Iona
3 Ao e roko ana taeka Iehova iroun Iona n te kauatai, ae kangai:+ 2 “Teirake, ao naako Ninewe+ ae te kaawa ae kakannato, ao katanoataa nakon neienne te rongorongo ae I tuangko.”
3 Ai ngaia are e a teirake Iona ao e nako Ninewe+ bwa e ongeaba n ana taeka Iehova.+ Ninewe bon te kaawa ae rangi ni bubura* bwa bon tenibong te rianna rinanona. 4 Ao e rin Iona n te kaawa, ao e rianna i nanon tebongina, ao e katanoataa ae kangai: “Ai tii 40 riki te bong ao e nang kamaunaaki Ninewe.”
5 Ao a a onimakina te Atua+ mwaanen Ninewe, ao a katanoataa te aki mamatam ao a karin i aoia raerobwa,* mairoun ae te kabanea ni kakannato ni karokoa ae te kabanea ni mangori i buakoia. 6 Ngke e roko te rongorongo iroun uean Ninewe, ao e teirake man ana kaintokanuea ao e buuta kunnikaina n uea ao e rabunna n te raerobwa ao e tekateka i buakon te mannang. 7 Irarikin anne, e kanakoa te katanoata ni kabutaa Ninewe ni kangai,
“I aan ana tua te uea ma ana bwaanuea: Akea te aomata ke te man, te nanai ni kao ke te nanai n tiibu, ae riai n amwarake naba teutana. A aki riai ni kana te amwarake ke ni moi n te ran teutana. 8 Ke a rabunia n te raerobwa, aomata ma maan, ao ke a kakorakoraia ni wewetea te Atua ao n rairaki man aroia aika bubuaka ao man te tiritiri are a kakaraoia. 9 Antai ae e na ataia ao tao te Atua ae koaua e na manga iangoa* te baere e kani karaoia, ao n rairakinako man uraraken unna, bwa ti aonga n aki mate?”
10 Ngke e nora te baere a karaoia te Atua ae koaua, ae aroia n rairakinako man aroia aika bubuaka,+ ao e a manga iangoa* te kabuanibwai are e taku bwa e na karokoa i aoia, ao e a aki karokoa.+