2 Tamuera
23 Aikai ana kabanea n taeka Tawita:+
“Ana taeka Tawita are natin Iete,+
Ao ana taeka te mwaane ae karietataaki,+
Ana kabiraki+ Atuan Iakoba,
3 E taetae Atuan Iteraera,
E taku nakoiu te Bwaa i Iteraera,+
‘Ngkana e raoiroi te aomata ae tautaekania aomata,+
Bwa e tautaeka i nanoni maakakin te Atua,+
4 Kaanga ai aron ootan te ingabong ngkana e oti taai,+
Te moaningabong ae akea te nang iai.
Kaanga ai aron te oota imwin te karau,
Ae kabwebwerakei uteute mai aontano.’+
5 Tiaki anne aron au utu i matan te Atua?
Bwa e a tia ni karaoa te berita ae akea tokina ma ngai,+
E katauraoaki raoi n arona nako ao e kamatoaaki.
Kioina ngkai e reke iai kamaiuau raoi ao kimwareireiu ni kabane,
Tiaki ngaia anne bukina ae e kamaiureireia iai?+
6 Ma a bane mwaane aika akea uaaia n tewenakoaki+ n ai aron aroka aika kateketeke,
Bwa a aki kona n anaaki n te bai.
7 Ngkana e tauia te aomata,
Ao e riai te aomata anne n taubobonga ni bwaai ni buaka aika biiti ma kain te kainiwai,
Ao a riai ni kabuekaki raoi n te ai n aia tabo.”
8 Aikai araia ana tia buaka Tawita aika korakora:+ Iotiebatibeta ae te Takemonaite, ae te mataniwi irouia naake teniman.+ E katioa ana kainiwai i aoia 800 aomata ao a mate n teuana te tai. 9 Imwin teuanne bon Ereata+ are natin Toto+ are tibun Aoa, are raoia naba taani buaka aika korakora ake teniman ake raon Tawita ngke a kakanikoia I-Biritia. A ikotaki ikekei ibukin te buaka, ao ngke a mumun rikaaki mwaane ake tibun Iteraera, 10 ao ngaia e tei ao e kamateia I-Biritia ni karokoa ae e a nimamate baina, ma e bon aki naba kaaki ana kabaang.+ Mangaia are e anga te tokanikai* ae korakora Iehova n te bong anne,+ ao a a manga oki n rimwina aomata ni kuribwaiia ake a mate.
11 Ao imwin teuanne bon Tiamma are natin Akee are te I-Ara. A bane n ikotaki I-Biritia i Rei, ike e mena iai te mwakoro n aba ae on n aroka aika taian rentire. Ao a a birinako aomata ibukia I-Biritia. 12 Ma e tei ngaia i nukan te tawaana ni kamanoa ao e teimatoa n oreiia I-Biritia, mangaia are e anga te tokanikai* ae korakora Iehova.+
13 A ruo rikaaki n tain te tai teniman mai buakoia rorobuaka ake mataniwi ake 30, nakon Tawita n te nangananga are i Aruram,+ ao aia koraki* I-Biritia a kaembwa n te Mwarua ae Rebaim.+ 14 E mena Tawita n te nono n te tai anne,+ ao aia taanga ni buaka I-Biritia e mena i Betereem. 15 Ao e a kaota te bwai ae bwaruia Tawita ni kangai: “Tera ngke e reke nimau te ran man te mwarua n ran are i rarikini mataroan ooni Betereem!” 16 Ngaia are a a kakorakoraia rorobuaka ake a ninikoria ake teniman akekei ni karekea kawaia n rin n aia kaembwa I-Biritia, ao a itia te ran man te mwarua n ran are i rarikini mataroan ooni Betereem, ao a uotia nakon Tawita. Ma e rawa n nimma ao e kabwaroa nakon Iehova.+ 17 E taku: “Iehova, I bon aki kona n iangoa ae I riai ni karaoa aei! E riai bwa N na nima raraaia+ mwaane aikai aika nako ni karuanikaia maiuia?”* Mangaia are e rawa n nimma. Aikai baike a karaoi ana tia buaka ake a korakora ake teniman.
18 Ao te mataniwi irouia naake teniman riki bon Abitiai+ are tarin Ioaba are natin Teruia.+ E katioa ana kainiwai i aoia 300 ao a mate. E rangi n atongaki naba n aroia naake teniman.+ 19 Ma e ngae ngke te kabanea ngaia ni kakannato i buakoia naake teniman ao bon aia mataniwi, ma e bon aki naba roko n aia karinan naake teniman ake mai mwaina.
20 Bon te mwaane ae ninikoria* Benaia+ are natin Ieoiata, are e karaoi mwakuri aika korakora aika bati i Kabeteera.+ E kamateia uoman natin Ariera are te I-Moaba, ao e ruo nako nanon te mwarua n ran ni bongin te tino ao e tiringa te raian.+ 21 E kamatea naba te I-Aikubita ae rangi n abwabwaki. E ngae ngke iai ana kainiwai te I-Aikubita arei i baina, ma e kaitaraa ma te kai, ao e burita te kainiwai mai bain te I-Aikubita arei ao e tiringnga n oin ana kainiwai. 22 Akanne baika e karaoi Benaia are natin Ieoiata. Ao e rangi n atongaki naba n aroia taani buaka ake a korakora ake teniman. 23 E ngae ngke e kakannato riki i buakoia naake teningaun, ma e aki roko n aia karinan naake teniman. Ma e mwiokoia Tawita i aoia taani kawakinna.
24 E mena Ataera+ are tarin Ioaba i buakoia naake teningaun ake Ereanan are natin Toto are te I-Betereem,+ 25 Tiamma are te I-Aarota, Erika are te I-Aarota, 26 Ereti+ are te Baretaite,+ Ira are natin Iketi are te I-Tekoa, 27 Abietera+ are te I-Anatota,+ Mebunnai are tibun Utiaa, 28 Tiaremon are tibun Aoa, Maarai+ are te I-Netoba, 29 Ereba are natini Banaa are te I-Netoba, Itai are natin Ribai mai Kibea are aia kaawa tibuni Beniamin, 30 Benaia+ are te I-Biraton, Etai man te mwarua ae Kaati,+ 31 Abiarebon are te I-Arabaite, Atimaweta are te I-Baurim, 32 Eriaaba are te I-Tiaarebon, ao natin nako Iaten, Ionatan, 33 Tiamma are te I-Ara, Aiam are natin Tiara are te I-Ara, 34 Eribereta are natin Aatibai are natin I-Maakata, Eriam are natin Aitobera+ are te I-Kiro. 35 Etiro are te I-Karemera, Baarai are te I-Arabia, 36 Ikara are natin Natan are te I-Tobaa, Bani are tibuni Kata, 37 Tereka are tibun Ammon, Naarai are te I-Beerota, are te tia uouotii ana bwai ni buaka Ioaba are natin Teruia, 38 Ira are te Ietera, Kaareba are tibun Ietera,+ 39 ao ai Uria+ are tibun Eta ao botaia ni kabane bon 37.