Te Minita
12 Mangaia ae ururinga te tia Karikiko ae Moan te Kakannato n am bongi n roro n rikirake,+ imwain rokoni boongi n rawawata*+ ma rokon ririki ake ko na kangai iai: “Bon akea kukureiu ni baikai,” 2 imwain ae e a rikirake n roo taai ma te oota, ao namwakaina ma itoi,+ ao imwain ae a kabwakaa te karau ae korakora taian nang, 3 n te bong are a a ruru* iai taan tantania* te auti, ao a a bwaokooko mwaane aika korakora, ao a a katoka aia kamantinti aine* ibukina bwa e a karako mwaitiia, ao aine ake a taraa tinaniku man te kamaama, a a noria bwa e a roo,+ 4 ngke a a kainaki mataroa nakon te kawai, ngke e a karaurau karongoaan te atibu ni kamantinti, ngke e a teirake te aomata n tangitangin te mannikiba, ao naati aine ni kabane a anene n te bwanaa ae maraara.+ 5 E mamaaka naba te rietata temanna, ao a raraoma n te kabuanibwai n te kawai. Ao e a uee te kai ae te amon,+ ao e kokokia te taake ni mwananga, ao e a tia ni maeinikun te uaanikai ae kauekea te kan amwarake, ibukina bwa e a mwananga te aomata nakon ana auti ae e na maan ni mena iai,+ ao a ririaki taan tanginiwenei i nanon te kawai,+ 6 imwain ae e kanakoaki te kabae ae te tirewa, ao e kamanatuaaki te boora ae te koora, ao e uruakaki te kaatibu are n te koburake n ran, ao e kamanatuaaki te wira n roaroa ibukin te mwanibwa. 7 E okira ngkanne te tano bubun te tano+ n arona mai mwaina, ao te korakora ae te maiu* e okira te Atua ae koaua are bon anga.+
8 E taku te tia ikotiia aomata,+ “Bon te bwai ae te kabanea n akea manenana!* Akea manenani bwaai nako!”+
9 E aki tii reke wanawanan te tia ikotiia aomata, ma e teimatoa naba n reireinia aomata te baere e ataia,+ ao e iaiango raoi ma ni kakaraoa ana kakaae raoi, bwa e aonga n ikotii* taeka n rabakau aika bati.+ 10 E ukeuke ni kakaaei taeka aika tamaroa+ te tia ikotiia aomata, ao e korei mwin taeka aika koaua aika eti raoi.
11 Ana taeka te aomata ae wanawana kaanga ai aroni kaai ibukini kairaia kaao,+ ao aia taeka aika karikorikoi kaanga ai aron neera aika oreaki ni karinaki. Bon taeka aika e anga te tia kawakintiibu temanna. 12 Irarikini ngkanne baikai, natiu, ko riai n ataa aei: Bon akea tokini karaoani booki aika bati, ao kabanean te tai iai boni kakuaan te iriko.+
13 Mani bwaai nako aika a a tia n taekinaki ao aio raoi motikana: Maaka te Atua ae koaua+ ao kawakin ana tua,+ bwa bon aei te bwai ae moan te kakawaki iroun te aomata.+ 14 Bwa e na motiki taekani mwakuri nako te Atua ae koaua, n ikotaki ma bwaai nako aika raba, bwa tao e raoiroi ke e buakaka.+