2 Tamuera

12 Ao Iehova e kanakoa Natan+ nakon Tawita. Ao e roko irouna+ ao e taku: “Iai ngkoa mwaane aika uoman n te kaawa teuana, e kaubwai are temanna ao e maiu ni kainnano are temanna. 2 A rangi ni bati ana tiibu ma ana kao teuare kaubwai,+ 3 ma akea ana bwai teuare maiu ni kainnano bwa tii temanna te tiibutetei ae te aine ae uarereke, ae e kabooa.+ E tabeakinna ao e a ikawairake iroun teuaei ao irouia natin teuaei aika mwaane. E amwamwarake ni kanan teuaei ae uarereke, e momoi man ana mwangko teuaei, ao e mamatu i anganibaina. E a riki bwa kaanga natin teuaei te aine. 4 Imwina riki ao e a roko te iruwa temanna iroun teuare kaubwai, ma e aki anaa temanna mai buakoia oin ana tiibu ma ana kao ni katauraoa iai te amwarake ibukin te tia mwamwananga are roko irouna. Ma e anaa ana tiibutetei teuare maiu ni kainnano ao e katauraoia ibukin teuare roko irouna.”+

5 Ao e rangi n un Tawita iroun te mwaane anne, ao e taku nakon Natan: “Ngkai bon iai Iehova+ ao e riai ni mate teuane karaoa anne! 6 Ao e riai ni kabooa mwin te tiibutetei arei aua te tai okiokina,+ ibukina bwa e karaoa anne ma ni kaotiota te aki nanoanga.”

7 E taku ngkanne Natan nakon Tawita: “Boni ngkoe te mwaane anne! E kangai ana taeka Iehova ae Atuan Iteraera: ‘Boni ngai are I kabiriko bwa te uea i Iteraera,+ ao I kamaiuko mai nanoni bain Tauro.+ 8 I kukurei n anganiko ana bwai nako am toka+ ao buun nako am toka+ ao n anganiko tibun Iteraera ao tibun Iuta.+ Ao ngkana tao e aki tau anne, ao I kukurei ni karaoa ae bati riki ibukim.+ 9 E aera ngkai ko ribaa ana taeka Iehova n arom ni karaoa ae buakaka i matana? Ko kamatea Uria are tibun Eta n te kabaang!+ Ao ko anaa buuna bwa buum+ imwin tiringan teuarei iroum n aia kabaang tibun Ammon.+ 10 Mangaia ae e na bon aki kitania kaaini batam te kabaang,+ ibukina bwa ko ribaai n arom n anaa buun Uria are tibun Eta bwa buum.’ 11 E kangai ana taeka Iehova: ‘Akea bwa N nang karokoa te kabuanibwai i aom boni mairouia kaaini batam,+ ao N na anaiia buum bon i matam ao n angan te mwaane riki temanna,*+ ao e na wene ma buum nako i aan ootan te ngaina.*+ 12 E ngae ngke ko karaoa te baei ni karabako,+ ma N na karaoa aei i mataia tibun Iteraera ni kabane ao i aan ootan te ngaina.’”*

13 E taku ngkanne Tawita nakon Natan: “I boni bure nakon Iehova.”+ E kaeka ni kangai Natan nakon Tawita: “Ma e boni kabwaraa am bure* Iehova.+ Ko na bon aki mate.+ 14 Ma ibukina bwa ko aki karinea Iehova n te aro ae riao n te baei, ao e na boni mate natim te mwaane ane e a tibwa bungiaki.”

15 Ao e a nako Natan nakon ana auti.

Ao Iehova e orea te teei are natin Tawita ma buun Uria, ao e a aoraki. 16 Ao Tawita e bubutiia te Atua ae koaua ibukin te teei are te mwaane arei. E kakorakoraa n aki mamatam Tawita ao e rin ao e kangainaa ni wene i aontano.+ 17 Mangaia are a tei i etana unimwaanen ana auti ao a kataia ni kateirakea mai aontano, ma e rawa ao e aki naba amwarake ma ngaiia. 18 N te kaitiua ni bong ao e a mate te teei, ma a a maaku ana toro Tawita n tuangnga are e a mate te teei. A taku: “Ngke e maiu te teei ao ti taetae nakoina, ao e aki kan ongo iroura. Mangaia ae ti na kangaa ngkanne n tuangnga ae e a mate te teei? E kona ni karaoa te bwai ae rangi ni buakaka.”

19 Ngke e noria Tawita bwa a a wirikiriki ana toro i marenaia, ao e a ataia Tawita bwa e a mate te teei. E taku Tawita nakoia ana toro: “E a mate te teei?” A kaeka ni kangai: “E a mate.” 20 Mangaia are e teirake Tawita mai aontano, ao e tebokia, e kabiria n te bwaa,+ e onea kunnikaina, ao e a nakon ana auti+ Iehova ma ni bobaraaki i aontano. Imwin anne ao e nakon ana auti* ao e tuatua te amwarake bwa e na uotaki nakoina, ao e amwarake. 21 A titirakinna ana toro ni kangai: “E aera ngkai ko a karaoa te aro aei? Ngke e maiu te teei, ao ko aki mamatam ao ko teimatoa n tang, ma ngke e a mate te teei ao ko a teirake naba n amwarake.” 22 E kaeka ni kangai: “Ngke e maiu te teei ao I aki mamatam+ ao I teimatoa n tang, ibukina bwa I kangai i bon irou, ‘Antai ae e na ataia ao tao e na akoai Iehova ao ni kamaiua te teei?’+ 23 Ao ngkai e a mate, e aera bwa I riai n aki mamatam? I kona ni kaokia?+ N na nakoina,+ ma e bon aki kona n okirai.”+

24 Ao Tawita e kabebetea nanoni buuna are Batateba.+ E rin nakon neiei ao e wene ma ngaia. Imwina riki ao e a bungia neiei te nati te mwaane, ao e aranaki bwa Toromon.*+ Ao e tangiria Iehova+ 25 ao e kanakotaeka rinanon Natan+ are te burabeti bwa e na aranna bwa Ieririaa,* ibukin Iehova.

26 E teimatoa Ioaba ni buakana Rabaa+ are aia kaawa tibun Ammon,+ ao e taua aia kaawa bwaanuea.*+ 27 Ao Ioaba e kanakoia taan uataeka nakon Tawita ao e taku: “I a tia ni buakana Rabaa,+ ao I taua te kaawa n ran.* 28 Ngaia ae ikotiia ngkai nikiraia kaain te taanga ni buaka ao katei ami umwanrianna n ekaanako te kaawa ao taua. Bwa I kaawa n taua te kaawa ao N na kamoamoaaki iai.”*

29 Mangaia are e ikotiia kaain te taanga ni buaka ni kabane Tawita ao e nako Rabaa ni buakanna ao e taua. 30 E anaa ngkanne ana baunuea Marekam* mai atuna. Rawawatana bon teuana te tarena* ni koora, n ikotaki ma atibu aika rangi ni kakawaki, ao e katokaaki i aon atun Tawita. E anai naba bwaai ni kuri aika rangi ni bati+ man te kaawa.+ 31 E tauia aomatan te kaawa ao e kammwakuriia bwa a na kabonganai taian tao ibukin te atibu, ao bwaai ni mwakuri aika biiti aika kakang ao tanai aika biiti. Ao e kammwakuriia naba bwa taani karao buriki.* Anne te bwai ae e karaoia nakon aia kaawa ni kabane tibun Ammon. N tokina ao e a oki Tawita ma kaain te taanga ni buaka ni kabane nako Ierutarem.