Itaia
12 N te bong anne ao ko na boni kangai:
2 Noria! Bon te tia kamaiuai te Atua.+
N na onimakinna ao N na aki maaku.+
3 Kam na itia te ran ma te kimwareirei
Man taiani koburake n ran ni kamaiu.+
4 Ao n te bong anne ane kam na kangai:
“Katituaraoa Iehova, taboa arana,
Kaotii ana mwakuri i buakoia botannaomata!+
Tataekina ae e a karietataaki arana.+
5 Anene n neboa* Iehova+ bwa e karaoi baika moanibaan te tamaroa.+
Ke e kaotaki aei n te aonnaba ni kabutaa.
6 Takarua ao takakaa ni kimwareirei ngkoe ae kaain* Tion,
Bwa e kakannato i buakom Teuare Tabu iroun Iteraera.”