Taian Areru

Te kaetieti nakon te mataniwi n te anene. Ana anene Tawita.

20 E bia kaekako Iehova ni bongin te rawawata.

E bia kamanoko aran Atuan Iakoba.+

2 E bia kanakoa nakoim te ibuobuoki man te tabo ae tabu,+

Ao ni kateimatoako mai Tion.+

3 E bia uringi am karea nako aika bwaai n tituaraoi,

E bia kukurei* ni butimwaea am karea ni kabuekaki. (Tiera)

4 E bia anganiko baika e tangiri nanom,+

Ao ni kakororaoi am babaire* ni kabane.

5 Ti na takarua ni kimwareirei ibukin am mwakuri ni kakamaiu,+

Ti na tabeki ara kanikina ni kamoamoaa aran Atuara.+

E bia kakororaoi am bubutii ni kabane Iehova.

6 I a ataia ngkai bwa e kamaiua ana aomata ae kabiraki Iehova.+

E kaekaa man ana tabo ae tabu i karawa,

N te kakamaiu* ae korakora ni baina are te atai.+

7 Tabeman a onimakini kaa ni buaka ao ake tabeman aoti,+

Ma ti taboa ngaira aran Iehova ae Atuara.+

8 A konaaki ao a bwaka,

Ma ti a manga teirake ngaira ao ti tei ni kaetiira.+

9 Kamaiua te uea ngkoe ae Iehova!+

E na kaekaira n te bong ae ti wewete iai ibukini buokara.+