Iobi
23 E kaeka Iobi ni kangai:
2 “N te bong aei naba ao N na ngurengure ni kaota imanonou.*+
E a kerikaaki korakorau ibukin ikenrawau.
3 I bia ataa te tabo ae e na reke iai te Atua!+
Ao N na nakon ana tabo ni maeka.+
4 Ao N na kaota au tangitang i matana,
Ao ni kaona wiu n au kaotioti.
5 N na karekea otau n arona ni kaekaai,
Ao ni mutiakina te baere e taekinna nakoiu.
6 E na kaitaraai ni kabongana mwaakana ae korakora?
E aki, ma e na bon ongora irou.+
7 E kona te aomata ae raoiroi ni kaetii bwaai ma ngaia ikanne,
Ao N nang atongaki ngkanne bwa I aki reke n te bure iroun au tia Motikitaeka.
8 Ma ngkana I nako mainiku, ao akea ngaia ikekei,
Ao I oki, ao e aki reke naba irou.
9 Ngkana e mwakuri man te angamaing, ao I aki kona n taraia,
Ao e a manga rairaki nakon te angaatai, ma I bon aki naba noria.
10 Ma e ataa te kawai ae I a tia n toua.+
Imwini kataakiu irouna, ao N nang otinako bwa kaanga te koora ni koaua.+
11 A toua raoi mwini mwanekana waeu,
I teimatoa n toua kawaina ao I aki tibanako.+
12 I aki kitan ana tua riana.
I a tia ni kaikoi ana taeka+ n ae riaon riki ae kantaningaaki mairou.*
13 Ngkana e motika ana iango, ao antai ae kona n tukia?+
Ngkana e kani karaoa te bwai teuana, ao e boni karaoia.+
14 Bwa e na kakororaoa raoi te baere e a tia ni motikaki* ibukiu,
Ao a bati irouna bwaai n aron akanne aika e kaikoi.
15 Anne bukina ae I tabeaianga iai irouna,
Ngkana I iangoia ao I rikirake iai ni maaku.
16 E kanimamatea nanou te Atua,
Ao e kakamaakai Teuare Moan te Mwaaka.
17 Ma e rabunaki ubuu n te rotongitong ae korakora,
Ma N na bon aki naba kainabwabu.