Itaia
52 Uti! Uti! Kunnikaiko n te korakora+ ngkoe ae Tion!+
Karin am kunnikai aika tamaroa,+ ngkoe ae Ierutarem ae te kaawa ae tabu!
Bwa e na aki manga rin i nanom ane e aki korotobibiaki ma ane e kamwara.+
2 Taeaanako te tano, teirake ao tekateka n te tabo ae karineaki, ngkoe ae Ierutarem.
Kabwarai kabaean roroam, ngkoe ae natin Tion te aine ae ko kataenikaiaki.+
3 Bwa e kangai ana taeka Iehova:
4 Bwa e kangai ana taeka te Uea ae Moan te Rietata ae Iehova:
“N te moantai ao a nako au aomata nako Aikubita bwa a na maeka ikekei bwa ianena,+
Ao imwina e a karawawataia naakai Aturia n akea bukina.”
5 “Tera ngkanne ae I riai ni karaoia ikai?” bon ana taeka Iehova.
“Bwa a kairakinako au aomata n akea booia.
A tatakarua ibukin aia tokanikai te koraki ake a tautaeka i aoia,”+ bon ana taeka Iehova,
“Ao e teimatoa n aki karineaki arau ni kabongnga.+
6 Ibukin anne ao a na ataa arau au aomata,+
Ibukin anne ao a na ataia n te bong anne bwa boni ngai Teuare taetae.
Noria, boni ngai!”
7 Ai tamaroara i aoni maunga waen ane e uouota te rongorongo ae raoiroi,+
Ane e katanoataa te rau,+
Ane e uouota te rongorongo ae raoiroi ae taekan te bwai ae raoiroi riki,
Ane e katanoataa te kakamaiu,
Ane e taetae nakon Tion ni kangai: “E a riki Atuam bwa te Uea!”+
8 Ongora! A kanenei bwanaaia am tia tantani.
A botaki n takarua ni kimwareirei,
Bwa ane a na noria raoi* ngkana e a ikotiia Iehova te koraki ake i Tion ni kaokiia.
9 Kam na kakatonga ao botaki n takarua ni kimwareirei, ngkami aika taabo aika uruaki i Ierutarem,+
Bwa e a tia ni kabebeteia ana aomata Iehova,+ e a tia ni manga kabooa Ierutarem.+
10 E a tia Iehova ni kaota anganibaina ae tabu i mataia natannaomata ni kabane.+
A na nori ana mwakuri ni kakamaiu* Atuara kaain tabon aonnaba ni kabane.+
11 Kam na nako, kam na nako, kam na otinako mai ikanne,+ tai ringa te bwai ae kamwara!+
Kam na otinako mai nanon neienne,+ kateimatoa itiakimi,
Ngkami aika kam uouotii bwain ana auti Iehova.+
12 Bwa ane kam na aki nako ma te buannano
Ao kam na aki naba birinako.
13 Noria! E na mwakuri ma te ataibwai au toro.+
E na tabekakirake nako eta,
E na neboaki ma n rangi ni karietataaki.+
14 Bwa n aron ae a bati aika miiakina teuaei ma te miroaroa,
Bwa e taraabuaka riki teina nakon teia mwaane nako,
Ao taraakina nakon taraakia mwaane nako,
15 Ao ai arona naba bwa e na kakubanakoia natannaomata aika bati.+