Taani Motikitaeka

11 Bon te tia buaka ae korakora Iebeta+ are te I-Kireata, bon natin te aine ae kakabooaki, ao taman Iebeta boni Kireata. 2 Ma buuni Kireata e bungia naba natina aika mwaane. Ngke a a ikawai natini buuna aika mwaane aikai, ao a a kakionakoa Iebeta ao a taku nakoina: “E na aki reke tibwangam ni batan tamara, bwa bon natin te aine temanna ngkoe.” 3 Mangaia are e a birinako Iebeta mairouia tarina ao e maeka n te aba ae Tooba. Ao a raona Iebeta mwaane aika aki mwamwakuri, ao a iriria.

4 Imwina riki ao tibun Ammon a a buakania tibun Iteraera.+ 5 Ngke a a buakanaki tibun Iteraera irouia tibun Ammon, ao a aki tabwara unimwaaneni Kireata ma a a nako naba ni kaoka Iebeta man te aba ae Tooba. 6 A taku nakon Iebeta: “Nakomai ao ko na riki bwa ara mataniwi bwa ti aonga ni buakania tibun Ammon.” 7 Ma e taku Iebeta nakoia unimwaaneni Kireata: “Tiaki boni ngkami ake kam rangi n ribaai ngkoa ao kam kakioainako man ana auti tamau?+ Bukin tera bwa kam a kawarai ngkai kam rawawata?” 8 Ao a taku unimwaaneni Kireata nakon Iebeta: “Anne bukina ae ti a okiriko ngkai. Ngkana ko airi ma ngaira ni buakania tibun Ammon, ao ko na riki bwa ara tia kairiri i aoia kaaini Kireata ni kabane.”+ 9 Mangaia are e taku Iebeta nakoia unimwaaneni Kireata: “Ngkana kam kaokai bwa N na buakania tibun Ammon, ao e kataenikaiia Iehova ibukiu, ao N na bon riki bwa ami tia kairiri!” 10 A taku unimwaaneni Kireata nakon Iebeta: “Ke e riki Iehova bwa te tia kakoaua* i marenara ngkana ti aki karaoa ae ko taekinna.” 11 Mangaia are e a airi Iebeta ma unimwaaneni Kireata, ao a a karika teuaei aomata bwa aia tia kairiri ao aia mataniwi. Ao Iebeta e a manga kaoki ana taeka ni kabane i matan Iehova i Mitiba.+

12 E a kanakoia ngkanne taan uataeka Iebeta nakon aia uea tibun Ammon,+ ma ni kangai: “Tera te bwai ae ko a bon ekainako iai,* ngkai ko a roko ni buakana abau?” 13 Mangaia are e taku aia uea tibun Ammon nakoia ana tia uataeka Iebeta: “Ibukina bwa a anaa abau tibun Iteraera ngke a otinako mai Aikubita,+ are man te Arenon+ nakon te Iaboka ao ni karokoa te Ioretan.+ Kaokia ngkai ma te raoi.” 14 Ma e kaokiia taan uataeka Iebeta nakon aia uea tibun Ammon, 15 bwa a na kangai nakoina:

“E kangai ana taeka Iebeta: ‘A aki anaa abaia tibuni Moaba+ ao tibun Ammon,+ tibun Iteraera, 16 bwa a mwananga rinanon te rereua ni karokoa Taari ae Uraura tibun Iteraera ngke a otinako mai Aikubita,+ ao a roko i Kateti.+ 17 Ao a kanakoia taan uataeka tibun Iteraera nakon uean Etom,+ ma ni kangai nakoina: “Taiaoka ma kariaia bwa ti na rinanon abam,” ma e aki kan ongo uean Etom. A kanakotaeka naba nakon ueani Moaba,+ ma e aki naba kariaia. Mangaia are a a teimatoa ni maeka i Kateti tibun Iteraera.+ 18 Ngke a mwananga rinanon te rereua, ao a katobibia te aba ae Etom+ ao te aba ae Moaba. A mwananga rimainikun te aba ae Moaba+ ao a kaembwa n aonon te Arenon. A aki roko n tiani Moaba,+ bwa te Arenon bon tiani Moaba.

19 “‘Imwin anne ao a a kanakoia taan uataeka tibun Iteraera nakon Taion are aia uea taian Amoraite, are uean Etiibon, ao a taku nakoina tibun Iteraera: “Taiaoka ma kariaia bwa ti na rinanon abam nakon ara tabo.”+ 20 Ma e aki onimakinia tibun Iteraera Taion bwa a na mwananga rinanon ana aono, mangaia are e a ikotiia ana aomata ni kabane Taion, ao a katei aia umwanrianna i Iaati ao a buakania tibun Iteraera.+ 21 Ibukin anne ao Iehova ae Atuan Iteraera e a anga Taion ma ana aomata ni kabane nako nanoni baia tibun Iteraera, mangaia are a a kataenikaiia taian Amoraite ake kaain te aba anne tibun Iteraera, ao a anai abaia ni kabane.+ 22 Mangaia are a taua aia aono taian Amoraite ni kabutaa, man te Arenon nakon te Iaboka, ao man te rereua nakon te Ioretan.+

23 “‘Bon Iehova ae Atuan Iteraera are e kakioianako taian Amoraite mai mwaia ana aomata aika tibun Iteraera,+ ao ngkai ko nang kakioianako tibun Iteraera? 24 Tiaki ko bon abana ae e anganiko Kemoti+ ae atuam bwa ko na abanna? Mangaia ae aomata nako ake e kakioianako Iehova ae Atuara mai mwaira, ao boni ngaiia aika ti na kakioianako.+ 25 Ko raoiroi riki nakoni Baraka+ are natin Tibore, are ueani Moaba? Te koaua bwa e a tia ni kauntaeka teuaei ma tibun Iteraera, ke te koaua bwa e a tia ni buakania? 26 E aera ngke ko aki kamani kataia n anai ni kaoki n te tai are a maeka iai tibun Iteraera i nanon 300 te ririki i Etiibon ma kaawa ake a mena i aana,*+ ao i Aroera ma kaawa ake a mena i aana, ao ni kaawa ni kabane ake a mena ni mataniwin nako Arenon?+ 27 I aki bure nakoim, ma ko bure ngkai ko buakanai. Ke e motikitaeka+ i marenaia tibun Iteraera ao tibun Ammon n te bong aei, Iehova ae te tia Motikitaeka.’”

28 Ma e aki kan ongo aia uea tibun Ammon n ana rongorongo Iebeta are e kanakoaki nakoina.

29 E roko taamnein Iehova i aon Iebeta,+ ao e mwananga teuaei rinanoni Kireata ao abaia tibuni Manate bwa e na nako Mitibe are i Kireata,+ ao e reitaanako kawaina mai Mitibe are i Kireata nakoia tibun Ammon.

30 Ao e taetae ni bau Iebeta+ nakon Iehova ao e taku: “Ngkana ko anga tibun Ammon nako nanoni baiu, 31 ao ane e otinako mani mataroan au auti ni butimwaeai ngkana I oki ma te raoi mairouia tibun Ammon, ao e na riki bwa ana bwai Iehova,+ ao N na anga te aomata anne bwa te karea ni kabuekaki.”+

32 Mangaia are e a nako Iebeta ni buakania tibun Ammon, ao e anga naakai Iehova nako nanoni bain teuaei. 33 Ao e kamateia n te kamamate ae korakora mai Aroera ni karokoa Minnita, aika kaawa aika 20, ao ni karokoa Aberakeramim. Mangaia are a a taenikai tibun Ammon i mataia tibun Iteraera.

34 N tokina ao e a roko Iebeta n ana auti i Mitiba,+ ao akea bwa e a otinako natina te aine ni butimwaeia ma ni katangitanga te tamboriin* ao ni mwamwaie! Bon tii neiei natin teuaei ae ana rikitemanna. Akea riki i rarikin neiei natina te mwaane ke natina te aine. 35 Ngke e nora neiei, ao e raeuai kunnikaina ao e taku: “Akea ngaira natiu! Ko urua nanou,* bwa ko a riki ngkai bwa te aomata ae I a tia ni kanakoa. I a tia ni kaurea wiu nakon Iehova, ao I a aki kona ni manga kaokia.”+

36 Ma e taku nakon teuaei: “Tamau, ngkana ko a tia ni kaurea wim nakon Iehova ao karaoa nakoiu are ko a tia ni beritanna,+ kioina ngkai e a tia Iehova ni karokoa te karekekai ibukim i aoia aiam, aika tibun Ammon.” 37 Ao e taku neiei nakon tamana: “Ke e karaoaki aei nakoiu: Kariaia bwa N na tiku n tii ngai i nanon uoua namwakaina, ao kariaia bwa N na nako nakoni maunga, ao kariaia bwa N na tanginiweneia arou n ataeinnaine ma raou aika aine.”*

38 Ao e taku teuaei: “Naako!” Mangaia are e kanakoa i nanon uoua namwakaina, ao e nako nakoni maunga ma raona nako bwa e na tanginiweneia iai arona n ataeinnaine. 39 Ngke a a koro namwakaina ake uoua ao e a okira tamana, ao imwin anne e a kakororaoa teuaei ana taetae ni bau ni kaineti ma neiei.+ E aki roko n te wene n taanga neiei ma te mwaane temanna. Ao e a riki aei bwa te katei* i Iteraera, 40 ae n te ririki teuana ma teuana ao a nanako ateiaine aika tibun Iteraera ni kamoamoaa natin Iebeta are te I-Kireata, abong i nanon teuana te ririki.