1 Tamuera
9 Iai te mwaane temanna ae tibuni Beniamin ae arana Kiti,+ ae natin Abiera, ae natin Terora, ae natini Bekorata, ae natin Abiaa, ae tibuni Beniamin,+ ao te mwaane ae rangi ni kaubwai. 2 Iai natina te mwaane ae arana Tauro,+ ae ataei ao e botonimwaane, akea te mwaane i buakoia tibun Iteraera ae botonimwaane riki nakoina, ao e abwabwaki riki nakoia aomata ni kabane mai angana ni waerake.
3 Ngke a a bua taongki* aika ana man taman Tauro are Kiti, ao e taku Kiti nakon natina are Tauro: “Taiaoka ma kaira temanna mai buakoia tooro ao naako kakaaeia taongki.” 4 A mwananga rinanon aonon Eberaim ae maungaunga ao rinanon te aba ae Tiaritia, ao a aki reke irouia. A mwananga rinanon te aba ae Tiaarim, ma akea naba taongki ikekei. A mwananga rinanon abaia tibuni Beniamin ni kabutaa, ao a aki reke irouia.
5 Ao a a roko n te aba ae Tuba, ao e taku Tauro nakon ana toro are raona: “Ti a nako n oki, bwa e a kaawa n raraoma tamau ibukira ao ai tiaki ibukia taongki.”+ 6 Ma e kaeka ni kangai te toro arei: “Noria, e mena ana aomata te Atua n te kaawa aei, ae te mwaane ae karineaki. E na boni koro bukini bwaai ni kabane aika e taekin.+ Ti a nako ikekei ngkai. Tao e kona n tuangira kawaira ae ti na nako iai.” 7 Ao e taku Tauro nakon ana toro arei: “Ngkana ti nako ao tera uotara nakon teuanne? Ai akea te kariki n ara baeki. Akea te bwai teuana ae ti na uotia bwa ara bwaintangira nakon ana aomata te Atua ae koaua. Tera ae iai iroura?” 8 Mangaia are e a manga kaekaa Tauro ni kangai te toro arei: Noria! Iai i nanoni baiu te tirewa ae te kaamwakoro te tiekera.* N na angan ana aomata te Atua ae koaua, ao e na tuangira kawaira ae ti na nako iai.” 9 (N taai ake ngkoa i Iteraera, ao aei te bwai ae e tataekinna te aomata ngkana e na nako n ukoukora te Atua: “Nakomai bwa ti a nakon te tia matairiki.”+ Bwa te burabeti ni boong aikai e araranaki bwa te tia matairiki n taai ake ngkoa.) 10 Ao e taku Tauro nakon ana toro arei: “E raoiroi te bwai ae ko taekinna. Ti a nako.” Mangaia are a a nakon te kaawa are e mena iai ana aomata te Atua ae koaua.
11 Ngke a a waerake ni kawain ararakean te kaawa, ao a a kaitiboo ma ateiaine aika otinako n itiran. Mangaia are a taku nakoia: “E mena n te tabo aei te tia matairiki?”+ 12 A kaeka ni kangai: “Eng. Noria, ane imwaimi. Kawaekoaingkami ngkai, bwa e roko n te kaawa n te bong aei, ibukina bwa a anga aia karea aomata+ n te bong aei n te tabo ae rietata.+ 13 N te tai are kam roko iai n te kaawa, ao ane e na reke iroumi imwain ae e waerake nakon te tabo ae rietata bwa e na amwarake. A na aki amwarake aomata ni karokoa ae e roko, bwa boni ngaia ae e na kakabwaiaa te karea. Ngkana e tia anne, ao a a kona n amwarake naake a kaoaki. Mangaia ae waerake naba ngkai ao ane e na reke iroumi.” 14 Mangaia are a a waerake nakon te kaawa. Ngke a nang roko i nukan te kaawa, ao e a otinako Tamuera ni kaitiboo ma ngaiia bwa e na waerake nakon te tabo ae rietata.
15 N te bong are imwain rokon Tauro, ao e a tia Iehova n tuanga* Tamuera ni kangai: 16 “Ningabong tao n taina naba aei ao N na kanakoa nakoim te mwaane mai abani Beniamin.+ Ko na kabiria bwa te tia kairiri i aoia au aomata aika tibun Iteraera,+ ao e na kamaiuia au aomata mai nanoni baia I-Biritia. I a tia n nora karawawataaia au aomata, bwa e roko tangia irou.”+ 17 Ao Tamuera ngke e nora Tauro, ao e tuangnga Iehova ni kangai: “Anne te mwaane are I taekinna nakoim ni kangai, ‘E na tautaekania au aomata teuaei.’”+
18 Ao Tauro e kaania Tamuera i nukani mataroan te oo ao e taku: “Taiaoka ma tuangai, e nga ana auti te tia matairiki?” 19 Ao Tamuera e kaekaa Tauro ni kangai: “Boni ngai te tia matairiki. Waerake rimoau nakon te tabo ae rietata ao kam na amwarake ma ngai n te bong aei.+ N na kanakoko n te moaningabong, ao N na tuangko bwaai ni kabane aika ko kan atai.* 20 Ni kaineti ngkanne ma taongki ake a bua tenibong n nako,+ tai raraoma irouia bwa a a tia n reke. Ao antai ana bwai baika tangiraki ni kabane i Iteraera? Tiaki bon am bwai ao aia bwai kaaini batan tamam ni kabane?”+ 21 Ao e kaeka ni kangai Tauro: “Tiaki bon tibuni Beniamin ngai are te kabanea n uarereke mai buakoia aia baronga tibun Iteraera,+ ao au utu te kabanea ni mangori i buakoia utun nako te baronga ae Beniamin? Mangaia ae e aera ngkai ko taetae n aron anne nakoiu?”
22 Ao Tamuera e kaira Tauro ma ana toro ao e kairiia nakon te tabo n amwarake, ao e angania nneia ae moan te rine i buakoia te koraki ake a kaoaki, bwa iai mwaane aika tao 30. 23 E taku Tamuera nakon te tia kuuka: “Uotaamai te tibwanga are I anganiko ao n tuangko ni kangai, ‘Kaokoroa.’” 24 Ao e anaa te ranga ma te baere i aona te tia kuuka, ao e kaaki i matan Tauro. Ao e taku Tamuera: “E kaakaki i matam te bwai ae e a tia ni kaokoroaki. Amwarake, ibukina bwa a a tia ni kaokoroa ibukim ibukin te tai aei, bwa I tuangia ni kangai, ‘I kaoia iruwa.’” Mangaia are e amwarake Tauro ma Tamuera n te bong anne. 25 Ao a ruo rikaaki man te tabo ae rietata+ nakon te kaawa, ao e teimatoa teuarei n taetae ma Tauro i taubukin te auti. 26 Ao a utimwaaka ao ngke e a tabwena mainiku ao Tamuera e wetea Tauro i aon taubukin te auti ao e kangai: “Katauraoiko bwa I aonga ni kanakoko.” Mangaia are e katauraoia Tauro ao e uaia n otinako ma Tamuera. 27 Ngke a a ruo rikaaki nako tabon te kaawa ao e taku Tamuera nakon Tauro: “Tuanga te toro anne+ bwa e na rimoara,” mangaia are e a rimoa. “Ma ko na tei ngkoe ngkai n aki kakammwakuri, bwa I aonga ni kaongoraeko ana taeka te Atua.”