pou yé té asèpté sa èsplikasyon-an. Donk, artik-a di : « Nou ka konséyé sa-ya ki pa dakò ké sa èsplikasyon-an pran pasyans é fè Jéova konfyans toupannan yé ka kontinyé adoré l’ ké fidélité. »

Mé Tom Eyre, roun colporteur (a konsa nou té ka aplé pyonyé-ya a sa lépòk-a) ki té ka rété Anglétèr, èspliké sa près tout Étidyan Labib-ya rousanti parapòrta sa artik-a : « Frè ké sò-ya té kontan lò yé tandé sa yé èspliké asou Révélation 12. Kou nou té konprann ki Rwayonm-an té ja koumansé dirijé annan syèl-a, nou té présé fè tout moun savé sa. Sa bay nou anvi préché ankò plis é sa idé nou wè ki Jéova té ké fè bèl bagaj pita. »

ÉTIDYAN LABIB-YA KONPRANN KI YÉ TÉ DIVÈT PALÉ DI JÉOVA

Jòdla, Témwen Jéova-ya byen konnèt sa ki marké annan Isaïe 43:10 : « Men sa Jéova ka di : “Zòt sa mo témwen, wi, sèrvitèr mo chwazi-a.” » Anvan 1925, nou piblikasyon pa té ka djè palé di sa vèrsé-a. Mé sa chanjé. An 1925, yé palé di Isaïe 43:10 ké 12 annan 11 Tour de Garde !

An out 1925, Étidyan Labib-ya fè roun asanblé annan vil Indianapolis, an Indiana. Frè Rutherford té marké roun mésaj asou program asanblé-a pou rousouvwè délégé-ya. Sa mésaj-a té ka di : « Nou vini annan sa asanblé-a pou nou pran fòrs Sényèr-a ka bay nou, pou nou viré annan téritwar-a ké plis balan pou palé di Jéova. » Pannan tout asanblé-a ki fèt asou wit jou, yé ankourajé tout sa ki té la, palé di Jéova chak fwa yé té pouvé fè l’.

Sanmdi 29 out, frè Rutherford fè roun diskour. Tit-a, a té : « Un appel à l’action ». Annan so diskour, i montré kouman sa té enpòrtan di préché. I di : « Jéova ka di so pèp : “Zòt sa mo témwen é a mo ki Bondjé.” Apré sa, i di yé sa yé té divèt fè, é mésaj-a té klè : “Mété roun sign pou pèp-ya wè.” Sèl pèp asou latè-a ki pouvé palé di Jéova, a sa-ya i ka gidé ké so lèspri sen paské yé sa so pèp » (Is. 43:12 ; 62:10).

Apré so diskour, frè Rutherford li roun dokiman : « Message d’espérance ». Tout sa ki té la té dakò ké sa ki té marké annan sa dokiman-an ki té ka di ki a Rwayonm Bondjé-a rounso ki pouvé pèrmèt nou gen lapè, roun bèl lavi, lasanté, libèrté ké lajwa pou tout-tan. Pita, yé tradwi sa dokiman-an é yé enprimé l’ asou roun dépliyan pou yé sèrvi l’ lò yé té ké préché. Yé bay moun apéprè 40 milyon dépliyan.

Étidyan Labib-ya pran non Témwen Jéova plizyèr lannen pita. Mé, yé té ja ka koumansé konprann ki sa té enpòrtan ki yé réprézanté Jéova.

NOU KA ROUTOUNEN WÈ MOUN-YAN

Kou aprézan i té gen plizanplis Étidyan Labib asou tout latè-a, òrganizasyon-an ankourajé yé routounen wè moun-yan ki té montré yé té lé konnèt plis bagaj asou bon nouvèl-a. Apré kanpagn yé fè pou bay dépliyan Message d’espérance-a, Bulletin-ana di yé : « Routounen wè moun zòt bay dépliyan Message d’espérance-a. »

Annan Bulletin janvyé 1925 an anglé, men sa roun Étidyan Labib ki té ka rété annan vil Plano, o Texas, té ka di : « Chak fwa nou ka routounen annan roun téritwar nou ja alé plizyèr fwa, nou étoné pas souvan, nou ka trapé plis moun ki entérésé ki lò nou k’alé annan roun téritwar nou pa té jen alé anvan. Parèkzanp, pannan dis lannen-yan ki pasé, nou alé senk fwa annan roun ti vil di nou téritwar. […] Pourtan, i pa gen lontan, sò Hendrix ké mo manman routounen annan sa vil-a é yé lésé plis liv pasé pyès tan. »

Men sa roun colporteur ki té ka rété Panama ékri : « Roun patché moun ki pa té lé kouté mo prémyé fwa mo té vini, chanjé nèt lò mo routounen wè yé dézyèm ouben trwazyèm fwa-a. Sa lannen-an, sa mo ka fè pi souvan, a routounen wè moun mo ja wè. É mo ka gen bèl ti kozé ké roun ran annan yé. »

PÈP BONDJÉ-A PARÉ POU DIMEN

Annan lèt frè Rutherford té ka ékri pou colporteur-ya chak lannen, i palé di travay yé té fè lannen ki té pasé-a é i di yé ki travay i té ka rété pou fè toujou. I ékri : « Pannan lannen ki fin pasé-a, zòt té gen lònò konsolé roun patché moun ki té tris. Sa fè zòt tchò kontan. Sa lannen ki ka vini-a, zòt ké pouvé palé di Bondjé ké di so rwayonm é zòt ké pouvé mété roun sign pou pèp-ya wè […]. Annou tout kontinyé sèrvi nou lavwa pou louwé nou Bondjé ké nou Rwa ansanm. »

Lò lannen 1925-a té ka bout, frè-ya désidé fè roun pi gro Bétèl, Brouklin. An 1926, òrganizasyon-an té ké koumansé pi gran projè konstriksyon yé pa té janmen fè anvan.