Ioera
3 “Bwa noria! ni boong akanne ao n te tai anne,
Ngkana I a kaokiia taenikai aika kaain Iuta ao kaain Ierutarem,+
2 Ao N na ikotiia naba natannaomata ni kabane
N na motiki taekaia ikekei+
Ibukia au aomata ao tibwangau ae Iteraera,
Bwa a kamaenakoia i buakoia natannaomata,
Ao a tibwatibwaa abau i marenaia.+
3 A karaoa te ananga ni katekeraoi ibukia au aomata,+
Ao a iokinibwaia te teei ae te mwaane bwa boon te aine ae kakabooaki,
Ao a kaboonakoa te teei ae te aine ibukin te wain bwa a na moi iai.
4 Kam kangaa ni karaoa aei nakoiu,
Ngkoe ae Turo ao Titon ao aononi Biritia ni kabane?
Kam kabooa mwin te bwai ae buakaka are I a tia ni karaoia nakoimi?
Ngkana kam kabooa mwin au mwakuri,
Ao N na waekoa ao n ienikuri ni manga kaoka nako aon atumi, ami mwakuri ni kaboomwi.+
5 Ibukina bwa kam a tia n anai au tirewa ma au koora,+
Ao kam a tia n uotii au bwai aika kakawaki aika taiani kabanea n raoiroi nako nanon ami tembora,
6 Ao kam a tia ni kaboonakoia kaain Iuta ao kaain Ierutarem nakoia I-Kuriiti,+
Bwa kam aonga ni kararoaia man aia aono,
7 Ao noria, N na kaokiia man te tabo are kam kaboonakoia nako iai,+
Ao N na manga kaoka nako aon atumi ami mwakuri ni kaboomwi.
8 N na anga* natimi mwaane ao natimi aine nako nanoni baia kaain Iuta,+
Ao ane a na anga ngaiia nakoia rorobuakan Tieba, nakon te natannaomata ae raroanako,
Bwa bon Iehova ae taekinna.
9 Katanoataa ae kangai i buakoia natannaomata:+
‘Katauraoi ibukin* te buaka! Kauekei nanoia mwaane aika korakora!
Ke a bane tautia ni keerake, ke a kanenei!+
10 Ororei ami bwai ni kamarautano bwa ami kabaang, ao ami bwai ni koromwaanga bwa ami kainiwai.
Ke e kangai te aomata ae mamaara: “I korakora.”
11 Nakomai ao ibuobuoki, ngkami aika natannaomata nako aika uakaan ni kabane, ao ikotaki ni kabane!’”+
Karuoia am aomata aika korakora* Iehova nakon te tabo arei.
12 “Ke a teirake natannaomata ao a nakon ana Mwarua* Ieotiabata,
Bwa N na tekateka ikekei bwa N na bane ni motiki taekaia natannaomata aika uakaan ni kabane.+
13 Kam na arora te biti n tai bwa e a tawaa te uaa.
Nakomai ruuo ao toutou, bwa e a onrake te nne ni kamanti kureebe.+
A a taonako taiani bukibuki, bwa e a bati buakakaia.
14 A mena aomata aika uanao n te mwarua* ae te tabo ni motikitaeka,
Bwa e a kaan ana bong Iehova n te mwarua* ae te tabo ni motikitaeka.+
15 A na roo taai ma namwakaina,
Ao a na akea ootan taian itoi.
16 Ao e na bekorara Iehova mai Tion,
E na kanenea bwanaana mai Ierutarem.
Ao a na mwainging karawa ma aonnaba,
Ma e na riki Iehova bwa te tabo ni kamanomano ibukia ana aomata,+
Ao te tabo ni kamaiu ibukia tibun Iteraera.
17 Ao ane kam na ataia bwa bon Iehova ngai ae Atuami, ae I mamaeka i Tion ae au maunga ae tabu.+
18 N te bong anne ao e na timtim te wain ae karewe n taiani maunga,+
A na raanga rannimammaia maan n taian tabuki,
Ao a na bane karaanga ake i Iuta n raanga iai raan.
E na raanganako te koburake n ran n otinako man ana auti Iehova,+
Ao e na teboka te Mwarua ae Titim.*
19 Ma e na kamaroaeaki Aikubita,+
Ao e na riki Etom bwa te rereua ae kamaroaeaki,+
Ibukin te iowawa are karaoaki nakoia kaain Iuta,+
Are a katutua i abaia naakai raraaia aomata aika akea aia bure.+
20 Ma e na teimatoa ni maekanaki Iuta
Ao Ierutarem man te rorona nakon te rorona.+