Ieremia
29 Aikai taekan te reta are e kanakoa Ieremia are te burabeti mai Ierutarem nakoia nikiraia unimwaane ake i buakoia taenikai, ibonga,* burabeti, ao aomata ni kabane, ake e kairiianako Nebukaneta bwa taenikai mai Ierutarem nako Baburon, 2 imwin otinakoia mai Ierutarem te Uea are Iekonia,+ tinan te uea,+ mataniwi, tokan Iuta ma Ierutarem, ao taani karaobwai aika mwaatai ma taani mwakuria te biti.*+ 3 E kanakoa te reta ni bain Erata are natin Tiaban,+ ao Kemaria are natin Irekia, ake e kanakoia Tetekia+ are Uean Iuta nako Baburon, nakon Nebukaneta are Ueani Baburon. E kangai taekana:
4 “E kangai ana taeka Iehova ae Atuaia taanga ni buaka* ae Atuan Iteraera, nakoia aomata ni kabane ake taenikai, ake e karaoiia bwa a na nako bwa taenikai mai Ierutarem nako Baburon, 5 ‘Katei auti ao maeka iai. Ununiki n taian onnaroka ao kang uaaia. 6 Karekeia buumi ao karikiia natimi mwaane ma natimi aine. Karekeia buuia natimi mwaane ao aanga natimi aine bwa a na mare, bwa a aonga naba n reke natiia mwaane ma aine. Kamwaitingkami ikanne ao e na tai kerikaaki mwaitimi. 7 Ao ukoukora raun te kaawa are I kataenikaingkami nako iai, ao tataro ibukina nakon Iehova, bwa kam na rau ngkana e rau.+ 8 Bwa e kangai ana taeka Iehova ae Atuaia taanga ni buaka ae Atuan Iteraera: “Tai kariaia ami burabeti ma ami tia kaiwa akana i buakomi, bwa a na mwamwanaingkami,+ ao tai ongo ni mii ake a miia. 9 Bwa ‘a taetae ni burabetini keewe nakoimi n arau. I aki kanakoia,’+ bon ana taeka Iehova.”’”
10 “Bwa e kangai ana taeka Iehova, ‘Ngkana a koro ririki aika 70 i Baburon ao N na mutiakiningkami,+ ao N na kakororaoa au berita ni kaokingkami nakon te tabo aei.’+
11 “‘Bwa I ataa te bwai ae N na karaoia nakoimi,’ bon ana taeka Iehova, ‘N na anganingkami te rau ao tiaki te kabuanibwai,+ bwa e aonga n reke iroumi te bwai ae raoiroi nakon taai aika a na roko, ao te kantaninga.+ 12 Ao ane kam na weteai ma n roko ao n tataro nakoiu, ao N na ongo iroumi.’+
13 “‘Ane kam na ukoukorai ao N na reke iroumi,+ bwa kam na kakaaeai ma nanomi ni kabane.+ 14 Ao N na kariaia bwa N na reke iroumi,’+ bon ana taeka Iehova. ‘Ao N na rikoia ami taenikai ao n ikotiingkami ni kabane mai buakoia natannaomata ni kabane, ao man taabo ake I kamaenakoingkami nako iai,’+ bon ana taeka Iehova. ‘Ao N na kaokingkami nakon te tabo are I karaoingkami bwa kam na nako bwa taenikai mai iai.’+
15 “Ma kam taku, ‘E kateirakeia burabeti Iehova ibukira i Baburon.’
16 “Bwa e kangai ana taeka Iehova nakon te uea are tekateka i aon ana kaintokanuea Tawita,+ ao nakoia aomata ni kabane aika maeka n te kaawa aei, ake tarimi ake a aki iriingkami n taenikai, 17 ‘E kangai ana taeka Iehova ae Atuaia taanga ni buaka: “Akea bwa I a kanakoa te kabaang nakoia, te rongo, ao te aoraki ae kamamate,+ ao N na karikiia bwa kaanga biiku aika boka* aika rangi ni buakaka, n te aro are a aikoa kona ni kanaki.”’+
18 “‘Ao N na kaeiia ma te kabaang,+ te rongo, ao te aoraki ae kamamate, ao N na karaoiia bwa te bwai ni kakamaaku nakoia tautaeka n uea ni kabane n te aonnaba,+ ao te katoto ibukia akana karekeaki kaia, ao te bwai ni kamiroaroa, te bwai ae e na katiitii te aba iai,+ ao te bwai ni kabuakakaaki, i buakoia natannaomata ni kabane ake I kamaenakoia nako iai,+ 19 ibukina bwa a aki ongo n au taeka ake I kanakoi nakoia ma au toro aika burabeti,’ bon ana taeka Iehova, ‘ake I okioki ni kanakoia.’*+
“‘Ma kam aki ongo,’+ bon ana taeka Iehova.
20 “Mangaia ae ongora n ana taeka Iehova, ngkami ni kabane aika taenikai, ake I kanakoia mai Ierutarem nako Baburon. 21 E kangai ana taeka Iehova ae Atuaia taanga ni buaka ae Atuan Iteraera, ni kaineti ma Aaba are natini Koraia ao ni kaineti ma Tetekia are natini Maateia, ake a taetae ni burabetini keewe nakoimi n arau,+ ‘Akea bwa I a anga ngaiia nako nanoni bain Nebukaneta* are Ueani Baburon, ao ane e na oreiia i matami. 22 Ao te baere riki nakoia e na riki bwa te katoto nakoia akana karekeaki kaia, ae e na taekinaki irouia taenikai ni kabane aika kaain Iuta ake i Baburon, ae kangai: “E bia karaoiko Iehova bwa ai aron Tetekia ao ai aron Aaba, ake e tinimia ueani Baburon n te ai!” 23 bwa a karaoa te aro ae kabwainrang i Iteraera,+ ni wewene ni kimoa ma buuia raoia, ao n tataekin taeka aika kewe n arau ae I aki tua nakoia.+
“‘“Boni Ngai ae I ataia, ao bon te tia kakoaua ngai,”+ bon ana taeka Iehova.’”
24 “Ao ko na kangai nakon Temaia+ are kaain Neerama, 25 ‘E kangai ana taeka Iehova ae Atuaia taanga ni buaka ae Atuan Iteraera: “Ibukina bwa ko kanakoi reeta n aram nakoia aomata ni kabane ake i Ierutarem, nakon Tebania+ are natini Maateia are te ibonga, ao nakoia ibonga ni kabane, ni kangai, 26 ‘E a tia ni karikiko Iehova bwa te ibonga n onea mwin Ieoiata are te ibonga, bwa ko na riki bwa te mataniwi n ana auti Iehova, ao ko na tararuaa te aomata ae rangirang ae baka n riki bwa te burabeti, ao ko na kaaki teuanne n te bwai ni kabaewae ao n te kai ni kabaeroroa,+ 27 e aera ngkanne ngkai ko aki boaa Ieremia are kaain Anatota,+ are baka n riki bwa te burabeti ibukimi?+ 28 Bwa e kanaanako naba nakoira i Baburon, ni kangai: “Bon te tai ae e na maan! Katei auti ao maeka iai. Ununiki n taian onnaroka ao kang uaaia,+—”’”’”
29 Ngke e wareka te reta aei Tebania+ are te ibonga ao e ongora te burabeti are Ieremia, 30 ao e roko ana taeka Iehova iroun Ieremia, ae kangai: 31 “Kanaanako nakoia taenikai ni kabane, ni kangai, ‘E kangai ana taeka Iehova ni kaineti ma Temaia are kaain Neerama: “Ibukina bwa e taetae ni burabeti nakoimi Temaia, e ngae ngke I aki kanakoa ao e kataia ni kairingkami bwa kam na onimakini keewe,+ 32 mangaia ae e kangai ana taeka Iehova, ‘Akea bwa I a katuuaaea Temaia are kaain Neerama ma kanoana. Akea ana koraki temanna ae e na reke maiuna i buakoia aomata aikai, ao e na aki nora te bwai ae raoiroi ae N na karaoia ibukia au aomata,’ bon ana taeka Iehova, ‘bwa e a tia ni kauekea te karitei nakon Iehova.’”’”