Karikani Bwaai

39 Ao a kairaanako Ioteba nako Aikubita+ tibun Itimaera.+ Ao e kabooaki ikekei mairouia naakai iroun te I-Aikubita ae arana Botiba+ ae te mataniwi temanna n ana auti Barao, ao mataniwia taan tantani. 2 Ma e memena Iehova iroun Ioteba.+ Ibukin anne ao e riki bwa te aomata ae nakoraoi arona, ao e a mwiokoaki ni batan ana toka are te I-Aikubita. 3 Ao e noria ana toka bwa e memena Iehova irouna ao e noria naba bwa e kanakoraoi bwaai ni kabane Iehova ake e karaoi teuaei.

4 E teimatoa n akoaki Ioteba iroun teuaei ao e a riki bwa te tia buoka teuaei. Mangaia are e a rineia bwa te mataniwi ni batana, ao e mwiokoia n ana bwai ni kabane. 5 Man te tai are e rinea iai Ioteba bwa te mataniwi ni batana ao ni mwiokoia n ana bwai ni kabane, ao e teimatoa Iehova ni kakabwaiaa batan te I-Aikubita aei ibukin Ioteba, ao e roko ana kakabwaia Iehova i aon ana bwai ni kabane ake ni batana ao ake n te tawaana.+ 6 N tokina ao e a katikui ana bwai nako i aan ana tararua Ioteba ao akea te bwai teuana ae e tabe iai, ma tii te amwarake are e kanna. Ma e rikirake Ioteba bwa te mwaane ae teiraoi rabwatana ma ni botonimwaane.

7 Imwini baikai ao e a moanna buun ana toka n tataana Ioteba ao e taku: “Weene ma ngai.” 8 Ma e rawa teuaei ao e taku nakoni buun ana toka: “Noria, akea raraoman au toka n te bwai ae I karaoia n te auti ao e onimakinai n ana bwai nako bwa N na tararuai. 9 Akea temanna ae kakannato riki nakoiu n te auti aei, ao akea te bwai naba teuana ae e taua mairou ma tii ngkoe, ibukina bwa boni buuna ngkoe. Mangaia ae N na kangaa ni karaoa te buakaka ae korakora aei ao ni bure nakon te Atua?”+

10 Ma e tataetae neiei nakon Ioteba ni katoabong, ma e aki roko n te kariaia teuaei bwa e na wene ma ngaia ke n tiku i rarikina. 11 Ma n te bong teuana ngke e rinnako teuaei n te auti bwa e na karaoa ana mwakuri, ao ai akea te toro temanna ae kaain te auti ae mena n te auti. 12 E tinea ngkanne ana kunnikai teuaei neiei ao e taku: “Weene ma ngai.” Ma e katuka kunnikaina i bain neiei ao e birinako n otinako. 13 Ngke e noria naba ngkekei neiei bwa e katuka kunnikaina teuaei i baina ao e birinako n otinako, 14 ao e a takarua neiei nakoia tooro ake n ana auti ao e taku nakoia: “Noria! E kaira nakoira te mwaane ae te Ebera aei bwa e na karikira bwa bwaai ni ngareakinaki. E kawarai bwa e na wene ma ngai ma I tatakarua ni kabanea takaruau. 15 Ngke e ongo naba ngkekei bwa I kanenea bwanaau ma n tatakarua, ao e katuka kunnikaina i rarikiu ao e birinako n otinako.” 16 Imwin anne ao e kaaki kunnikain teuaei i rarikina ni karokoa okini Botiba nakon ana auti, are ana toka Ioteba.

17 Ao e tuanga teuarei taeka naba akekei neiei, ni kangai: “E kawarai bwa e na karikai bwa te bwai ni ngareakinaki, te toro are te Ebera are ko kairia nakoira. 18 Ma ngke I kanenea bwanaau ma n takarua, ao e a katuka naba kunnikaina i rarikiu ao e birinako n otinako.” 19 Ngke e ongo naba ngkekei ana toka Ioteba ana taeka buuna ake e taekin nakoina ni kangai: “Aikai baika e karaoi nakoiu am toro,” ao e urarake unin teuaei. 20 Ngaia are e a kairaki Ioteba iroun ana toka, ao e karinna n te karabuuti ae a kakamatawarikaki iai ana bure te uea, ao e a tiku teuaei n te karabuuti.+

21 Ma e memena Iehova iroun Ioteba ao e kaokaota nakoina te tangira ae koaua,* ao e anganna te akoaki irouni mataniwin te karabuuti.+ 22 Mangaia are e mwiokoa Ioteba mataniwin te karabuuti bwa e na mataniwi i aoia buure ni kabane n te karabuuti, ao boni ngaia ae e bairei karaoani bwaai nako ake a karaoaki iai.+ 23 Akea te bwai teuana ae e tabeakinna mataniwin te karabuuti ae mena i aan ana tararua Ioteba, bwa e memena Iehova iroun Ioteba ao e kanakoraoi bwaai ni kabane Iehova ake e karaoi teuaei.+