Iobi
32 Mangaia are a aikoa manga kataia ni kaekaa Iobi mwaane aika teniman aikai, ibukina bwa e kakoauaa raoi teuaei bwa e bon raoiroi.*+ 2 Ma e a rangi n un Eriu, are natini Barakiera are te I-Buti*+ man te utu are Ram. E urarake unna iroun Iobi ngke e kataia ni kaota raoiroina ao tiaki raoiroin te Atua.+ 3 E rangi n un naba irouia raon Iobi ake teniman ibukina bwa a aikoa kona ni kaeka, ma a taekinna bwa e buakaka te Atua.+ 4 E a kaman tataninga Eriu bwa e na kaekaa Iobi, ibukina bwa a a ikawai riki nakekei nakoina.+ 5 Ngke e noria Eriu bwa ai akea te bae a na kaeka iai mwaane ake teniman, ao e a urarake unna. 6 Mangaia are e taku Eriu are natini Barakiera are te I-Buti:
Mangaia are I tataninga ma te karinerine,+
Ao I maaku n tuangingkami te bwai ae I ataia.
7 I iango ni kangai, ‘Ke a taetae moa ikawai,
Ao ke a kaotiota te wanawana naake a bati aia ririki.’
8 Ma bon te taamnei ae raoiroi ae e anga te Atua nakoia aomata,
Ao ikeiken Teuare Moan te Mwaaka ae angania te ataibwai.+
9 Ngkana e ikawai temanna ao tiaki nanona* bwa e wanawana,
Ao tiaki naba tii unimwaane n ataa ae eti.+
10 Mangaia are I kangai, ‘Ongora irou,
Ao N na tuangingkami naba te bwai ae I ataia.’
11 Noria! I tataningai ami taeka,
Ao I ongongora n ami iango,+
Ngke kam ukoukori baika kam na taekin.+
12 I kakauongo raoi nakoimi,
Ma akea i buakomi ae e kona ni kaota kairuan Iobi,*
Ke ni kaekai ana kauntaeka.
13 Mangaia ae tai kangai, ‘Ti a kunea te wanawana.
Bon te Atua ae kaota kairuan teuaei, ao tiaki te aomata.’
14 E aki kainetai teuaei n ana taeka,
Ngaia are N na aki kaekaa n ami kauntaeka.
15 A a bwara nanoia, ai akea riki aia kaeka,
E a bon tare te bwai ae a na taekinna.
16 I tataninga, ma a aikoa reitaanako aia taeka,
A a tii tei naba ikekei n aki manga kaeka.
17 Mangaia ae N na kaeka naba ngai,
N na taekina naba te bwai ae I ataia,
18 Bwa I a onrake n taian taeka,
Ao e kairoroai te taamnei ae raoiroi ae i nanou.
20 Kariaia bwa N na taetae bwa I aonga ni kabebeteaki!
N na kauki riau ao n anga te kaeka.
21 N na aki kaotiota te inanonano nakon temanna,+
Ao N na aki naba taetae ni karang nakon* te aomata.
22 Bwa I babanga n taetae ni karang,
Ngkana I karaoia, ao e na waekoa te tia Karaoai ni katiaa arou.