2 Rongorongo

12 Ngke e tia naba ngkekei ni kamatoaaki raoi te nakoa n uea are iroun Reoboam+ ao e a korakora teuaei, ao e a kitana naba ana Tua Iehova,+ ao raona naba tibun Iteraera ni kabane. 2 N ana kanimaua n ririki n tautaeka te Uea are Reoboam, ao e a waerake te Uea are Titiaka+ are uean Aikubita n ekaanako Ierutarem, bwa a aikoa kakaonimaki nakon Iehova. 3 Iai 1,200 ana kaa ni buaka teuaei, 60,000 taan toka i aoia aoti, ao taanga ni buaka aika aki kona ni warekaki ake raona mai Aikubita, aika I-Ribua, taian Tukiim, ao I-Itiobia.+ 4 E taui kaawan i Iuta aika nonoaki ao n tokina e a roko i Ierutarem.

5 Ao e roko Temaia+ are te burabeti iroun Reoboam ma tokan Iuta ake a ikotaki i Ierutarem ibukini maakakin Titiaka, ao e taku nakoia: “E kangai ana taeka Iehova, ‘Kam a tia ni kitanai, ai ngaia ae I kitaningkami+ naba i nanoni bain Titiaka.’” 6 Mangaia are a kananorinanoia tokan Iteraera ma te uea+ ao a taku: “E raoiroi Iehova.” 7 Ngke e noria Iehova bwa a kananorinanoia naakai, ao e roko ana taeka Iehova iroun Temaia ae kangai: “A kananorinanoia i bon irouia. N na aki kamaunaia,+ ao N na kamaiuia imwin teutana te tai. N na aki kabwaroa uniu i aon Ierutarem rinanon Titiaka. 8 Ma a na riki bwa ana toro teuanne bwa a aonga n ataa te kaokoro i marenan te toro irou ma te toro irouia uean* aaba ake tabeua.”

9 Mangaia are e waerake n ekaanako Ierutarem te Uea are Titiaka are uean Aikubita. Ao e anai baika kakawaki ake n ana auti Iehova+ ma baika kakawaki ake n ana auti* te uea. E anai bwaai ni kabane n ikotaki ma otanga aika koora ake e karaoi Toromon.+ 10 Mangaia are e karaoi otanga aika taiani buraati te Uea are Reoboam bwa oneani mwia, ao e mwiokoiia mataniwia taan tantani* ni baikai, ake a tantania mataroan ana auti te uea. 11 Ngkana e roko te uea n ana auti Iehova, ao a na rin taan tantani ma n uouotii baikai, ao a na manga kaoki nakon te ruu n tantani. 12 E rairakinako unin Iehova mairoun te uea ibukina bwa e kananorinanoa,+ ao e a aki kamaunaia raoi.+ Irarikin anne, bon iai naba baika raraoi tabeua aika reke i Iuta.+

13 E kamatoaa nakoana te Uea are Reoboam i Ierutarem ao e teimatoa n tautaeka. Bon 41 ana ririki Reoboam ngke e riki bwa te uea, ao e tautaeka i nanon 17 te ririki i Ierutarem, are te kaawa are e rineia Iehova mai buakon aia baronga nako tibun Iteraera bwa te tabo ae e na kaaki iai arana. Aran tinan te uea bon Naama ae tibun Ammon.+ 14 Ma e karaoa ae buakaka, bwa e aki kamatoaa i nanona bwa e na ukera Iehova.+

15 Ni kaineti ngkanne ma rongorongon Reoboam mai moana ni karokoa tokina, tiaki a koreaki i buakon ana taeka Temaia+ are te burabeti ao Ito+ are te tia nori miitara, n te kateiriki are e koreaki mwina? Ao e teimatoa te buaka i marenan Reoboam ma Ieroboam.+ 16 Ao e a wene ni motirawa Reoboam i rarikia ana bakatibu, ao e kaiiaki n Ana Kaawa Tawita,+ ao e a riki natina ae Abiia+ bwa te uea n onea mwina.