Taeka N Rabakau
26 N aron te tino n tain te kabuebue ao n aron te karau n tain te tai,
Ao ai aron naba te karineaki bwa e aki tau ibukin ane e nanobaba.+
2 N aron te mannikiba ae iai bukini birinakona ao te tuwaaro ae iai bukini kibana,
Ao ai aron naba te rekenikai bwa e aki roko n akea bukina.*
3 Te kai ni kataere bon ibukin te aoti, ao te bwe bon ibukin te taongki,+
Ao te kai boni kain nukaia aomata aika nanobaba.+
4 Tai kaekaa ane e nanobaba ni kaineti ma nanobabana,
Bwa ko aonga n aki karokoko n ana karinan.*
5 Kaekaa ane e nanobaba ni kaineti ma nanobabana,
Bwa e aonga n aki iangoia bwa e wanawana.+
6 N aron te aomata ae kamwaukui oini waena ma ni karuanikaia i bon irouna,*
Ao ai aron naba ane e mwiokoa te aomata ae nanobaba ni bwaai tabeua.
7 N aron rangan ane e mwauku aika waeturatura,*
Ao ai aron naba te taeka n rabakau i wia aomata aika nanobaba.+
8 N aroni kabaeakin te atibu ma te bana,
Ao ai aron naba anganakin ane e nanobaba te karineaki.+
9 N aron te aroka ae kateketeke ae mena i nanoni bain te tia kokoro ni manging,
Ao ai aron naba te taeka n rabakau i nanoni wia aomata aika nanobaba.
10 N aron te tia katebe ae kakatebe n aki akaka,*
Ao ai aron naba ane e kabooa kammwakuran ane e nanobaba ke te koraki aika rirarikina.
11 N aron te kamea ae okira mumutana,
Ao ai aron naba ane e nanobaba ngkana e kaokioka nanobabana.+
12 Ko a tia n nora te aomata ae iangoia bwa e boni wanawana?+
E reke riki aron ane e nanobaba nakoina.
13 E taku ane e taningaroti: “Iai te raian ae ataei i nanon te kawai,
Te raian ni maraen te kaawa!”+
15 E karina baina te aomata ae taningaroti nako kabin te boora n amwarake,
Ma e a rangi ni kua ni kaokia nakoni wina.+
16 E iangoia ane e taningaroti bwa e wanawana riki
Nakoia aomata aika itiman ake a kaeka n te aro n rabakau.
17 N aron te aomata ae taui taningan te kamea,
Ao ai aron naba ane e mwananga ao e a rangi ni maraki naba nanona n* te kauntaeka ae akea irekerekena iai.+
18 N aron te aomata ae rangirang ae kareteke ni kaai ni kareteke aika ura ma kanoani kainikatebe aika kamamate,
19 Ao ai aron naba te aomata ae mwamwanaa raona n aomata ao e kangai, “Kai I boni manikangare!”+
20 Ike akea iai te aia ao e mate te ai,
Ao ike akea iai te tia uarao ao e toki te kauntaeka.+
21 N aron te mwaakaro ae boou ae kateimatoai uran taiani mwaakaro nikawai, ao te aia nakon te ai,
Ao ai aron naba te aomata ae kauekea te itabarara bwa e kauekea te kauntaeka.+
22 Ana taeka te tia uarao kaanga ai aron taian amwarake aika kangkang,*
A ienikuriaki n ongaki ao a ruo rikaaki nakon te biroto.+
23 N aron te tirewa ae kabiraki iai aon te maibi ni kaatibu,
Ao ai aron naba taeka aika tatangira aika nako man* te nano ae buakaka.+
24 Te aomata ae riribaia tabemwaang e karabaa ni wina,
Ma e kaikoa te mwamwanaa te aba i nanona.
25 E ngae ngke e taetae n te aro ae tangiraoi ma tai onimakinna,
Bwa a mena i nanona baika itiua aika riribaaki.*
26 E ngae ngke e raba ana riribai n te mwamwanaa te aba,
Ma e na boni kaotaraeaki buakakana i buakon te botaki n aomata.
27 Ane e kena te mwarua ao e na bwaka i nanona,
Ao ane e karabinoaanako te atibu ao e na manga okiria n taonna.+
28 Te newe ae kewekewe e ribaiia te koraki ake e karawawataia,
Ao te wi ae taetae ni karang e karekea te kabuanibwai.+