1 Tamuera
19 Imwina riki ao e taetae Tauro nakon Ionatan are natina ao nakoia ana toro ni kabane ibukini kamatean Tawita.+ 2 Ibukina ngke e rangi n taatangira Tawita natin Tauro are Ionatan,+ ao e tuanga Tawita ni kangai Ionatan: “E kani kamateko Tauro are tamau. Taiaoka taratara raoi n te moaningabong, ao naako nakon te tabo ae raba ao karabako. 3 N na nako ao N na tei i rarikin tamau n te tawaana are ko na mena iai. N na taekiniko nakon tamau, ao ngkana I ataa te bwai teuana ao N na bon tuangko.”+
4 Ai ngaia are e taetae Ionatan ni karaoiroa Tawita+ nakon tamana are Tauro. E taku nakoina: “E aki riai te uea ni bure nakon ana toro are Tawita, bwa e aki bure nakoim, ao ko kakabwaiaaki man te bwai are e a tia ni karaoia ibukim. 5 E karuanikaia maiuna n tiringa te I-Biritia arei,+ n te aro are e a karokoa te tokanikai* ae korakora Iehova i aoia tibun Iteraera ni kabane. Ko bon noria, ao ko rangi ni kimwareirei iai. Mangaia ae bukin tera bwa ko na bure nakon raraan te aomata ae akea ana bure, n arom n tua kamatean Tawita n akea bukina?”+ 6 E ongo Tauro iroun Ionatan ao e taetae n tuea Tauro ni kangai: “Ngkai bon iai Iehova, ao e na bon aki kamateaki Tawita.” 7 Imwin anne ao Ionatan e wetea Tawita ao e tuangnga baikekei ni kabane. Ao Ionatan e kaira Tawita nakon Tauro, ao e teimatoa ni beku irouna n aron are mai mwaina.+
8 Imwina riki ao e a manga boo naba te buaka, ao e otinako Tawita ni buakania I-Biritia, ao e tiringia n te kamamate ae korakora, ao a birinako mai mwaina.
9 Ao e roko iroun Tauro te iango ae aki rau mairoun Iehova+ ngke e tekateka n ana auti ma ana kainiwai i baina, ngke e tabe Tawita ni katangitanga te abi.+ 10 E kataia Tauro ni kanewea Tawita ma te oo n te kainiwai, ma e katuaa kaina mairoun Tauro, ao e karetekea te oo Tauro n te kainiwai. E birinako ma n rabanako Tawita n te tairiki anne. 11 Imwina riki ao e kanakoia taan uataeka Tauro nakon ana auti Tawita bwa a na tataraa ana auti ao n tiringnga n te moaningabong.+ Ma buun Tawita are Mikara e tuangnga ni kangai: “Ngkana ko aki rabanako n te tairiki aei, ao ko na mate ningabong.” 12 E waekoa Mikara ni karuoa rikaaki Tawita man te kamaama, bwa e aonga ni birinako ma n rabanako. 13 E anaa te bouannanti ae te terebim* Mikara ao e kaaki i aon te nne ni wene, ao e kaaki te kunnikai ae te bwanga ae buraen te kooti ni nnen atun teuarei, ao e rabunna n te kunnikai.
14 Ao e kanakoia taan uataeka Tauro bwa a na kaira Tawita, ma e taku neierei: “E aoraki.” 15 Mangaia are e kanakoia taan uataeka Tauro bwa a na nora Tawita ao e tuangia ni kangai: “Uotiamai nakoiu i aoni nnena ni wene bwa e na kamateaki.”+ 16 Ngke a rinnako taan uataeka, ao e mena te bouannanti ae te terebim* i aon te nne ni wene, ao te kunnikai ae te bwanga ae buraen te kooti ni nnen atuna. 17 E taku Tauro nakoni Mikara: “Bukin tera bwa ko mwamwanaai n te aro aei ao ko kanakoa au kairiribai+ bwa e aonga n rabanako?” E kaeka Mikara nakon Tauro ni kangai: “E kangai nakoiu, ‘Kanakoai bwa I kaawa n tiringko!’”
18 E a birinako ngkai Tawita ao e a rabanako ma n roko iroun Tamuera i Rama.+ Ao e tuangnga bwaai ni kabane ake e karaoi Tauro nakoina. Ao e nako ma Tamuera ao a tiku i Naiota.+ 19 Imwina riki ao e a kaongoaki Tauro ae kangai: “Noria! E mena Tawita i Naiota i Rama.” 20 E aki tabwara Tauro ma e a kanakoia naba taan uataeka bwa a na taua Tawita. Ngke a noriia burabeti ake a a unimwaane bwa a taetae ni burabeti ao e tei Tamuera ao e kairiri i aoia, ao a a ruonaki naba ana tia uataeka Tauro n taamnein* te Atua, ao a a karaoi aroia burabeti.
21 Ngke a kaongoa Tauro, ao e waekoa ni kanakoia taan uataeka riki te korakina, ao a a manga karaoi naba aroia burabeti. Mangaia are e a manga kanakoia taan uataeka aika te katenikoraki Tauro, ao a a manga karaoi naba aroia burabeti. 22 N tokina ao e a nako naba ngaia nako Rama. Ngke e roko n te mwarua n ran ae buburakaei i Teku ao e titiraki ni kangai: “A nga Tamuera ma Tawita?” A kaeka ni kangai: “Ake i Naiota+ i Rama.” 23 Ngke e tabe Tauro ni mwananga mai ikekei nako Naiota i Rama, ao e a ruonaki naba n taamnein te Atua, ao e a nakonako ni karaoa aron te burabeti ni karokoa rokona i Naiota i Rama. 24 E buutii naba kunnikaina ao e karaoa naba aron te burabeti i matan Tamuera, ao e wene ikekei n aki karabaanna* ni kabongnga ao ni kangainaa. Anne bukina ae a kangai iai: “E mena naba Tauro i buakoia burabeti?”+