Taani Motikitaeka
2 Ao e waerake ana anera Iehova+ mai Kirekara+ nako Bokim ao e taku: “I kairingkami ni kaotinakoingkami mai Aikubita nakon te aba are I taetae n tuea ibukina nakoia ami bakatibu.+ Irarikin anne ao I taku, ‘N na bon aki urua au berita ma ngkami.+ 2 Ao ngkami kam na tai karaoa te berita ma kaain te aba aei,+ ao kam riai ni kabwakai aia baonikarea.’+ Ma kam aki ongo ni bwanaau.+ Bukin tera ngkai kam karaoa aei? 3 Anne bukina ae I kangai naba, ‘N na bon aki kakioianako mai mwaimi,+ ao a na kamwaneingkami+ ao a na katikingkami nako atuaia.’”+
4 Ngke e taekin taeka aikai ana anera Iehova nakoia tibun Iteraera ni kabane, ao a a tang n takarua aomata. 5 Mangaia are a arana te tabo arei bwa Bokim,* ao a angakarea ikekei nakon Iehova.
6 Ngke e kanakoia aomata Iotua, ao a nakon tibwangaia tibun Iteraera n tatabemania nako n abana te aba.+ 7 A teimatoa aomata n toro iroun Iehova ni kabane ana bong Iotua, ao ni kabane aia bong unimwaane ake a reitinako maiuia imwin Iotua, ake a nori ana mwakuri Iehova aika korakora ni kabane ibukia tibun Iteraera.+ 8 Ao e mate Iotua are natin Nun are ana toro Iehova, ngke ai 110 ana ririki.+ 9 Mangaia are a kaiia n te aono are tibwangana i Timnataereti+ n aonon Eberaim ae maungaunga, i meangin te Maunga ae Kaati.+ 10 A bane te roro anne n ikotaki ma aia bakatibu,* ao e a manga roko te roro teuana imwia ae a aki ataa Iehova ke baike e karaoi ibukia tibun Iteraera.
11 Mangaia are a karaoa ae buakaka tibun Iteraera i matan Iehova ao a toro* irouia taiani Baara.+ 12 Ngaia are a kaaki taekan Iehova ae Atuaia tamaia, are e kairiia ni kaotinakoia man te aba are Aikubita.+ Ao a kakairi irouia atua riki tabeman, ake atuaia botannaomata ake i rarikia ni kabutaa,+ ao a bobaraaki nakoia ma ni kauna Iehova.+ 13 A kaaki taekan Iehova ao a toro irouni Baara ma bouannantin nako Nei Atitoreta.+ 14 Ibukin anne ao e a urarake unin Iehova n ekiianako tibun Iteraera, mangaia are e a anga ngaiia nakoia taani kuribwai ake a kuribwaiia.+ E anga ngaiia* nako nanoni baia aiaia ake i rarikia,+ ao a aikoa kona ni kaaitaraia aiaia.+ 15 E memena bain Iehova i aoia n ekiianako n taabo ake a nako iai, n uota te kabuanibwai nakoia,+ n aron are e taekinna Iehova ao n aron are e taetae n tuea iai Iehova nakoia,+ ao e a korakora rawawataia.+ 16 Mangaia are e a kateirakeia taani motikitaeka Iehova ake a kamaiuia mai nanoni baia taani kuribwaiia.+
17 Ma a rawa naba n ongo irouia taani motikitaeka, ao a kamwaraeia n taromaurii* atua riki tabeman ao ni bobaraaki nakoia. A waekoa n rairakinako man te kawai are a nakonako iai aia bakatibu, ake a ongeaba n ana tua nako Iehova.+ A kabwaka ni karaoa anne. 18 N taai ake e kateirakeia iai taani motikitaeka Iehova ibukia,+ ao e boni memena Iehova iroun te tia motikitaeka, ao e kamaiuia mai nanoni baia aiaia, ni kabane ana bong te tia motikitaeka anne, bwa e korakora nanoangaaia iroun* Iehova+ ibukini ngirangiraia irouia te koraki ake a karawawataia+ ao te koraki ake a bwainikirinia.
19 Ma ngkana e mate te tia motikitaeka, ao a a manga karaoi mwakuri aika bubuaka riki nakoia tamaia, n aroia ni kakairi irouia atua riki tabeman, n toro irouia, ao ni bobaraaki nakoia.+ A aki kitan aia mwakuri ma aroia n imanono. 20 N tokina ao e a urarake unin Iehova n ekiianako tibun Iteraera+ ao e taku: “Ibukina bwa e a tia te natannaomata aei n urua au berita+ are I tua nakoia aia bakatibu, ao a aki ongeaba irou,+ 21 ao ngai N na aki kakionakoa mai mwaia te natannaomata naba teuana, are e katikua Iotua ngke e mate.+ 22 E na riki aei bwa tuoaia tibun Iteraera bwa tao a na kawakina kawain Iehova+ n aroia n nakonako iai, n aroia tamaia ke a na aki.” 23 Mangaia are e kariaia Iehova bwa a na tiku natannaomata aikai. E aki waekoa ni kakioianako, ao e aki anga ngaiia nako nanoni bain Iotua.