1 Tamuera
18 N te tai are e tia iai Tawita n taetae nakon Tauro, ao a a kabaeaki naba Ionatan+ ma Tawita n te iraorao ae kaan, ao e a tangiria Ionatan n aron tangirana i bon irouna.+ 2 Man te bong anne ao Tauro e a taua Tawita irouna, ao e aki kariaia bwa e na okira ana auti tamana.+ 3 Ao Ionatan e tangira Tawita n aron tangirana i bon irouna,+ ao e a karaoa te berita ma Tawita.+ 4 E buuta ana kunnikai* are i aona Ionatan ao e angan Tawita, n ikotaki ma ana kunnikai riki tabeua, ana kabaang, ana kainikatebe, ao kabaean nukana. 5 E nanako ni buaka Tawita ao e nanakoraoi ana waaki*+ n taabo ake e kanakoaki nako iai iroun Tauro. Mangaia are e a mwiokoia Tauro i aoia mwaane ake taani buaka,+ ao a bane ni kukurei iai aomata ma ana toro Tauro.
6 Ngkana e oki Tawita ma raona man tiringaia I-Biritia, ao a otinako aine mani kaawa nako ake i Iteraera, n anenene+ ma ni mwamwaie ni kawara te Uea are Tauro, ma taian tamboriin*+ ao taian raea* ma ni kimwareirei. 7 A anene ni kangai aine ake a bukamarua te tai anne:
“E kamateia aiana aika nga ma nga Tauro,
Ao Tawita tatabebwi tenga.”+
8 E a rangi n un Tauro+ ao e aki kukurei n te anene arei, bwa e taku: “A atonga Tawita bwa e tiringia tatabebwi tenga ma a atongai bwa tii nga ma nga. Ai bon tii te nakoa n uea ae e tuai n anganaki!”+ 9 Ao e aki toki Tauro ni mamataukiroa Tawita man te bong anne.
10 N te bong are imwina ao e roko iroun Tauro te iango ae aki rau mairoun te Atua,+ ao e a riki bwa kaanga te rangirang* i nanon te auti ngke e tabe Tawita ni katangitanga te abi+ n arona n taai ake mai mwaina. Ao iai te kainiwai i nanoni bain Tauro,+ 11 ao e kareteke n te kainiwai,+ bwa e taku i nanona: ‘N na kanewea Tawita n te oo!’ Ma e reke birinakon Tawita mairouna uoua te tai. 12 Ao Tauro e a maaka Tawita ibukina bwa e memena irouna Iehova,+ ma e a kitana Tauro.+ 13 Ngaia are e a kanakoa mai matana ao e mwiokoia bwa te mataniwi i aoia tenga. Ao e kairira te taanga ni buaka Tawita nakon te boo ni buaka.*+ 14 E teimatoa Tawita n nakoraoi ana waaki*+ ni bwaai ni kabane ake e karaoi, ao e memena Iehova irouna.+ 15 Ao ngke e noria Tauro bwa e nanakoraoi ana waaki teuaei ao e a maakua. 16 Ma a bane tibun Iteraera ao tibun Iuta n tangira Tawita, ibukina bwa e kaiririia n aia buaka.
17 Imwina riki ao e taku Tauro nakon Tawita: “Aio natiu te aine ae au karimoa ae Meraba.+ N na anga neiei nakoim bwa buum.+ Ma ko riai n teimatoa ni kaota ninikoriam ibukiu, ao ni buaka n ana buaka nako Iehova.”+ Bwa e taku Tauro i nanona: ‘E na aki roko baiu i aona n ekianako. Ke e oreaki ni baia I-Biritia.’+ 18 Ao e taku Tawita nakon Tauro: “Antai ngai ao antai au koraki, ma ana utu tamau i Iteraera, ngkai N na riki bwa buun natin te uea?”+ 19 Ma ngke e a roko te tai are e nang anganaki iai Tawita natin Tauro are Meraba, ao ngaia e a kaman tia n anganaki Ateriera+ are te I-Meorata neiei bwa buuna.
20 Ao Nei Mikara+ are natin Tauro e tangira ma Tawita, ao e kaongoaki Tauro, ao e kukurei iai teuaei. 21 Mangaia are e taku Tauro: “N na anga neiei nakoina bwa e na riki bwa bwaini kamwaneana, bwa e aonga n roko baia I-Biritia i aona.”+ Ao e taku Tauro nakon Tawita n te kauatai: “Ko na imaremare ma ngai* n te bong aei rinanon te aine ae te kauoman aei.” 22 Irarikin anne, e tua Tauro nakoia ana toro ni kangai: “Karabaingkami n taetae nakon Tawita ni kangai, ‘Noria! E kukurei iroum te uea, ao a bane ana toro n tatangiriko. Mangaia ae ko na imaremare ma te uea.’” 23 Ngke a tuanga Tawita baikai ana toro Tauro, ao e taku Tawita: “Te bwai ae uarereke iroumi te imaremare ma te uea, ngkai bon te mwaane ngai ae I maiu ni kainnano ao e karako karineau?”+ 24 Ao a kaongoa Tauro ana toro ni kangai: “Akanne ana taeka Tawita ake e taekin.”
25 Ao e taku Tauro: “Kam riai ni kangai nakon Tawita, ‘Akea boon te buu te aine ae e tangiria te uea+ ma tii 100 kunin taboni mwaaneia+ I-Biritia, bwa ko na karekei kaia aian te uea.’” Bwa e iangoia Tauro bwa e na bwaka Tawita ni baia I-Biritia. 26 Ao ana toro a kaongoa Tawita taeka aikai, ao e a kukurei iai Tawita n riki bwa buun natin te uea.+ Imwain te tai are baireaki, 27 ao e nako Tawita ma ana rorobuaka ao e kamateia mwaane aika I-Biritia aika 200, ao Tawita e uotii kunin taboni mwaaneia ae koro raoi mwaitina nakon te uea, bwa e aonga n riki bwa buun natin te uea. Mangaia are Tauro e anga Mikara are natina nakon teuaei bwa buuna.+ 28 E a ataia Tauro bwa e memena Iehova iroun Tawita,+ ao natina are Nei Mikara e tangira teuaei.+ 29 E a korakora riki iai maakakin Tawita iroun Tauro, ao e a riki Tauro bwa te tia kairiribai nakon Tawita ni kabane bongini maiuna.+
30 A otiotinako aia toka I-Biritia nakon te boo ni buaka, ao ni katoai taai ake a otinako iai ao e nanakoraoi riki ana waaki* Tawita nakoia ana toro Tauro ni kabane,+ ao e a rangi ni karineaki arana.+