Te Minita
5 Tarataraa nakonakom ngkana ko nakon ana auti te Atua ae koaua.+ E raoiroi riki ae ko kaaniko n ongora+ nakon ae ko anga te karea n aron ae a karaoia akana nanobaba,+ bwa a aki ataia ae e buakaka te bwai ae a karaoia.
2 Tai waekoa n taetae ao tai kariaia naba nanom bwa e na ienikuri n taetae i matan te Atua ae koaua,+ bwa e mena i karawa te Atua ae koaua, ma ko mena ngkoe i aon te aonnaba. Anne bukina ae a riai ni karako iai am taeka.+ 3 Bwa e kaoti te mii man tabeaianga* aika rangi ni bati,+ ao ana bwarantiko te aomata ae nanobaba e nako man taeka aika rangi ni bati.+ 4 N te tai are ko taetae ni bau iai nakon te Atua, ao tai baenikai ni kakoroa bukina,+ bwa bon akea kukureina irouia akana nanobaba.+ Ane ko taetae ni bau iai ao kakoroa bukina.+ 5 E raoiroi riki ae ko aki taetae ni bau nakon ae ko taetae ni bau ao ko aki kakoroa bukina.+ 6 Tai kariaia wim bwa e na karekeko* n te bure,+ ao tai taku i matan te anera* bwa e kairua am taetae ni bau.+ E aera ngkai ko na kauna te Atua ae koaua n te bae ko taekinna, n te aro ae e na kamauna ana mwakuri baim?+ 7 Bwa n aron tabeaianga aika bati bwa a karikii taiani mii,+ ao ai aron naba taeka aika bati bwa a kairiri nakon te bwai ae akea manenana. Ma ko na maaka te Atua ae koaua.+
8 Ngkana ko nora karawawataaia akana maiu ni kainnano, ao uruan te kaetitaeka ae riai ma te raoiroi n am aono, ao tai mimi iai.+ Bwa e tarataraaki te mataniwi ane rietata anne iroun ae e rietata riki nakoina, ao bon iai riki tabemwaang aika rietata riki nakoia.
9 E tibwaaki naba i marenaia ni kabane te raka are reke man te aba, ao a rereke naba man te tawaana baika e kang te uea.+
10 E aki kona n rauaki n te tirewa te aomata ae tangira te tirewa, ao e aki naba kona n rauaki n te mwane te aomata ae tangira te kaubwai.+ Bon akea naba manenan te baei.+
11 Ngkana a rikirake baika raraoi ao a rikirake naba mwaitiia te koraki aika kabanei baikai.+ Ao tera raoiroin aei iroun te tia bwaibwai i rarikin ae tii te tatarai ni matana?+
12 E matu raoi te aomata ae beku, e ngae ngke e kana ae uarereke ke ae bati, ma e aki reke matun te aomata ae kaubwai ibukin ana bwai aika bati.
13 Iai te bwai ae rangi ni kananokawaki* ae I a tia n noria i aan taai: te kaubwai are kaikoaki iroun te tia bwaibwai iai, e na bon rotakibuaka iai. 14 E bua te kaubwai anne ibukin te waaki* ae aki nakoraoi, ao ngkana e a riki bwa te tama ao ai akea te bwai ae e na angan natina bwa tibwangana.+
15 N aron te aomata ae otinako mai biroton tinana n akea karabaana, ao ai arona naba bwa e na nako n arona ngke e roko.+ Ao e aki kona n uotaanako te bwai teuana ibukin ana mwakuri korakora ni kabane.+
16 Bon te bwai ae rangi ni kananokawaki* naba aei: E na nako n aron raoi are e roko iai, ao tera ngkanne kabwaian te aomata ae teimatoa ni mwakuri korakora ibukin te ang?+ 17 E amwamwarake naba ni katoabong kaanga n te rotongitong, ma te marakinnano ae rangi ni bati, ao te aoraki, ao te un.+
18 Aio te bwai ae I a tia n noria ae raoiroi ao e riai: e riai te aomata n amwamwarake ao ni momoi ao ni karekea kimwareireina ibukin ana mwakuri korakora ni kabane+ ake e korakai ni karaoi i aan taai, i nanoni bongini maiuna aika karako aika e anganna te Atua ae koaua, bwa bon anne kaniwangana.*+ 19 Ao ngkana e angan te aomata temanna te kaubwai ma taiani bwaikoraki+ te Atua ae koaua, n ikotaki ma te konaa ni kakukureia ni baikanne, e riai te aomata anne n anaa kaniwangana* ao ni kimwareirei n ana mwakuri korakora. Bon anne ana bwaintangira te Atua.+ 20 Bwa ane e na aki atai* waekoani bwakanakon ana bong ni maiu, ibukina bwa e teimatoa te Atua ae koaua ni katabetabea te aomata anne ni kimwareirein nanona.+