2 Rongorongo

18 E bati kaubwain Ieotiabata ma karineana,+ ma e baireia bwa a na imaremare ana utu ma kaain ana utu Aaba.+ 2 Mangaia are tabeua te ririki imwina, ao e a kawara Aaba i Tamaria,+ ao e karean tiibu ma kaao aika bati Aaba ibukina ao ibukia aomata ake raona. Ao e kaumakia* bwa e na waerake n ekaanako Ramotakireata.+ 3 E taku ngkanne Aaba are Uean Iteraera nakon Ieotiabata are Uean Iuta: “Ko kan irai nako Ramotakireata?” E kaekaa ni kangai: “Bon titeboo ngai ma ngkoe, titeboo au aomata ma am aomata, ao ti na boutokaiko n te buaka.”

4 Ma e taku Ieotiabata nakon uean Iteraera: “Taiaoka ma titiraki moa ibukin ana taeka Iehova.”+ 5 Mangaia are e ikotiia burabeti uean Iteraera, aika mwaane aika 400 ao e taku nakoia: “Ti riai n nako ni buakana Ramotakireata, ke ti na aki?” A taku nakekei: “Waerake, ao ane e na anga te Atua ae koaua nako nanoni bain te uea.”

6 E taku ngkanne Ieotiabata: “Akea ikai ana burabeti Iehova?+ Ti na titirakina naba te Atua rinanon teuaei.”+ 7 Ao e taku uean Iteraera nakon Ieotiabata: “Ai tii temanna riki te mwaane+ ae ti kona n titirakina Iehova rinanona. Ma I ribaa teuaei bwa e aki kona n taetae ni burabetini baika raraoi ni kaineti ma ngai, ma tii ae buakaka n taai nako.+ Boni Mikaia ae natin Imraa.” Ma e taku Ieotiabata: “E aki riai te uea n taekina anne.”

8 Ao uean Iteraera e wetea te mataniwi temanna ao e taku: “Kairaamai Mikaia are natin Imraa n te tai ae waekoa.”+ 9 Ao e tekateka uean Iteraera ma Ieotiabata are uean Iuta n aia kaintokanuea n tatabemania nako, ao a kunnikainia n aia kunnikai ueea, a tekateka i rarikin te tabo ni kaaki kun ni uita n te kawai n rin ni mataroan oon Tamaria, ao a bane burabeti n tataetae ni burabeti i mataia naakai. 10 Ao Tetekia are natini Kennaana e karaoi ana bwai aika koron te man aika biiti, ao e taku: “E kangai ana taeka Iehova, ‘Ane ko na ewariia* I-Turia ni baikai, ni karokoa ae ko kamaunaia.’” 11 Ao a bane burabeti ake tabemwaang n taetae ni burabeti n aron naba anne, ni kangai: “Waerake nako Ramotakireata ao ane e na nakoraoi am waaki.+ E na anga Iehova nako nanoni bain te uea.”

12 Ao te tia uataeka are nako ni wetea Mikaia e taku nakon teuaei: “Noria! A bane n raoiroi aia taeka burabeti iroun te uea. Taiaoka ma e bia riki naba am taeka bwa ai aron aia taeka,+ ao taekina naba ae raoiroi.”+ 13 Ma e taku Mikaia: “Ngkai bon iai Iehova, ao N na taekina ane e taekinna Atuau.”+ 14 Ao e rin nakon te uea, ao e titirakinna te uea ni kangai: “Mikaia, ti riai n nako ni buakana Ramotakireata, ke ti na aki?” E a kaeka naba ngkekei ni kangai: “Waerake ao ane e na nakoraoi ami waaki. A na kaakiaki i nanoni baimi.” 15 Ao e taku te uea nakon teuaei: “Ai iraua au tai ni kaakiko i aan te taetae n tuea bwa ko na aki taekina te bwai teuana nakoiu, ma tii te koaua n aran Iehova?” 16 Mangaia are e taku teuaei: “I noriia tibun Iteraera ni kabane n uamaenako i aon taiani maunga, kaanga ai aroia tiibu aika akea te tia kawakinia.+ E taku Iehova: ‘Akea aia toka naakai. Ke e oki temanna ma temanna nakon ana auti ma te raoi.’”

17 Ao e taku uean Iteraera nakon Ieotiabata: “Tiaki I a tia n tuangko ni kangai, ‘Ane e na aki taetae ni burabetini baika raraoi ni kaineti ma ngai, ma tii ae buakaka’?”+

18 Ao e taku Mikaia: “Mangaia ae ongora n ana taeka Iehova: I nora Iehova n tekateka i aon ana kaintokanuea,+ ao a bane n tei te taanga ni buaka ake i karawa,+ i angaataina ao i angamaingina.+ 19 E taku ngkanne Iehova, ‘Antai ae e na mwamwanaa Aaba are Uean Iteraera bwa e aonga ni waerake ao ni bwaka i Ramotakireata?’ Ao temanna e taekina te bwai teuana, ao are temanna e taekina riki te bwai teuana. 20 Imwina ao e a keerake te taamnei*+ temanna ao e tei i matan Iehova ao e taku, ‘N na mwamwanaia ngai.’ E titirakinna Iehova ni kangai, ‘Ko na kangaa ni karaoia?’ 21 E kaeka ni kangai, ‘N na nako ao n riki bwa te taamnei ae mwamwanaa te aba i wia ana burabeti ni kabane.’ Mangaia are e taku, ‘Ko na mwamwanaia, ao irarikina ane e na nakoraoi am waaki. Naako ao karaoa anne.’ 22 Ao e a tia ngkai Iehova ni karina te taamnei ae mwamwanaa te aba i wia am burabeti aikai,+ ma e a tia Iehova n taekina te kabuanibwai ibukim.”

23 Ao e keerake Tetekia+ are natini Kennaana ao e karetabaa+ Mikaia+ ao e taku: “Te kawai raa ae e toua taamnein Iehova ngkai e kitanai bwa e na taetae ma ngkoe?”+ 24 E kaeka ni kangai Mikaia: “Noria! Ane ko na noria bwa te kawai raa n te bong are ko rin iai n te ruu ae moan te raba bwa ko na karabako iai.” 25 Ao e taku uean Iteraera: “Anaa Mikaia ao aanga ngaia nakon Amon are mataniwin te kaawa, ao nakon Ioaati are natin te uea. 26 Tuangia ni kangai: ‘E kangai ana taeka te uea: “Karina te aomata aei n te karabuuti,+ ao kaamwarakea ni bwaunana ae uarereke ae te kariki ma te ran, ni karokoa ae I oki ma te raoi.”’” 27 Ma e taku Mikaia: “Ngkana ko oki ma te raoi, ao e aki taetae Iehova ma ngai.”+ Ao e reitia ni kangai: “Kam na ataa aei ngkami aomata ni kabane.”

28 Mangaia are a a waerake nako Ramotakireata+ uean Iteraera ao Ieotiabata are uean Iuta. 29 E a taku ngkai uean Iteraera nakon Ieotiabata: “N na bita teiu ao N na nako buakon te boo ni buaka, ma ko riai ngkoe ni karina am kunnikai n uea.” Mangaia are e bita teina uean Iteraera ao a a rin i buakon te boo ni buaka. 30 Ao e a tia uean Turia n tua nakoia mataniwin ana kaa ni buaka, ni kangai: “Tai buakana temanna ae mangori ke ae kakannato, ma tii uean Iteraera.” 31 Ao ngke a nora naba ngkekei Ieotiabata mataniwini kaa ni buaka akekei, ao a taku i bon irouia: “Ao aei uean Iteraera.” Mangaia are a rairaki ni buakanna, ao e a tang Ieotiabata ni kani buokaki,+ ao e buokia Iehova, ao e a kairiianako naba ngkekei te Atua mairoun teuaei. 32 Ngke a noria mataniwini kaa ni buaka bwa tiaki uean Iteraera, ao a aki tabwara ma a a rairaki naba mani kaeana.

33 Ma e kakatebe n aki akaka* te mwaane temanna, ao e a teke naba irouna uean Iteraera i marenan ana kunnikai ni buaka. Ngaia are e taku te uea nakon te tia kabuta ana kaa ni buaka: “Rairaki ao kaotinakoai man te boo ni buaka,* bwa I a ikoaki kakaiaki.”+ 34 E a rikirake ni korakora te buaka n te bong anne, ao e a riai uean Iteraera ni kateaki n totokoaki i nanon te kaa ni buaka, ni kaaitaraia I-Turia ni karokoa ae bong, ao e mate ngke e a bung taai.+