2 Rongorongo

17 Ao e a riki natina are Ieotiabata+ bwa te uea n onea mwina, ao e kamatoaa nakoana i aoia tibun Iteraera. 2 E kateiia taanga ni buaka ni kaawan Iuta ni kabane aika nonoaki, ao e katei aia tabo tautia n te aba ae Iuta ao ni kaawan Eberaim, ake e taui Ata are tamana.+ 3 E teimatoa Iehova ni memena iroun Ieotiabata, ibukina bwa e nakonako ni kawai ake e nakonako iai ngkoa ana bakatibu are Tawita,+ ao e aki ukoukori taiani Baara. 4 Bwa e ukoukora Atuan tamana+ ao e kakairi* n ana tua ao tiaki n aia mwakuri kaain Iteraera.+ 5 Ao Iehova e kateimatoa te tautaeka n uea i nanoni bain teuaei,+ ao a teimatoa kaain Iuta ni kabane n anganga taiani bwaintangira nakon Ieotiabata, ao e bati kaubwaina ma karineana.+ 6 E ninikoria ni kakairi ni kawain nako Iehova, ao e kanakoi naba taabo aika rietata+ ma kaai aika tabu*+ mai Iuta.

7 N ana katenua n ririki n tautaeka ao e a kanaanako bwa a na weteaki ana aomata aika tooka aika Benairi, Obaria, Tekaria, Netanera, ao Mikaia, bwa a na angareirei ni kaawa ake i Iuta. 8 Ao iai raoia aika tibun Rewi aika Temaia, Netania, Tebaria, Ataera, Temiramota, Ieonatan, Atoniia, Tobiia, ao Tobatoniia, ao raoia naakai bon Eritiama ao Ioram ake ibonga.*+ 9 Ao a moana aia angareirei i Iuta, ao a uouota bokin ana Tua Iehova,+ ao a nako ni kabutai kaawan Iuta ni kabane n angareirei i buakoia aomata.

10 Ao e roko maakakin Iehova i aoia tautaekan aaba ni kabane ake i rarikin Iuta ni kabutaa, ao a aki buakana Ieotiabata. 11 Ao I-Biritia a uotii bwaintangira ma taiani mwane nakon Ieotiabata bwa aia angabwai. Ao I-Arabia a uotii nakon teuaei tiibu mwaane aika 7,700 ao kooti mwaane aika 7,700 man aia nanai ni man.

12 E rikirake ni korakora ma ni korakora Ieotiabata,+ ao e teimatoa ni katei taabo aika nonoaki+ ma kaawa ni kaikobwai+ i Iuta. 13 E karaoi mwakuri aika bubura ni kaawa ake i Iuta, ao iai ana tautia aika taani buaka aika korakora i Ierutarem. 14 Aio karinanakin araia n aia koraki mairoun tamaia: Mai buakoia kaain Iuta ake mataniwi i aoia kaka teuana tenga, bon Atana are te mataniwi, ao raona 300,000 taani buaka aika korakora.+ 15 Ao Ieoanan are te mataniwi e mena i aan ana kairiri teuaei, ao raona 280,000. 16 Ao e mena naba i aan ana kairiri teuaei Amatia are natin Tikeri, are e anganano ibukin te beku ibukin Iehova, ao raona 200,000 taani buaka aika korakora. 17 Ao mai buakoia kaaini Beniamin+ bon Eriata, ae te tia buaka ae korakora, ao raona 200,000 mwaane aika taubobonga ma te kainikatebe ao te otanga.+ 18 Ao Ieotabata e mena i aan ana kairiri teuaei, ao raona mwaane aika 180,000 aika taubobonga ibukin te taanga ni buaka. 19 A bebeku naakai iroun te uea, irarikia te koraki ake e katikuia te uea ni kaawa ake a nonoaki, ake i Iuta ni kabutaa.+