1 Tamuera
26 Imwina riki ao a roko mwaanen Tibi+ iroun Tauro i Kibea,+ ao a kangai: “Tiaki e karabarabaa Tawita n te tabuki ae Akira ni kaitaraa Ietimon?”*+ 2 Ngaia are e teirake Tauro ao e ruo rikaaki nakon rereuan Tibi ma mwaane aika rineaki aika tibun Iteraera aika 3,000, bwa a na kakaaea Tawita n rereuan Tibi.+ 3 E kaembwa Tauro i aon te tabuki ae Akira ae kaitaraa Ietimon, i rarikin te kawai. E maeka Tawita n te rereua n te tai anne ao e a ataia ae e rimwina Tauro nakon te rereua. 4 Ngaia are e a kanakoia taani karaba n tutuo Tawita bwa a na kakoauaa ae e bon roko Tauro. 5 Imwina riki ao e a nako Tawita nakon te tabo are e katei iai ana umwanrianna Tauro, ao Tawita e nora te tabo are e wene iai ni matu Tauro ma Abenera+ are natin Nera are te mataniwi n ana taanga ni buaka. E wene ni matu Tauro i nanon te kaembwa ma ana taanga ni buaka aika kaembwa ni katobibia. 6 E taku ngkanne Tawita nakon Aimereka are tibun Eta+ ao Abitiai+ are natin Teruia+ are tarin Ioaba: “Antai ae e na irai n ruo nakon te kaembwa nakon Tauro?” E kaeka ni kangai Abitiai: “N na ruo ma ngkoe.” 7 Mangaia are e a mwananga Tawita ao Abitiai nakon te taanga ni buaka arei ngke e a bong, ao a nora Tauro ni wene ni matu i nanon te kaembwa ma ana kainiwai ae unikaki n te tano i rarikin atuna. Ao a wene ni katobibia teuarei Abenera ma te taanga ni buaka.
8 E a taku ngkai Abitiai nakon Tawita: “E a tia te Atua ni kataenikaia aiam nako nanoni baim+ n te bong aei. Taiaoka ngkai ma kariaia bwa N na kanimmwa ma aontano n te kainiwai aei tii teuana te tai, ao I aki kainnanoa karaoana uatai.” 9 Ma e taku Tawita nakon Abitiai: “Tai kaikoakia, bwa antai ae kona n tabeka baina n ekaanako ana kabiraki Iehova+ ao e na tiku n akea ana bure?”+ 10 E reitia ni kangai Tawita: “Ngkai bon iai Iehova, ao bon Iehova ae e na kamatea,+ ke e na bon roko te bong+ ae e na mate iai, ke e na ruo nakon te boo ni buaka ao e a mate naba.+ 11 Ni kaineti ma ana iango Iehova ao I bon aki kona n iangoa karaoan ae N na tabeka baiu n ekaanako ana kabiraki Iehova!+ Ngaia ae taiaoka ma anaa ngkai te kainiwai ane i rarikin atuna ao nnen te ran, ao ti a nako.” 12 Mangaia are e anaa te kainiwai Tawita ao nnen te ran mai rarikin atun Tauro, ao a a nako. Akea temanna ae noriia+ ke n ataiia ke ae e uti, bwa a bane ni matu, ibukina bwa e bwakariia te matunako mairoun Iehova. 13 Ao e mwananga Tawita nakon iterana are teuana ao e tei i taubukin te maunga n te tabo ae raroa teutana, ao iai te maranga ae bon tau i marenaia.
14 E takarua Tawita nakon te taanga ni buaka arei ao nakon Abenera+ are natin Nera, ni kangai: “Ko na kaekaai Abenera!” E kaeka ni kangai Abenera: “Antai ngkoe ae ko wewete nakon te uea?” 15 E taku Tawita nakon Abenera: “Tiaki bon te mwaane ngkoe? Antai ae ai arom i Iteraera? Mangaia ae e aera ngkai ko aki teimatoa n tararuaa am toka ae te uea? Bwa e rinnako temanna i buakoia tautia bwa e na katiaa aron am toka ae te uea.+ 16 E aki raoiroi te bwai ae ko karaoia. Ngkai bon iai Iehova ao ko bon riai ni mate, ibukina bwa ko aki teimatoa n tararuaa am toka ae ana kabiraki Iehova.+ Taratara nako ngkai! E nga ana kainiwai te uea ao nnen te ran+ ake a mena i rarikin atuna?”
17 Ao Tauro e kinaa bwanaan Tawita ao e taku: “Bwanaam aei natiu ae Tawita?”+ E kaeka Tawita ni kangai: “Boni bwanaau, au toka ae te uea.” 18 E reitia ni kangai: “E aera au toka ngkai e kaea ana toro,+ bwa tera ae I a tia ni karaoia, ao tera ae I bure iai?+ 19 Taiaoka au toka ae te uea, ke e ongora n ana taeka ana toro: Ngkana bon Iehova ae kairiko bwa ko na ekainako, ao ke e butimwaea* au karea ae te amwarake.* Ma ngkana bon aomata aika kairiko,+ ao a a reke kaia i matan Iehova, ibukina bwa a kakioainako n te bong aei ao I a aki mena n te aba ae tibwangan Iehova,+ ao ai aron ae a kangai, ‘Naako tooro irouia atua riki tabeman!’ 20 Ao tai katutua raraau ngkai i aontano ni kanakoa mai matan Iehova, bwa e a tia uean Iteraera n otinako n ukoukora utin te man,+ n aron ae kaanga e kaea te mannikiba ae te bateriti riaoni maunga.”
21 Ao e taku Tauro: “I bure.+ Ko na oki natiu ae Tawita bwa N na aki manga karaoa ae buakaka nakoim, ibukina bwa ko iangoa maiuu* bwa e rangi ni kakawaki+ n te bong aei. Eng, I karaoa te aro n nanobaba ao I karaoa te bure ae kakaiaki.” 22 E kaeka Tawita ni kangai: “Ao aei ana kainiwai te uea. Ke e nakomai n anaia temanna mai buakoia rorobuaka n ataei. 23 Bon Iehova ae e na kabooa mwin ana raoiroi+ ma ana kakaonimaki temanna ma temanna, bwa e a tia Iehova n anga ngkoe nako nanoni baiu n te bong aei, ma I aki kan tabeka baiu n ekaanako ana kabiraki Iehova.+ 24 Noria! N aron ae e rangi ni kakawaki maium* irou n te bong aei, ao e bia rangi ni kakawaki naba maiuu* i matan Iehova, ao e bia kamaiuai mai buakon te rawawata ni kabane.”+ 25 E kaeka Tauro nakon Tawita ni kangai: “Ko bia kakabwaiaaki, natiu ae Tawita. Ane ko na boni karaoi baika kakannato, ao ko na bon totokanikai.”+ Ao e reitaanako kawaina Tawita, ao e oki Tauro nakon ana tabo.+