Etekiera
8 Ao n te kaonoua n ririki n te kaonoua n namwakaina ae nimaua iai bongin te namwakaina, ngke I tekateka i nanon au auti ao a tekateka unimwaanen Iuta i matau, ao e tauai bain te Uea ae Moan te Rietata ae Iehova ikanne. 2 Ngke I mataku, ao I nora buran te aomata ae kaanga taraan te ai, ao iai te ai i aan te baere kaanga taraani bebeena,+ ao e raneanea taraani bebeena rake, n aron takiakian te bwai ae te biti ae karaoaki man te koora ae renganaki ma te tirewa.+ 3 Ao e arora te bwai ae kaanga buran te bai, ao e tauai man irannatuu aika buabuataki, ao e uotainako te taamnei* rimarenan te aonnaba ma karawa. Ao e kairai nako Ierutarem n taiani miitara mairoun te Atua, nakoni kawaini mataroan te oo are mai nanona+ ae kaitaraa meang, ike e tei iai te bouannanti ni katauaninne, ae kauekea te tauaninne.+ 4 Ao noria! e mena ikekei mimitongin Atuan Iteraera,+ ae ai aron taraan are I noria n te tabo ae aoraoi.+
5 E taku ngkanne nakoiu: “Natin te aomata, taiaoka euta matam ni kaitaraa meang.” Mangaia are I euta matau ni kaitaraa meang, ao e mena i meangini mataroan oon te baonikarea ikekei, te kanikina* ni katauaninne aei n te kawai n rin. 6 Ao e taku nakoiu: “Natin te aomata, ko nori baika rangi ni buakaka aika riribaaki aika a karaoia ikai tibun Iteraera,+ aika baika karika kararoaan au tabo ae tabu irou?+ Ma ko na bon nori baika riribaaki aika rangi ni buakaka riki.”
7 Ao e kairai nakoni mataroan te katawanang, ao ngke I taraia ao I nora te bwangabwanga n te oo. 8 E taku nakoiu: “Natin te aomata, taiaoka ma kabuburaa riki bwangabwangan te oo anne.” Mangaia are I kabuburaa riki bwangabwangan te oo ao I a nora te kawai n rin. 9 E taku nakoiu: “Rinnako ao nori baika buakaka aika riribaaki aika a karaoi ikai.” 10 Mangaia are I rinnako n noria, ao I nori aeka n taamnei ni kabane aika taamneia baika kawakawa, ao maan aika ribaaki,+ ma aia bouannanti ni kabane aika kamwara* tibun Iteraera.+ A kaaraki ni kataneaki i aon te oo ni katobibia. 11 Ao a tei 70 mai buakoia aia unimwaane tibun Iteraera i matani baikai, ao e tei i buakoia Iaatania are natin Tiaban.+ Ao e toa temanna ma temanna n te baan ibukini kabuekani baika boiarara, i nanoni baina, ao e waerake te bubu ae boiarara mani baika boiarara.+ 12 E taku nakoiu: “Natin te aomata, ko nora te bwai ae a karaoia aia unimwaane tibun Iteraera n te rotongitong, temanna ma temanna n ana ruu ike a kaotaki iai ana bouannanti?* Bwa a taku, ‘E aki norira Iehova. E a tia ni kitana te aba aei Iehova.’”+
13 Ao e reitia ni kangai nakoiu: “Ko na bon nori baika riribaaki aika rangi ni buakaka riki, aika a karaoi.” 14 Mangaia are e kairai nakon te kawai n rin ni mataroan oon ana auti Iehova mai meang, ao I noriia iai aine aika tekateka, ao a tanginiwenei ibukin te atua ae Tammuti.
15 Ao e a manga taku nakoiu: “Ko nora aei ngkoe ae natin te aomata? Ane ko na nori baika riribaaki aika rangi ni buakaka riki nakon aikai.”+ 16 Mangaia are e kairai nakoni katawanangin ana auti Iehova are mai nanona.+ Ao iai mwaane aika tao 25 i rarikini mataroan ana tembora Iehova, i marenan te kaman ma te baonikarea, aika a tinanikua ana tembora Iehova, ao ubuia a kaitaraa mainiku, ao a bobaraaki nakon taai i mainiku.+
17 E taku nakoiu: “Natin te aomata, ko nora aei? Te bwai ae uarereke irouia tibun Iuta karaoani baika riribaaki aikai, ngkai a kaona te aba n te iowawa+ ao n teimatoa ni kaunai? Ao a kaenakoa te mwaanganikai* nakoni bwairiu. 18 Mangaia ae N na karaoa te bwai teuana n uniu ae korakora. E na aki nanokawaki matau ao N na aki naba nanoanga.+ E ngae ngke a tang n takarua i taningau, ma N na bon aki naba ongo irouia.”+