2 Rongorongo

11 Ngke e roko Reoboam i Ierutarem, ao e a botiia naba ngkekei tibun Iuta ao Beniamin,+ aika taani buaka aika 180,000 aika a a tia ni kataneiaaki,* bwa a na buakania tibun Iteraera bwa a aonga ni kaoka te tautaeka n uea nakon Reoboam.+ 2 Ao e roko ana taeka Iehova iroun Temaia+ ae ana aomata te Atua ae koaua, ae kangai: 3 “Kangai nakon Reoboam are natin Toromon are uean Iuta ao nakoia ni kabane tibun Iteraera akana i Iuta ao Beniamin, 4 ‘E kangai ana taeka Iehova: “Kam na tai waerake ni buakania tarimi. Okiri ami auti n tatabemaningkami, bwa I boni karika te baei.”’”+ Mangaia are a ongo n ana taeka Iehova ao a a oki ao a aikoa nako ni buakana Ieroboam.

5 E maeka Reoboam i Ierutarem ao e katei kaawan Iuta aika nonoaki. 6 Mangaia are e katea* Betereem,+ Etaam, Tekoa,+ 7 Betatuura, Toko,+ Aruram,+ 8 Kate,+ Maretiaa, Tibi,+ 9 Atoraim, Rakiti,+ Ateka,+ 10 Toraa, Aiiaron,+ ao Eberon,+ aika kaawa aika nonoaki ake a mena i Iuta ao Beniamin. 11 Irarikin anne, e a manga kamatoai riki taabo aika nonoaki ao e katikuia taani kairiri iai, ao e kakarekea nakoia te amwarake, te oera, ao te wain, 12 ao e karekei naba otanga aika bubura ma kainiwai nakoni kaawa aika kakaokoro nako. E a manga kamatoai n te aro ae moan te korakora. Ao e teimatoa n riki Iuta ao Beniamin bwa ana bwai.

13 Ao ibonga* ma tibun Rewi ake a mena i Iteraera ni kabutaa, a otinako man aia aono nako bwa a na boutokaia. 14 A kitan aia tawaana ma aia bwai tibun Rewi+ ao a nako Iuta ao Ierutarem, ibukina bwa a kabaneaki man aia beku n ibonga nakon Iehova, iroun Ieroboam ma natina mwaane.+ 15 Ao Ieroboam e rineiia oin ana ibonga ibukin taabo aika rietata+ ao ibukia taimonio aika ai aron te kooti,*+ ao ibukia kaao ataei ake e a tia ni karaoi.+ 16 Ao te koraki ake mai buakon aia baronga nako tibun Iteraera, ake a motika nanoia bwa a na ukoukora Iehova ae Atuan Iteraera, a iriia naakai nako Ierutarem bwa a na angakarea nakon Iehova ae Atuaia aia bakatibu.+ 17 A kakorakoraa te tautaeka n uea are i Iuta i nanon tenua te ririki, ao a boutokaa Reoboam are natin Toromon, bwa a nakonako ni kawain Tawita ma Toromon i nanon tenua te ririki.

18 Ao Reoboam e anaa Maarata bwa buuna are natin Ierimota are natin Tawita te mwaane. Maarata bon natin naba Nei Abiaira are natin Eriaba+ are natin Iete. 19 Imwina riki ao neiei e a bungia natin teuaei aika mwaane aika Ieuti, Temaria, ao Taam. 20 Imwin neiei ao e a manga mare teuaei ma Maaka are tibun Abetarom.+ Imwina riki ao neiei e a bungia natin teuaei aika Abiia,+ Atai, Titia, ao Teromita. 21 Ao Reoboam e tangira riki Maaka are tibun Abetarom nakoia buuna ni kabane ao buuna nako ni kewe.*+ Bwa e karekeia buuna aika 18 ao buuna ni kewe aika 60, ao a bungiaki natina mwaane aika 28 ao natina aine aika 60. 22 Ao Reoboam e rinea Abiia are natini Maaka bwa te mataniwi ao te tia kairiri i buakoia tarina, bwa e kani kaueaa. 23 Ma e karaoa ana mwakuri ma te ataibwai ao e kanakoia* tabeman mai buakoia natina nakon aonon nako Iuta ao Beniamin, ao nakoni kaawa ni kabane aika nonoaki,+ ao e angania baika bati ma ni karekeia buuia aika bati.