2 Tamuera

13 Ao iai mwaanen Abetarom are natin Tawita ae baaraoi ae arana Tama,+ ao e bwaka n tangira neiei natin Tawita are Amnon.+ 2 E rangi n rawawata Amnon n te aro are e a aoraki ibukini mwaanena are Tama, bwa e tuai ni boo ma te mwaane neiei, ao e taraa ni kangaanga iroun Amnon bwa e na karaoa te bwai teuana nakon neiei. 3 Ao iai raoraon Amnon ae arana Ieonataba+ ae natin Tiimea+ are tarin Tawita. Bon te mwaane ae rangi ni wanawana Ieonataba. 4 Ngaia are e taku teuaei nakoina: “E aera ngkai ko a rangi n rarawawata ni katoa ingabong ngkoe ae natin te uea? E aera ngkai ko aki tuangai?” E kaeka ni kangai Amnon nakoina: “I tangira Tama are mwaanen tariu+ are Abetarom.” 5 E kaekaa ni kangai Ieonataba: “Ko na wene ni nnem ni wene ao bakaaea te aoraki. Ngkana e roko tamam n noriko ao kangai nakoina, ‘Taiaoka ma kanakomaia mwaaneu are Tama bwa e na anganai te amwarake teutana. Ngkana e katauraoa te amwarake i matau are a anganganaki te koraki aika aoraki,* ao N na amwarake iai mai baina.’”

6 Mangaia are e a wene Amnon ni bakaaea te aoraki, ao e a rinnako te uea n noria. E taku ngkanne Amnon nakon te uea: “Taiaoka ma kanakomaia mwaaneu are Tama bwa e na umuni bwerena* aika uoua i matau, bwa I aonga n amwarake mai baina.” 7 Ao e kanakotaeka Tawita nakon Tama n te auti ni kangai: “Taiaoka ma naako nakon ana auti Amnon are mwaanem ao katauraoa te amwarake* ibukina.” 8 Mangaia are e nako Tama nakon ana auti mwaanena are Amnon, ike e wene iai. E anaa te bua ni burawa ao e kaboboa ni karaoi iai bwerena i matan teuarei, ao e kamwai bwerena. 9 N tokina ao e a anaa te baan neiei ao e angan teuarei. Ma e rawa n amwarake Amnon ao e taku: “Kabaneia aomata ni kanakoia mairou!” Ao a a bane ni kitanna aomata.

10 Ao e taku Amnon nakon Tama: “Uota te amwarake* nakon te ruu ni matu bwa I aonga n amwarake mai baim.” Ngaia are e anai bwerena Tama ake e a tia ni karaoi ao e uotii nakoni mwaanena are Amnon i nanon te ruu ni matu. 11 Ngke e uotii nakoina neiei bwa e na amwarake, ao e taua neiei ao e taku: “Mwaaneu, nakomai bwa ko na wene ma ngai.” 12 Ma e taku neiei nakoina: “Tiaki ngaia anne mwaaneu! Tai kabwainrangai, bwa e aki kakaraoaki te aekaki anne i Iteraera.+ Tai karaoa te bwai ae moan te kabwainrang aei.+ 13 N na kangaa ni maiu ma kamaamaeau? Ao ane ko na iangoaki bwa temanna i buakoia mwaane aika rangi ni kabwainranga te aba i Iteraera. Ko na taetae ngkai taiaoka nakon te uea, bwa ane e na aki tauai mairoum.” 14 Ma e rawa n ongo iroun neiei ao e kakorakoraa n taumatoaa neiei ao e kabwainrangnga n taua. 15 Ao Amnon e a ribaa neiei n te riribai ae rangi ni korakora, n te aro are e a korakora riki ribaakin neiei irouna nakon tangirana are e namakinna ngkoa. E taku Amnon nakon neiei: “Teirake ao naako!” 16 Ao e taku neiei nakoina: “Tiaki ngaia anne mwaaneu, bwa kanakoakiu ngkai, e a rangi ni buakaka riki nakon te baere ko a tia ni karaoia nakoiu!” Ma e aki kan ongo iroun neiei.

17 Ao e wetea ana toro ae ataei ao e taku: “Taiaoka ma kanakoa te aomata aei mai matau, ao rokana te mataroa imwina.” 18 (E bwainna neiei n te kamwarai ae okoro,* bwa a bwabwainia ni kunnikai akanne natin te uea aika aine aika tuai ni boo ma mwaane.) Ao ana toro teuarei e kaira neiei ni kaotinakoa, ao e rokana te mataroa imwina. 19 Ao e kaaki te mannang Tama i aon atuna,+ ao e raeuaa te kamwarai are raoiroi are e bwainna, ao e katokai baina i aon atuna ao e taonnako, ao e tang ngke e nakonako.

20 Ao e titirakinna Abetarom are mwaanena+ ni kangai: “E karaoa te baei nakoim mwaanem are Amnon? Teimatoa ngkai ni kainabwabu mwaaneu. Boni mwaanem teuanne.+ Tai kaatuua iangoan te baei i nanom.” Ao e maeka n tii ngaia Tama n ana auti mwaanena are Abetarom. 21 Ngke e ongo taekani baikai ni kabane te Uea are Tawita, ao e a rangi n un.+ Ma e aki kan urua nanon Amnon are natina ibukina bwa e tangiria, ngkai boni ngaia ana karimoa. 22 Ao akea te bwai ae e taekinna Abetarom nakon Amnon ae buakaka ke ae raoiroi, bwa Abetarom e ribaa+ Amnon ibukina bwa e kabwainranga mwaanena are Tama.+

23 Imwini koron raoi ririki aika uoua, ao a mena taani korei buraeia ana tiibu Abetarom i Baaraatiora, i rarikin aban Eberaim.+ Ao e kaoia natin te uea ni kabane aika mwaane Abetarom.+ 24 Ngaia are e rinnako Abetarom nakon te uea ao e taku: “A a koroburaeaki ana tiibu am toro. Taiaoka ma ke e irai te uea ma ana toro.” 25 Ma e taku te uea nakon Abetarom: “Tiaki ngaia anne natiu. Ngkana ti bane n nako, ao ane ti na karawawatako.” E ngae ngke e teimatoa ni kaumakia ma e bon aki kariaia bwa e na iri, ma e a taetae naba ni kakabwaiaa. 26 E taku ngkanne Abetarom: “Ngkana tiaki ngkoe ao taiaoka ma kariaia Amnon are tariu bwa e na irira.”+ Ao te uea e kaekaa ni kangai: “Bukin tera bwa e na iriko?” 27 Ma e kaumakia Abetarom ngaia are e a kanakoa Amnon ma natin te uea ni kabane aika mwaane bwa a na iria.

28 E a tua ngkanne Abetarom nakoia ana toro ni kangai: “Taraia raoi bwa ngkana e a kukurei nanon Amnon man te wain, ao ane N na kangai nakoimi, ‘Kamatea Amnon!’ Ao kam riai ni kamatea. Tai maaku. Tiaki boni ngai ae I tua nakoimi? Kam na korakora ao ninikoria.” 29 Ao ana toro Abetarom a karaoa raoi are e tua Abetarom bwa a na karaoia nakon Amnon. Ao a bane n teirake natin te uea ake mwaane ao a toka i aon aia miure n tatabemania nako ao a birinako. 30 I aoni kawaia naakai ao e a roko te rongorongo iroun Tawita ae kangai: “E kamateia natin te uea ni kabane aika mwaane Abetarom, ao akea temanna ae maiu.” 31 Ao e teirake te uea ao e raeuai kunnikaina ao e wene i aontano, ao a bane n tei i rarikina ana toro ma kunnikaia aika raeuaaki naba.

32 Ma e taku Ieonataba+ are natin Tiimea+ are tarin Tawita: “Ke e tai iangoia au toka ae a kamateia ni kabane natin te uea aika mwaane ake a ataei, bwa tii Amnon ae mate.+ E riki aei man ana tua Abetarom, are e motikia bwa e na karaoa aei+ man te bong are e kabwainranga iai Tama+ are mwaanena Amnon.+ 33 Ngaia ae ke e tai mutiakina* te rongorongo ae kangai au toka ae te uea, ‘A a bane ni mate natin te uea aika mwaane,’ bwa tii Amnon ae mate.”

34 N te tai anne ao e a birinako Abetarom.+ Imwina riki ao e a euta matana te tia tantani ao e a noria bwa a bati aomata ake a a roko man te kawai are i akuna, are i rarikin te maunga. 35 Ao e taku Ieonataba+ nakon te uea: “Noria! A a oki natin te uea, n aron are e a tia n taekinna am toro.” 36 Ngke e moti ana taeka ao a a rin naba natin te uea ma n tang n takarua. Ao e tang naba ni korakai te uea ma ana toro ni kabane. 37 Ma e birinako Abetarom ao e nakon Taremai+ are natin Ammiuta are ueani Keturi. Ao e tanginiweneia natina Tawita i nanoni boong aika bati. 38 Imwini birinakon Abetarom ao nakona nako Keturi,+ ao e a tiku ikekei i nanon tenua te ririki.

39 N tokina ao e a bora te Uea are Tawita ni kan nako n nora Abetarom, bwa e a tia n toki unna ni kaineti ma* maten Amnon.