1 Rongorongo

23 Ngke e a kara Tawita ao e a kaan toki maiuna,* ao e a kaueaa natina are Toromon i Iteraera.+ 2 E ikotiia ngkanne aia toka ni kabane tibun Iteraera, ibonga,*+ ao tibun Rewi.+ 3 A warekaki tibun Rewi ake 30 aia ririki ni waerake, ao mwaitin+ te mwaane temanna ma temanna bon 38,000. 4 A beku 24,000 mai buakoia naakai bwa taan tararuaa te mwakuri n ana auti Iehova, ao iai 6,000 mataniwi ma taani moti,+ 5 ao iai 4,000 taan teiakina mataroan te oo,+ ao 4,000 taan neboa+ Iehova ni bwaai ni katangitang, ake e taekin ni kangai Tawita, “I karaoi baikai ibukin te nebonebo.”

6 Ao e baireiia* Tawita nakoni koraki aika kakaokoro+ ni kaineti ma natin Rewi ake Kerition, Koata, ao Merari.+ 7 Man ana utu Kerition bon Ratana ao Timei. 8 Bon teniman natin Ratana bwa Ieiera ae te mataniwi, Tetam, ao Ioera.+ 9 Bon teniman natin Timei bwa Teromota, Aitiera, ao Aran. Naakai boni mataniwi i aoia aia koraki mairoun tamaia ake a nako mairoun Ratana. 10 Ao natin Timei bon Iaata, Tiena, Ieuti, ao Beria. Naaka aman aikai bon natin Timei aika mwaane. 11 Bon te mataniwi Iaata ao te kauoman Titiaa. Ma kioina ngke a karako mwaane ake natiia Ieuti ao Beria, a a warekaki naba bwa teuana te utu mairoun tamaia ao teuana naba tabeia.

12 Bon aman natini Koata bwa Amram, Itia,+ Eberon, ao Utiera.+ 13 Natin Amram bon Aaron+ ao Mote.+ Ma e teimatoa ni kaokoroaki+ Aaron bwa e na katabua te Ruu ae Moan te Tabu ngaia ma natina mwaane, a na anga taiani karea i matan Iehova, a na beku ibukina, ao n taekini kakabwaia n taai nako n arana.+ 14 Ni kaineti ngkanne ma Mote are ana aomata te Atua ae koaua, a warekaki natina aika mwaane i buakon te baronga are tibun Rewi. 15 Natini Mote boni Keritiom+ ao Erietera.+ 16 Bon te mataniwi Tebuera+ mai buakoia tibuni Keritiom. 17 Bon te mataniwi Reabia+ mai buakoia kanoan* Erietera. Bon akea riki natin Erietera aika mwaane, ma e rangi ni bati natin Reabia aika mwaane. 18 Bon te mataniwi Teromita+ mai buakoia tibun Itia.+ 19 Natin Eberon bon Ieria ae te mataniwi, Amaria te kauoman, Iaatiara te kateniman, ao Iekameam+ te kaaman. 20 Natin Utiera+ boni Mika ae te mataniwi, ao Itiaa ae te kauoman.

21 Natini Merari boni Maari ao Muti.+ Natini Maari bon Ereata ao Kiti. 22 E mate Ereata ma akea natina mwaane, ma tii aine. Mangaia are aia koraki* naakai ake natini Kiti ake mwaane, a anaiia naakai bwa buuia. 23 Bon teniman natini Muti bwa Maari, Etera, ao Ieremota.

24 Aikai bon natin Rewi mwaane n aia utu mairoun tamaia, aika mataniwi n aia utu, ake a koreaki araia ao ake a warekaki ao ni karinanaki araia, ao ake a kakaraoa te mwakuri ibukin te beku n ana auti Iehova, man 20 te ririki ni waerake. 25 Bwa e a tia ni kangai Tawita: “E a tia Iehova ae Atuan Iteraera n anga te motirawa nakoia ana aomata,+ ao e na maeka i Ierutarem n aki toki.+ 26 A nang aki manga uouota te umwanrianna ae tabu* tibun Rewi ke bwaai ni mwakuri ake iai ibukin te beku iai.”+ 27 Bwa ni kaineti ma ana kabanea ni kaetieti Tawita, ao a warekaki tibun Rewi ake man 20 te ririki ni waerake. 28 Tabeia boni buokaia natin Aaron+ ibukin te beku n ana auti Iehova, a na mataniwi i aon taiani katawanang,+ taabo n amwarake, kaitiakani bwaai nako aika tabu, ao ai mwakuri nako ake a kainnanoaki ibukin te beku n ana auti te Atua ae koaua. 29 A ibuobuoki naba n te bwerena*+ are kauaataoaki, te burawa ae mte ibukin te karea ae te amwarake, bwerena aika mmani aika karaoaki man te bwerena ae aki karikaki,+ bwerena ake man te baan, te bua ni burawa ae renganaki,+ ao ai aeka ni bwai n tau rawawata ni kabane ao bwaai ni baire. 30 A riai n tei ni katoa ingabong+ bwa a na katituaraoa Iehova ao ni karaoiroia, ao ai arona naba n te tairiki.+ 31 A ibuobuoki n taai ake a kareanaki iai taiani karea ni kabuekaki nakon Iehova ni boongi n Taabati,+ bongin nako otin namwakaina,+ ao n tain taian toa,+ ni kaineti ma te mwaiti are kainnanoaki n tuua ake a kaineti ma baikai, ao a katoatai ni karaoa anne i matan Iehova. 32 A kakaraoi naba tabeia ni kaineti ma te umwa ni botaki, ni kaineti ma te tabo ae tabu, ao nakoia tariia ake natin Aaron, ibukin te beku n ana auti Iehova.