Warekaia Iteraera
23 E taku ngkanne Baraam nakoni Baraka: “Katei baonikarea aika itiua n te tabo aei,+ ao katauraoi ibukiu kaao mwaane aika itiman ao tiibu mwaane aika itiman.” 2 E aki tabwara Baraka ma e a karaoa naba are e taku Baraam. Ao e kareana kaka temanna te kao mwaane ao te tiibu mwaane Baraka ao Baraam i aoni kaka teuana te baonikarea.+ 3 E taku ngkanne Baraam nakoni Baraka: “Tiiku ikai i rarikin am karea ni kabuekaki ao ngai N na nako. Tao e na taetae ma ngai Iehova. Te baere e kaotia nakoiu ao N na tuangko.” Mangaia are e a nako taubukin te tabuki teuana.
4 Ao e taetae te Atua ma Baraam+ ao e taku Nakoina: “I katei baonikarea aika itiua ni karinani, ao I kareana kaka temanna te kao mwaane ao te tiibu mwaane i aoni kaka teuana te baonikarea.” 5 Ao e karina te taeka ae kangai Iehova i nanoni win Baraam:+ “Okira Baraka ao aio te bwai ae ko na taekinna.” 6 Mangaia are e a oki ao e nora Baraka ma tokani Moaba ni kabane, n tei i rarikin ana karea ni kabuekaki. 7 E taekina ngkanne te kario ae kangai:+
“E kairai Baraka are ueani Moaba mai Aram,+
Mani maunga ake i mainiku:
‘Nakomai kamaraiaa Iakoba ibukiu.
Eng, nakomai kabuakakaa Iteraera.’+
8 N nang kangaa naba ni kamaraiaia te koraki ake e tuai ni kamaraiaia te Atua?
Ao N nang kangaa naba ni kabuakakaia te koraki ake e tuai ni kabuakakaia Iehova?+
9 I noriia mai taubukini bwaa,
Ao I noriia man taian tabuki.
10 Antai ae kona ni warekiia ana koraki aika korakora Iakoba+ aika rangi ni bati kaanga ai aroni bubun te tano?
Ke ni wareka tii kaamwakoron Iteraera?
I* bia mate ni katotonga mateia aika raoiroi,
Ao e bia katotonga tokia tokiu.”
11 E taku ngkanne Baraka nakoni Baraam: “Tera ae ko karaoia nakoiu? I kairiko bwa ko na kamaraiaia taani kairiribai nakoiu, ao noria akea te bwai ae ko karaoia ma ko kakabwaiaia.”+ 12 E kaeka ni kangai: “Tiaki I riai n taekini baike e karini i wiu Iehova?”+
13 E taku Baraka nakoina: “I butiiko bwa ko na irai nakon te tabo riki teuana ae ko kona n noriia mai iai. Ane ko na noriia tii tabeman mai buakoia, ao ko na aki noriia ni kabane. Ko na kamaraiaia ibukiu mai ikekei.”+ 14 Mangaia are e kairia nakon te tawaana ae Tobim nako aon taubukini Bitika,+ ao e katei baonikarea aika itiua ao e kareana kaka temanna te kao mwaane ao te tiibu mwaane i aoni kaka teuana te baonikarea.+ 15 Mangaia are e taku Baraam nakoni Baraka: “Tiiku ikai i rarikin am karea ni kabuekaki ngkana I nako n taetae ma Ngaia ikekei.” 16 Ao e taetae Iehova nakoni Baraam ao e karina te taeka ae kangai i nanoni wina:+ “Okira Baraka ao aio te bwai ae ko na taekinna.” 17 Mangaia are e a roko irouna ao e noria bwa e tataninga i rarikin ana karea ni kabuekaki, ao raona tokani Moaba. E titirakinna ngkanne Baraka ni kangai: “Tera ae e taku Iehova?” 18 E taekina ngkanne te kario ae kangai:+
“Teirake Baraka ao kakauongo.
Ongora irou, ngkoe ae natin Tibore.
19 Te Atua bon tiaki ai aron te aomata ae kewekewe,+
Ngkana e taekina te bwai teuana, tiaki e na boni karaoia?
Ngkana e taetae, tiaki e na boni kakoroa bukina?+
20 Noria! I kairaki bwa N na kakabwaiaa te aba,
Ao E a tia n anga ana kakabwaia,+ ao I a aki kona ni kaokia.+
21 E aki kariaia te mwaaka n tabunea teuana bwa e na kaitaraa Iakoba,
Ao e aki kariaia te rawawata teuana bwa e na kaitaraa Iteraera.
Bon raoia Iehova ae Atuana.+
Ao e takaruaeaki i buakoia ni kamoamoaaki bwa te uea.
22 E kairiia te Atua ni kaotinakoia mai Aikubita.+
Kaanga koron te kao mwaane ae moaanti ngaia, irouia naakai.+
Ngkai e nang atongaki ae kangai ibukini Iakoba ao Iteraera,
‘Nora te bwai ae e a tia ni karaoia te Atua!’
24 Aei te natannaomata ae e na teirake n aron te raian,
Ao e na teirake i bon irouna n aron te raian.+
E na aki wene ni karokoa ae e kana konana,
Ao n nima raraaia te koraki ake a kamateaki.”
25 Ao e taku Baraka nakoni Baraam: “Ngkana ko aki kona ni kamaraiaa n te itera teuana, ao ko aki riai naba ni kakabwaiaa n te itera are teuana.” 26 Ao Baraam e kaekaa Baraka ni kangai: “Tiaki I kangai nakoim, ‘N na karaoi bwaai ni kabane ake e taekin Iehova’?”+
27 E taku Baraka nakoni Baraam: “I butiiko ma nakomai, ao kariaia bwa N na kairiko nakon te tabo riki teuana. Tao e na raoiroi i matan te Atua ae koaua, bwa ko na kamaraiaa Iteraera ibukiu mai ikekei.”+ 28 Mangaia are Baraka e kaira Baraam nako taubukini Beore, ike e kona n noraki Ietimon*+ mai iai. 29 Ao e taku Baraam nakoni Baraka: “Katei baonikarea aika itiua n te tabo aei, ao katauraoi ibukiu kaao mwaane aika itiman ao tiibu mwaane aika itiman.”+ 30 Ao Baraka e karaoa are e tua Baraam, ao e kareana kaka temanna te kao mwaane ao te tiibu mwaane i aoni kaka teuana te baonikarea.