Taani Motikitaeka

7 Ao e utimwaaka Ierubaara ae taekani Kiteon,+ ma aomata ni kabane ake raona, ao a katei aia umwanrianna i rarikin te Koburake n Ran ae Aarota, ao e mena aia kaembwa tibuni Mirian i meangin teuaei, n te tabuki ae More, n te tabo ae aoraoi.* 2 E taku ngkanne Iehova nakoni Kiteon: “A rangi ni mwaiti aomata akana raom n te aro are ngkana I anga tibuni Mirian nako nanoni baia,+ ao tao ane a na kamoamoaia tibun Iteraera ao ni kangai nakoiu, ‘E boni kamaiuira oini baira.’+ 3 Taiaoka ma katanoataa ngkai ae kangai i mataia aomata: ‘Ane e maaku ma n rurubenebene, ao ke e okira mwengana.’”+ Mangaia are e a tuoia Kiteon. Ao ibukin anne, a a okiri mwengaia aomata aika 22,000 mwaitiia, ao a tiku 10,000.

4 E a manga taku Iehova nakoni Kiteon: “A bon rangi ni bati naba aomata. Kanakoia nakon te karaanga bwa I aonga n tuoia ibukim ikekei. Ngkana I kangai nakoim, ‘E na iriko teuaei,’ ao e na iriko, ma ngkana I kangai nakoim, ‘E na aki iriko teuaei,’ ao e na aki iri.” 5 Mangaia are e a kairiia aomata nakon te karaanga.

E taku ngkanne Iehova nakoni Kiteon: “Kaokoroia te koraki nako akana newenewea te ran ni moi iai n aron te kamea ngkana e moi, mairouia te koraki ake a katorobubua ni moi.” 6 Mwaitiia te koraki ake a newenewe ni moi ake a kaaki baia i wia, bon 300. Ake nikiraia a katorobubua ni moi.

7 E taku ngkanne Iehova nakoni Kiteon: “N na kamaiuingkami irouia mwaane akana 300 akana newenewea te ran, ao N na anga tibuni Mirian nako nanoni baim.+ Ma ke a oki rikaaki nakoni mwengaia aomata akana tabemwaang.” 8 Mangaia are imwin are a anai taian tianaki ao taiani buu mairouia aomata, ao e bane ni kaokiia mwaane ake tabemwaang ake tibun Iteraera nakoni mwengaia, ao e tauia mwaane ake tii 300. E mena aia kaembwa tibuni Mirian i aan teuaei n te tabo ae aoraoi.+

9 N te tairiki anne ao e taku Iehova nakon teuaei: “Teirake ao buakana te kaembwa, bwa I a tia n anga nako nanoni baim.+ 10 Ma ngkana ko maaku ni buaka, ao ruuo rikaaki nakon te kaembwa ma Buraa are am tabonibai. 11 Ongora n te bwai ae a taekinna, ao imwina ane ko na ninikoria* ni buakana te kaembwa.” Ao e ruo rikaaki ma Buraa are ana tabonibai nako tabon aia kaembwa kaain te taanga ni buaka.

12 Ao a kabutaa te tabo ae aoraoi tibuni Mirian ma tibun Amareka ao kaaini Mainiku ni kabane,+ n aron te nna n rokati aika mwamwae, ao e aki kona ni warekaki aia kamero,+ bwa a rangi ni mwaiti n aron tanon aon te bike. 13 E a roko ngkai Kiteon ao iai te mwaane temanna ae karakina miina nakon raona, ao e taku: “Aio miiu. Iai te kariki ae mronron ae karaoaki man te baare, ae rabinobino nakon aia kaembwa tibuni Mirian. Ao e roko n te umwanrianna teuana ao e oreia n te aro ae korakora ao e a bwaka.+ Eng, e bon raira te umwanrianna ni katararakea, ao e a bwaka te umwanrianna ni borababaua.” 14 Ao e taku raona arei: “E tii kona te baenne n nanona ana kabaang Kiteon+ are natin Ioaati, ae te mwaane ae tibun Iteraera. E a tia te Atua n anga tibuni Mirian, ma kaembwa ni kabane nako nanoni bain teuanne.”+

15 Ao ngke e ongo naba ngkekei Kiteon bwa e karakina miina teuarei ma kabwaraan nanona,+ ao e bobaraaki n taromauri. Imwin anne ao e okira aia kaembwa tibun Iteraera ao e taku: “Teirake, bwa e a tia Iehova n anga aia kaembwa tibuni Mirian nako nanoni baimi.” 16 Ao e bwenauaia mwaane ake 300 nakon tenikoraki, ao e bane n angania taiani buu+ ma kaatibu aika bubura aika akea kanoaia ma taian oi aika mena i nanoni kaatibu aikai. 17 Ao e taku nakoia: “Tarataraai ao karaoa raoi te bwai ae I karaoia. Ngkana I a roko i tabon te kaembwa, ao kam riai ni karaoa te bwai ae I karaoia. 18 Ngkana I katanga te buu, ngai ma raou ni kabane, ao kam na bane naba ni katang taiani buu ni kabutaa te kaembwa, ao n tatakarua ni kangai, ‘Ibukin Iehova ao ibukini Kiteon!’”

19 Ao a roko i tabon te kaembwa Kiteon ma mwaane aika 100 ake raona, ni moani waakinan te tai n tei n tantani* are n te nukanibong, imwin ae a a tibwa tia ni kaaibibitiia taan tantani. Ao a katang taiani buu+ ma n ibei taiani kaatibu n ran ake a bubura ake i nanoni baia.+ 20 Mangaia are a katangi buu naake tenikoraki ao a ibei kaatibu aika bubura. A taui taian oi ni baia are te maing ao a katangi buu ni baia are te atai ao a tatakarua ni kangai: “Ana kabaang Iehova ao ana kabaang Kiteon!” 21 N te tai anne ao a tei rorobuaka n tatabemania nako ni katobibia te kaembwa, ao a bane ni birinako kaain te taanga ni buaka, ma n tatakarua ngke a birinako.+ 22 A teimatoa ni katangi buu te koraki ake 300, ao Iehova e rairi aia kabaang nakekei n tatabemania nako n ekiianako naake tabemwaang ni kabutaa te kaembwa,+ ao a birinako kaain te taanga ni buaka ni karokoa Betatita, ao nako Terera, ni karokoa tabon te kaawa ae Aberameorata+ i rarikin Tabatia.

23 Ao a weteaki mwaane aika tibun Iteraera mai buakoia tibun Nabetari, tibun Atera, ao tibuni Manate+ ni kabane, ao a nako ni kakioia tibuni Mirian. 24 E kanakoia taan uataeka Kiteon nakon aonon Eberaim ni kabutaa ae maungaunga, ao a kangai: “Ruuo ni buakania tibuni Mirian ao taui kaoran te Ioretan imwaia ma kawain ranna nako ni karokoa Betabara.” Mangaia are a ikotaki rorobuakan abaia tibun Eberaim ni kabane ao a taui kaoran te Ioretan ma kawain ranna nako ni karokoa Betabara. 25 A tauia naba aia toka tibuni Mirian ake uoman ake Ooreba ao Teebi. A tiringa Ooreba n te bwaa ae Ooreba,+ ao a tiringa Teebi n te nne ni kamanti kureebe ae Teebi. A teimatoa ni kaeiia tibuni Mirian,+ ao a uotii atuia Ooreba ma Teebi nakoni Kiteon n aonon te Ioretan.