1 Tamuera

31 Ao I-Biritia a buakania tibun Iteraera,+ ao a birinako mwaane aika tibun Iteraera mai mwaia I-Biritia, ao a bati aika kamateaki i aon te Maunga ae Kireboa.+ 2 Ao a teimatoa I-Biritia ni kaeiia Tauro ma natina mwaane ao a a rangi ni kaan. Ao I-Biritia a kamateia Ionatan,+ Abinataba, ao Marekitua, ake natin Tauro.+ 3 E korakora buakanakin Tauro, ao e reke irouia taani katebe, ao e kakaiaki ikoakina irouia taani katebe.+ 4 E taku ngkanne Tauro nakon te tia uouotii ana bwai ni buaka: “Buuta am kabaang ao ewarai iai, bwa a aonga n aki roko mwaane aika aki korotobibiaki+ aikai ni karaoa ae iowawa nakoiu.”* Ma e rawa te tia uouotii ana bwai ni buaka, ibukina bwa e rangi ni maaku. Ngaia are e anaa te kabaang Tauro ao e bwakaria.+ 5 Ngke e noria te tia uouotii ana bwai ni buaka bwa e a mate Tauro,+ ao e bwakara naba ana kabaang ao e mate ma ngaia. 6 Mangaia are a kaai ni mate n te bong anne, Tauro, natina mwaane ake teniman, te tia uouotii ana bwai ni buaka, ao ana rorobuaka ni kabane.+ 7 Ngke a noria tibun Iteraera ake a mena n aonon te mwarua ao n aonon te Ioretan, bwa a a birinako mwaane aika tibun Iteraera, ao a a mate Tauro ma natina, ao a a kitani kaawa ao ni birinako.+ Ao a roko I-Biritia ao a maeka iai.

8 N te bong are imwina ngke a a roko I-Biritia bwa a na kuribwaiia te koraki ake a kamateaki, ao a a kunea Tauro ma natina mwaane ake teniman bwa a bwaka i aon te Maunga ae Kireboa.+ 9 Mangaia are a kabakua roroana ao a buuta ana bwai ni buaka, ao a kanakotaeka ni kabutaa abaia I-Biritia bwa a na kabutaanako te rongorongo+ n aia auti* nako aia bouannanti+ ao i buakoia aomata. 10 Ao a kaaki ana bwai ni buaka teuaei n te auti are a mena iai bouannantin Nei Atitoreta, ao a kabaea rabwatan teuaei ma ooni Betatian.+ 11 Ngke a ongo kaain Iabetikireata+ te baere a karaoia I-Biritia nakon Tauro, 12 ao a bane n teirake taani buaka ao a mwananga ni karokoa ae ngaina ao a anai rabwataia Tauro ma natina ni kanakoi man ooni Betatian, ao a oki nako Iabeti ao a kabueki ikekei. 13 Imwina ao a anai riia+ ao a tauni i aan te aroka ae te tamaritiki i Iabeti,+ ao a aki mamatam i nanon itibong.