Taani Motikitaeka

9 Imwina riki ao e nako Abimereka+ are natin Ierubaara nakoia mwaanen tinana i Tekem, ao e taku nakoia naakai ao nakoia ana utu ni kabane tibuna te unimwaane:* 2 “Taiaoka ma titirakinia mataniwin* Tekem ni kabane ni kangai, ‘E nga riki ae raoiroi iroumi, a na tautaeka i aomi natin Ierubaara mwaane aika 70 ni kabane,+ ke e na tautaeka i aomi te mwaane ae tii temanna? Ao uringnga are bon raraami* ao irikomi* ngai.’”

3 Ao mwaanen nako tinan teuaei a karokoi ana taeka teuaei irouia mataniwin Tekem ni kabane, ao a kan ira nanon Abimereka bwa a taku: “Bon oin tarira teuaei.” 4 Ao a anganna 70 te mwakoro n tirewa man ana auti* Baaraberita,+ ao e kabongana Abimereka ni kabooia iai mwaane aika aki mwamwakuri ao aika akiako, bwa a na raonna. 5 Imwin anne ao e nakon ana auti tamana i Obera+ ao e kamateia tarina,+ ake natin Ierubaara ake mwaane ake 70, i aon te atibu ae tii teuana. Bon tii Iotam ae maiu ae ana bina Ierubaara, ibukina bwa e karabaa.

6 Ao a ikotaki mataniwin Tekem ni kabane ma kaaini Betemiro ni kabane ao a kaueaa Abimereka,+ i rarikin te aroka ae bubura, i rarikin te boua are i Tekem.

7 Ngke a kaongoa Iotam te baei ao e aki tabwara ma e a nako naba n tei i aon taubukin te Maunga ae Keritim,+ ao e takarua n te bwanaa ae korakora nakoia ni kangai: “Ongora irou, ngkami aika mataniwin Tekem, ao ane e na ongo iroumi te Atua.

8 “Iai ngkoa aroka aika nako bwa a na kabira ae e na uea i aoia. Mangaia are a taku nakon te aroka ae te oriwa, ‘Ko na tautaeka i aora.’+ 9 Ma e taku te aroka ae te oriwa nakoia, ‘N nang kaaki taekan oerau* ae a kabongana ibukin neboan te Atua ma kamoamoaaia aomata, ao N nangi nako n eiei i aon aroka ake tabeua riki?’ 10 A taku ngkanne aroka nakon te aroka ae te biiku, ‘Nakomai tautaeka i aora.’ 11 Ma e taku nakoia te aroka ae te biiku, ‘N nang kaaki taekani karewereweu ao raoiroin uaau, bwa N na nako n eiei i aon aroka ake tabeua riki?’ 12 Imwina ao a taku aroka nakon te kai ae te kureebe, ‘Nakomai tautaeka i aora.’ 13 E kaekaia te kai ae te kureebe ni kangai, ‘N nang kaaki taekan wainiu ae boou ae kakimwareireia te Atua ma aomata, bwa N na nako n eiei i aon aroka ake tabeua riki?’ 14 N tokina ao a a taku aroka ni kabane nakon te aroka ae kateketeke, ‘Nakomai tautaeka i aora.’+ 15 Ao e taku te aroka ae kateketeke nakon aroka akekei, ‘Ngkana kam na boni kabirai bwa te uea i aomi, ao nakomai ukoukora katanami i aan nuu. Ma ngkana kam aki, ao ke e otinako te ai mairou ao ni kabueki kain Rebanon aika tiira.’

16 “Mangaia ae te koaua bwa kam arona te aro ae koaua ma n eti ngke kam kaueaa Abimereka,+ ao te koaua bwa kam kaotiota ae raoiroi nakon Ierubaara ma kaaini batana, ao kam karaoa nakoina ae bon tau ni karaoaki nakoina? 17 Ngke e buaka tamau ibukimi,+ ao e karuanikaia maiuna* bwa e na kamaiuingkami mai nanoni baia tibuni Mirian.+ 18 Ma kam a teirake n te bong aei ni kaaitaraia kaaini batan tamau ao n tiringia natina mwaane aika 70, i aon te atibu ae tii teuana.+ Ao imwina kam a kaueaa Abimereka, are natin ana toro te aine,+ i aoia mataniwin Tekem tii ibukina bwa bon tarimi. 19 Eng, ngkana e boni koaua ma n eti aromi nakon Ierubaara ma kaaini batana n te bong aei, ao kam na kimwareirei ibukin Abimereka ao ke e kimwareirei naba ibukimi. 20 Ma ngkana e aki, ao ke e otinako te ai mairoun Abimereka ao ni kabuekiia mataniwin Tekem ma Betemiro,+ ao ke e otinako te ai mairouia mataniwin Tekem ma Betemiro ao ni kabueka Abimereka.”+

21 Ao e birinako Iotam+ ao e rabanako nako Beere, ao e maeka ikekei ibukin tarina are Abimereka.

22 Ao e tautaeka* Abimereka i aoia tibun Iteraera i nanon tenua te ririki. 23 Ao e kariaia te Atua bwa e na rikirake te kairiribai* i marenan Abimereka ma mataniwin Tekem, ao a a babakanikawaia Abimereka. 24 E riki aei bwa e aonga ni kabooaki mwin te mwakuri n iowawa are e karaoaki nakoia natin Ierubaara ake 70, n te aro are e a toka te bukibuki ibukin raraaia naakai, i aon tariia are Abimereka ibukin tiringakia,+ ao i aoia mataniwin Tekem bwa a buokia n tiringia tarina. 25 Mangaia are a a kateiia mwaane mataniwin Tekem bwa a na karanna i aon taubukin taiani maunga, ao a kamwaruaia te koraki nako ake a rikekei i nanon te kawai. Imwina riki ao e a kaongoaki Abimereka te baei.

26 Ao e mwananga nako Tekem Kaara are natin Ebeta ma tarina nako, ao a onimakina teuaei mataniwin Tekem.+ 27 A nako n te tawaana ao a ikotii kureebe ake n aia nne ni kureebe, a toutoui, ao a karaoa te toa, ao imwina a rinnako n ana auti atuaia+ ao a amwarake ma ni moi ao a kamaraiaa Abimereka. 28 Ao e taku Kaara are natin Ebeta: “Antai Abimereka, ao antai Tekem ngkai ti riai n toro irouna? Tiaki bon natin Ierubaara ngaia,+ ao tiaki bon te tia tei ibukina Tebura? Tooro irouia ana rorobuaka Amora are taman Tekem! Ma e aera ngkai ti riai n toro irouna? 29 Ngke arona bwa a mena aomata aikai i aan au kairiri, ao I a kakerikaaka naba Abimereka.” Ao e kakanikoa Abimereka ao e taku: “Kabatiaia riki kaain am taanga ni buaka ao otinako.”

30 Ngke e ongo Tebura are mataniwin te kaawa ana taeka Kaara are natin Ebeta ao e urarake unin teuaei. 31 Mangaia are e karaba* ni kanakoia taan uataeka nakon Abimereka, ni kangai: “Noria! a mena ngkai i Tekem Kaara are natin Ebeta, ma tarina nako, ao a kauekei nanoia kaain te kaawa bwa a na kaaitarako. 32 Waerake ngkai n te bong, ngkoe ma am mwaane, ao kam na kakaran n te tawaana. 33 N te tai are e oti naba iai taai n te moaningabong, ao ko riai ni kautimwaakako ao naako buakana te kaawa, ao ngkana e otinako ma ana mwaane ni kaaitarako, ao karaoa ae ko kona bwa ko aonga ni kataea ana kai.”*

34 Mangaia are e teirake n te bong Abimereka ma aomata ni kabane ake raona, ao a kakaran ni kaitaraa Tekem ao akoraki mwaitiia. 35 Ngke e otinako Kaara are natin Ebeta ao e tei i rarikini mataroan oon te kaawa, ao a a teirake naba Abimereka ma aomata ake raona man aia karan. 36 Ngke e noriia aomata Kaara, ao e taku nakon Tebura: “Noria! Iai aomata aika ruo rikaaki mai taubukin taiani maunga.” Ma e taku Tebura nakoina: “Ko nori nuun taiani maunga bwa kaanga taiani mwaane.”

37 E taku Kaara imwina riki: “Noria! Ae a a ruo rikaaki aomata mai nukan te aba, ao ae a a nakomai aika te korakina ni kawain te aroka are bubura are Meonenim.” 38 E kaekaa Tebura ni kangai: “E nga ngkai am taeka ni kamoamoa are kangai, ‘Antai Abimereka ngkai ti riai n toro irouna?’+ Tiaki bon aomata aikai ake ko taetae n ekiianako? Naako ngkai buakania.”

39 Mangaia are e otinako Kaara n rimoaia mataniwin Tekem ao e buakana Abimereka. 40 Ao Abimereka e kakioa teuaei, ao e birinako Kaara mairouna ao a bati aika kamateaki ni karokoa rarikini mataroan oon te kaawa.

41 Ao e teimatoa Abimereka ni maeka i Aruma, ao Tebura+ e kakioianako Kaara ma tarina nako mai Tekem. 42 N te bong are imwina ao a a otinako aomata nakon te tawaana, ao e tuangaki Abimereka taekan anne. 43 Mangaia are e kairiia aomata ao e bwenauaia nakon tenikoraki ao a kakaran n te tawaana. Ngke e noriia aomata n otinako man te kaawa, ao e ewekiia ao e oreiia. 44 A mwananga ni keerake Abimereka ma te koraki ake raona ao a tei i rarikini mataroan oon te kaawa, ao te koraki ake uakoraki a tabe ni buakania aomata ni kabane ake n te tawaana ao a oreiia. 45 E buakana te kaawa Abimereka ni kabongnga ao e taua. E kamateia aomata ake iai, ao imwina e a kabwakaa te kaawa+ ma ni kamaenakoa te taoro iai.

46 Ngke a bane n ongo taekan te baei mataniwin te taua are i Tekem, ao a aki tabwara ma a a nako naba nakon ruun* ana auti* Areberita bwa a na karabaia iai.+ 47 Ngke e kaongoaki naba ngkekei Abimereka ae a a bane n ikotaki mataniwi n te taua are i Tekem, 48 ao e ararakea te Maunga ae Tiaremon Abimereka ma mwaane ni kabane ake raona. Ao e anaa te tanai Abimereka ni baina ao e korea mwaangan te aroka teuana ao e tabekia i aon angana, ao e taku nakoia aomata ake raona: “Kabaitingkami ni karaoa aekakin ae kam noria bwa I karaoia!” 49 Mangaia are a bane naba aomata ni korei taiani mwaanga ao a rimwin Abimereka. Ao a kaaki taiani mwaanga i rarikin te ruu are a karabaia iai nakekei, ao a kabueka te ruu arei. Mangaia are a a bane naba ni mate aomata ake kaain te taua are i Tekem, ae tao 1,000 mwaane ma aine.

50 Ao e nako Tebeti Abimereka, ao e kaembwa n ekaanako Tebeti ao e taua. 51 Ao iai te taua ae korakora i nukan te kaawa, ao a bane ni birinako nako iai mwaane ma aine ao mataniwin te kaawa ni kabane. A kainia i nanona ao a tamwarake nako taubukin te taua. 52 Ao e mwananga Abimereka nakon te taua ao e buakanna, ao e kaania mataroan te taua bwa e na kabuekia n te ai. 53 Ao e kabwakaa te atibu ni kamantinti te aine temanna i aon atun Abimereka, ao e raeuaaki tabwanouna.+ 54 E waekoa ni wetea te tabonibai ae uouotii ana bwai ni buaka ao e taku nakoina: “Buuta am kabaang ao tiringai, bwa a aonga n aki taekinai ni kangai, ‘E kamateaki iroun te aine.’” Mangaia are e ewaria ana tabonibai ao e mate.

55 Ngke a nora Abimereka mwaane aika tibun Iteraera bwa e a mate, ao a a bane n okira mwengaia. 56 Mangaia are te Atua e angan Abimereka booni mwin te buakaka are e a tia ni karaoia nakon tamana, n arona n tiringia tarina ake 70.+ 57 E kaoka naba te Atua buakakaia ni kabane rorobuakan Tekem nako aon atuia. Mangaia are e a mena i aoia ana kamaraia Iotam+ are natin Ierubaara.+