Mika
5 “Ko a korokoreiko ngkai i bon iroum
Ngkoe ae te nati te aine ae buakanaki.
Ti a otabwaniniaki ni kaitaraaki.+
Ao a karetabaa ana tia moti Iteraera n te kai.+
E na otinako mairoum te aomata ae e na riki bwa te tia tautaeka ibukiu i Iteraera,+
Ae e a kaman riki man taai ake rimoa, ao mani boong ake ngkoangkoa.
3 Mangaia ae e na kaaki taekaia te Atua
Ni karokoa te tai are e bung iai neiere e na bung.
Ao nikiraia tarin te tia tautaeka a na bane n oki nakoia tibun Iteraera.
4 E na teirake ao e na kawakintiibu ni korakoran Iehova,+
Ni kakannaton aran Iehova ae Atuana.
5 Ao e na uota te raoi.+
Ngkana e ninia abara te I-Aturia ao n toutoui ara taua aika nonoaki,+
Ao ti na kateirakeia taani kawakintiibu aika itiman n ekianako, eng, tooka* aika waniman mai buakoia aomata.
Ao e na kamaiuira mairoun te I-Aturia,+
Ngkana e ninia abara ao n toutoua ara aono.
7 A na mena nikiraia tibun Iakoba i buakoia botannaomata aika bati,
N aron te aoi mairoun Iehova,
Ao n aroni bwakan te karau i aon aroka,
Aika aki kabotoi aia kantaninga i aon te aomata,
Ke n tataningaiia natiia aomata.
8 A na mena nikiraia tibun Iakoba i buakoia natannaomata,
I buakoia botannaomata aika bati,
N aron te raian ae mena i buakoia manin te buakonikai,
N aron te raian ae ataei i buakoia nanai n tiibu,
Ae mwananga n rawerawe ao n raeraebiti,
Ao akea ae e na kamaiuia.
9 E na karietataaki baim i aoia taani kakaaitarako,
Ao a na bane ni kamaunaaki aiam.”
10 E kangai ana taeka Iehova, “N te bong anne
Ao N na katiai aroia am aoti ao ni kamaunai am kaa ni buaka.
11 N na kamaunai kaawa ake i abam,
Ao ni kabwakai ni kabane am tabo aika nonoaki.
12 N na karokoa n tokina am mwakuri n tabunea ae te kakaraoi,
Ao akea temanna ae tatabunea ae e na tiku iroum.+
13 N na kamaunai mairoum am bouannanti aika kaaraki ma am boua,
Ao ane ko nang aki manga bobaraaki nakon ana mwakuri baim.+
15 N na karekei kaia natannaomata aika aki ongeaba,
N te un ao n te marakinnano.”