Taani Motikitaeka

3 Aikai natannaomata ake e kariaia Iehova bwa a na tiku, bwa a aonga ni kona ni kataiia tibun Iteraera ni kabane ake a aki rinanon taiani buaka ake i Kanaan+ 2 (e riki aei bwa a aonga n rinanon te buaka aia roro tibun Iteraera ake imwina, ake a aki rinanoni baikanne mai mwaina): 3 aia uea I-Biritia ake niman,+ ao tibuni Kanaan ni kabane, I-Titon,+ ao taian Iwaite+ ake a maeka n te Maunga ae Rebanon,+ ni moa man te Maunga ae Baaraeremon ni karokoa Reboamata.*+ 4 A riki bwa bwain tuoaia tibun Iteraera, bwa a aonga n noraki tibun Iteraera bwa tao a na ongeaba n ana tua Iehova ake e angania tamaia rinanoni Mote, ke a na aki.+ 5 Mangaia are a maeka tibun Iteraera i buakoia tibuni Kanaan,+ tibun Eta, taian Amoraite, taiani Beritaite, taian Iwaite, ao I-Iebuti. 6 Ao tibun Iteraera a anaiia natiia natannaomata aikai aika aine bwa buuia, ao a anga natiia aine nakoia natiia natannaomata aikai aika mwaane, ao a toro irouia atuaia.+

7 Mangaia are a karaoa ae buakaka tibun Iteraera i matan Iehova, ao a mwaninga taekan Iehova ae Atuaia, ao a a toro irouia taiani Baara+ ao kaai aika tabu.*+ 8 Ibukin anne ao e a urarake unin Iehova n ekiianako tibun Iteraera, ao e anga ngaiia* nako nanoni baini Kutianaritiataim are ueani Metobotamia.* A toro tibun Iteraera irouni Kutianaritiataim i nanoni wanua te ririki. 9 Ngke a wetea Iehova tibun Iteraera ibukini buokaia,+ ao Iehova e kateirakea te tia kamaiuia tibun Iteraera bwa e na kainaomataia,+ ae Oteniera+ are natini Kenati are tarini Kareba ae uarereke riki. 10 E roko taamnein Iehova i aon teuaei,+ ao e a riki bwa te tia motiki taekaia tibun Iteraera. Ngke e otinako ni buaka ao Iehova e anga Kutianaritiataim are uean Metobotamia* nako nanoni baina, mangaia are e tokanikai i aoni Kutianaritiataim. 11 Imwin anne ao e a motirawa* te aba arei i nanon 40 te ririki. Ao e a mate Oteniera are natini Kenati.

12 Ao a a manga karaoa naba ae buakaka tibun Iteraera i matan Iehova.+ Ao Iehova e a kariaia Ekeron are ueani Moaba+ bwa e na tokanikai i aoia tibun Iteraera, ibukina bwa a karaoa ae buakaka i matan Iehova. 13 Irarikin anne, e kairiia tibun Ammon+ ma tibun Amareka+ bwa a na ekiianako. A buakania tibun Iteraera ao n taua te kaawa are a mena iai aroka aika baam.+ 14 A toro tibun Iteraera iroun Ekeron are ueani Moaba i nanon 18 te ririki.+ 15 Ao a wetea Iehova tibun Iteraera ibukini buokaia,+ mangaia are Iehova e kateirakea te tia kamaiuia+ ae Euta+ are natini Keera are tibuni Beniamin,+ ae e maing.+ Imwina riki ao a kanakoi angabwai tibun Iteraera nakon Ekeron are ueani Moaba rinanon teuaei. 16 N te tai anne ao e karaoa ana kabaang ae uaitera wina Euta, ae teuana te mwanokunibai* abwakina, ao e kabaea i aan ana kunnikai i aoni boton rangana are te atai. 17 Ao e anga te angabwai nakon Ekeron are ueani Moaba. Bon te mwaane ae rangi ni marikarika Ekeron.

18 Ngke e a tia Euta n anga te angabwai, ao e a kanakoia aomata ake a uouota te angabwai. 19 Ma ngke e roko n aia tabo bouannanti aika kaaraki* i Kirekara,+ ao e a manga oki rikaaki ao e taku: “Iai irou te rongorongo ae raba ibukim te uea.” Mangaia are e taku te uea: “Kainabwabu!” Ngaia are a a bane ni kitanna ana toro. 20 Mangaia are e kawaria Euta, ngke e tekateka n tii ngaia n ana ruu ni kamaangang i aon te taubuki. E taku ngkanne Euta: “Iai irou te rongorongo ibukim mairoun te Atua.” Mangaia are e a teirake naba man ana kaintokanuea.* 21 Ao e buuta te kabaang Euta ni baina are te maing mani boton rangana are te atai, ao e karibua i birotona. 22 E rinnako naba bwain tauana n rimwini win te kabaang, ao e in te kiriiti i aoni win te kabaang, bwa e aki buuta te kabaang mai nanoni birotona, ao e tiinako nakotaarina. 23 E otinako Euta rinanon te kaman,* ao e kaini mataroan te ruu are i aon te taubuki ngke e nako, ao e rokani. 24 Ngke e a nako ao a oki tooro ao a noria bwa a roka mataroan te ruu are i aon te taubuki. Mangaia are a taku: “Tao e nako tinaniku* i nanon te ruu ni kamaangang.” 25 A teimatoa n tataninga ni karokoa ae a a maamaa, ma ngke a noria bwa e tuai mani kauki mataroan te ruu are i aon te taubuki, ao a anaa te kiing ao a kauki, ao a a nora aia toka ni bwaka i aontano ni mate!

26 E birinako Euta ngke a tabe n tataninga, ao e rirarikin aia tabo bouannanti aika kaaraki*+ ao e roko i Tieaira n akea ana kangaanga. 27 Ngke e roko ao e katanga te buu+ n aonon Eberaim ae maungaunga,+ ao a ruo tibun Iteraera man te aono ae maungaunga, ao ngaia e rimoaia. 28 Ao e taku nakoia: “Rimwiai, bwa e a tia Iehova n anga aiami ake tibuni Moaba nako nanoni baimi.” Mangaia are a rimwina ao a taui kaoran te Ioretan n tukiia tibuni Moaba, ao a aki kariaia temanna bwa e na roko n iterana are teuana. 29 N te tai anne ao a kamateia tibuni Moaba aika tao 10,000,+ aika mwaane aika korakora ma n ninikoria ni kabane, ao akea temanna ae reke birinakona.+ 30 Mangaia are a a taenikai tibuni Moaba i aani baia tibun Iteraera, ao e a motirawa* te aba arei i nanon 80 te ririki.+

31 Imwin Euta bon Tiamka+ are natin Anata are e kamateia I-Biritia aika mwaane aika 600+ n te oko ae kakang tabona.*+ E kamaiuia naba tibun Iteraera teuaei.