2 Tamuera
20 Ao iai te mwaane ae te tia karika te kangaanga ae arana Tieba,+ ae natini Bikeri ae tibuni Beniamin. E katanga te buu+ ao e taku: “Akea tibwangara iroun Tawita, ao akea ara bwai iroun natin Iete.+ Ke e nako temanna ma temanna nakon atuana,* ngkami aika tibun Iteraera!”+ 2 Ao a aikoa ira Tawita mwaane aika tibun Iteraera ma a a ira Tieba are natini Bikeri.+ Ma mwaane aika tibun Iuta a nimta aia uea, man te Ioretan nako Ierutarem.+
3 Ngke e roko Tawita n ana auti* i Ierutarem,+ ao e kairiia buuna ni kewe* ake tengaun te uea, ake e katikuia bwa a na tararuaa te auti,+ ao e kaakiia n te auti ae teinaki. E angangania te amwarake, ma e aki roko n te wene n taanga ma ngaiia.+ A teimatoa ni kainaki ni karokoa te bong are a mate iai, kaanga ai aroia aine aika mate buuia e ngae ngke e boni maiu buuia.
4 E a taku ngkai te uea nakon Amataa:+ “Weteiia mwaane aika tibun Iuta ao ikotiia nakoiu i nanon tenibong, ao ko riai naba ngkoe ni mena ikai.” 5 Mangaia are e nako Amataa ni weteiia tibun Iuta n ikotiia, ma e rimwi ngaia n roko n te tai are baireaki ibukina. 6 E taku ngkanne Tawita nakon Abitiai:+ “E na bae ni buakaka riki te bwai ae e na karaoia nakoira Tieba+ are natini Bikeri nakon are e karaoia Abetarom.+ Kairiia ana toro am toka ao kakioa, bwa e aonga n aki reke irouna kaawa aika nonoaki ao n rabanako mairoura.” 7 Mangaia are a iria ana rorobuaka Ioaba,+ taiani Keritaite, taiani Beretaite,+ ao mwaane aika korakora ni kabane. A kitana Ierutarem ni kaea Tieba are natini Bikeri. 8 Ngke a a uakaan ma te atibu ae rangi ni bubura i Kibeon,+ ao e a boo ma ngaiia Amataa.+ Ao Ioaba e bwainna ni kunnikaina ni buaka ao iai ana kabaang ae mena ni kauna ae nim i bebeena. Ngke e keerake ao e a bwaka naba te kabaang.
9 E taku Ioaba nakon Amataa: “Ko uara tariu?” Ao Ioaba e taua buain Amataa ni baina are te atai, kaanga tein ae e na kaboria* ma ngaia. 10 Ma e aki tabe Amataa ma te kabaang are i nanoni bain Ioaba, ao e ewara iai birotona,+ ao a nnanako kanoannanona i aontano. E aki manga kainnanoa ae e na ewaria riki, bwa e a boni mate naba n tii teuana te tai. Imwina ao Ioaba ma tarina are Abitiai a kaea Tieba are natini Bikeri.
11 Ao e tei i rarikina temanna ana rorobuaka n ataei Ioaba ao e taku: “Ke e ira Ioaba ane e mena n ana itera Ioaba ao ane ana aomata Tawita!” 12 N te tai anne ao e a inimaki Amataa i buakon raraana i nukan te kawai. Ngke e noria te mwaane temanna bwa a bane n tei aomata, ao e a kamwainga naba Amataa man te kawai nakon te tawaana. Ao e a taakina te kunnikai i aona, ibukina bwa e noria bwa a bane n tei aomata ngke a roko iroun teuaei. 13 Ngke e tia ni kamwaingnga man te kawai, ao a ira Ioaba mwaane ni kabane bwa a na kaea Tieba+ are natini Bikeri.
14 Ao Tieba e rinanon abaia aia baronga nako tibun Iteraera n nako Abera are i Betamaaka.+ A ikotaki tibuni Bikeri ao a rinnako naba n iria.
15 Ao e roko Ioaba ma ana rorobuaka ao a otabwaninia i Abera are i Betamaaka bwa a na buakana Tieba, ao a katabuka te tano bwa a na ekaanako te kaawa, ngkai e mena te kaawa i nanon te oo. Ao a bane mwaane ake raon Ioaba ni kena aan te oo bwa a na kabwakaa. 16 Ao e takarua te aine temanna ae wanawana man te kaawa ni kangai: “Kam na ongora, ongora! Taiaoka ma tuanga Ioaba ni kangai, ‘Nakomai ikai, ao kariaia bwa N na taetae nakoim.’” 17 Mangaia are e nako teuarei ni kaania neierei, ao e taku te aine arei: “Boni ngkoe Ioaba?” E kaeka teuarei ni kangai: “Boni ngai.” Ngaia are e taku neierei nakoina: “Kakauongo n ana taeka am toro.” E taku teuarei: “I kakauongo.” 18 E reitia neierei ni kangai: “A aki toki ni kakangai ngkoa, ‘Ke a titiraki n te kaawa ae Abera,’ ao e na bon toki aia kangaanga. 19 I tei ibukia aomata aika rau ao ni kakaonimaki i buakoia tibun Iteraera. Ko ukoukora kamaunaan te kaawa ae kaanga ai aron te tina i Iteraera. E aera ngkai ko nang katiaa aron* tibwangan Iehova?”+ 20 E kaeka Ioaba ni kangai: “I bon aki kona n iangoa katiaan arona ao kamaunaana. 21 Bon tiaki naba ngaia anne. Ma iai te mwaane temanna man aonon Eberaim+ ae maungaunga ae mena n ami kaawa, ae arana Tieba+ are natini Bikeri, ae e karitei* n ekaanako te Uea are Tawita. Ngkana kam anga te mwaane ae tii temanna aei, ao N na kitana te kaawa.” Ao e taku te aine arei nakon Ioaba: “Noria! E na karenakoaki atuna nakoim riaon te oo!”
22 E aki tabwara te aine are wanawana arei, ma e a rinnako naba nakoia aomata ni kabane, ao a kabakua roroan Tieba are natini Bikeri ao a karenakoa nakon Ioaba. Ngaia are e katanga te buu teuarei, ao a a bane n uamaenako man te kaawa, temanna ma temanna nakoni mwengana.+ Ao e oki Ioaba nako Ierutarem nakon te uea.
23 Ao e mataniwi Ioaba i aon ana taanga ni buaka Iteraera.+ E mena Benaia+ are natin Ieoiata+ i aoia taiani Keritaite ao taiani Beretaite.+ 24 E mena Atoram+ i aoia te koraki ake e tua te uea bwa a na mwakuri ibukina. Ao Ieotiabata+ are natin Airuta bon te tia korei mwin rongorongo. 25 Ao Tewa bon te tia koroboki. Ao Tatoka+ ma Abiata+ bon taian ibonga.* 26 Ao e riki naba Ira are tibun Iaira bwa te tia kairiri i aoia mataniwi* ibukin Tawita.