2 Rongorongo

16 N ana ka-36 n ririki n tautaeka Ata, ao e a waerake Baata+ are Uean Iteraera n ekiianako kaain Iuta, ao e a katea* Rama,+ bwa e na tukiia aomata bwa a na aki otinako ke n rin nakon* te Uea are Ata are uean Iuta.+ 2 Ao e a kaotinakoi taian tirewa ma koora Ata mani nneni baika kakawaki ake n ana auti Iehova+ ao ake n ana auti* te uea, ao e kanakoi nakon te Uea are Benataata are uean Turia,+ are e maeka i Tamateko, ao e kangai: 3 “Iai te boraraoi* i marenau ma ngkoe, ao i marenan tamau ma tamam. I a kanakoi ngkai nakoim taian tirewa ma koora. Nakomai ao urua am boraraoi* ma Baata are Uean Iteraera, bwa e aonga ni kitanai.”

4 E ongo Benataata iroun te Uea are Ata, ao e kanakoia mataniwi n ana taanga ni buaka bwa a na ekinako kaawan Iteraera ao a kabwakaa Ion,+ Tan,+ Aberamaim, ao taabo ni kaikobwai ni kabane ake ni kaawan nako Nabetari.+ 5 Ngke e ongo taekan anne Baata ao e aki tabwara ma e a katoka naba katean* Rama, ao e katoka mwakuriana. 6 Ao e kairiia kaain Iuta ni kabane te Uea are Ata, ao a uotiinako atibun Rama+ ma kaina, ake e kateitei iai Baata,+ ao e kabonganai ni katea* iai Keeba+ ao Mitiba.+

7 N te tai anne ao e a roko Aanani+ are te tia matairiki iroun te Uea are Ata are uean Iuta ao e taku nakoina: “Ibukina bwa ko onimakina* uean Turia ao ko aki onimakina* Iehova ae Atuam, ao e a birinako mai nanoni baim ana taanga ni buaka uean Turia.+ 8 Tiaki bon te taanga ni buaka ae rangi ni korakora I-Itiobia ma I-Ribua, ae mwaiti aia kaa ni buaka ma aia tia toka i aoia aoti? Ma ibukina ngke ko onimakina Iehova ao e anga ngaiia nako nanoni baim.+ 9 Bwa a biribiri matan Iehova n te aonnaba ni kabutaa,+ bwa e na kaota korakorana* ibukia te koraki ake a tabwanin raoi nanoia* nakoina.+ Ko a tia ni karaoa te aro n nanobaba n te baei, ao ni moa mangkai ao ane a na roroko buaka n ekikonako.”+

10 Ma e un Ata iroun te tia matairiki ao e kaaki teuaei n te karabuuti,* ibukina bwa e korakora unna irouna n te baei. N te tai naba anne ao Ata e a moana bwainikirinaia tabemwaang i buakoia aomata. 11 Ao rongorongon Ata mai moana ni karokoa tokina, a koreaki n aia Boki Uean Iuta ma Uean Iteraera.+

12 N ana ka-39 n ririki n tautaeka Ata ao e a aoraki waena ni karokoa ae e a korakora aorakina. Ma ngke e aoraki ao e bon aki naba rairaki nakon Iehova, ma e rairaki nakoia taani katoki aoraki. 13 Ao e a wene ni motirawa Ata i rarikia ana bakatibu.+ E mate n ana ka-41 n ririki n tautaeka. 14 Mangaia are a kaiia ni nneni kawenean te mate ae rangi ni kakannato, are e ekeia i bon ibukina n Ana Kaawa Tawita.+ Ao a kawenea i aon te kai n tabetabe are uotaki iai te mate, ae onrake n oeran te batiam ma aeka n rengarenga aika kakaokoro ake a renganaki bwa te kabira ae boiarara.+ Irarikin anne, a kauraa te ai ae rangi ni korakora ni kaota iai karineana.*