2 Rongorongo

1 E rikirake korakoran Toromon are natin Tawita ni waakina nakoana n uea, ao e memena irouna Iehova ae Atuana ao e kabatiaa kakannatona.+

2 E kanaanako Toromon bwa a na weteaki tibun Iteraera ni kabane, mataniwi i aoia kaka teuana tenga, ao i aoia kaka tebubua, taani moti, ao aia mataniwi ni kabane tibun Iteraera ni kabane, ake mataniwi i aoia aia koraki mairoun tamaia. 3 Ao e a nako Toromon ma te botaki n aomata arei nakon te tabo ae rietata i Kibeon,+ bwa anne te tabo ae mena iai ana umwa ni botaki te Atua ae koaua, are te umwanrianna are e karaoia n te rereua Mote are ana toro Iehova. 4 Ma e a tia Tawita n uota ana Ati te Atua ae koaua ni waerake mai Kiriataearim+ nakon te tabo are e katauraoia Tawita bwa nnena. E a tia ni katea te umwanrianna bwa nnena i Ierutarem.+ 5 Ao e katukaki te baonikarea are te buraati,+ are e karaoia Betarera+ are natin Uri are natin Uura, i matan ana umwanrianna ae tabu* Iehova. Ao a tataro i matana* Toromon ma te botaki n aomata arei. 6 Ao e a kareani ngkai karea Toromon i matan Iehova, ao e kareani karea ni kabuekaki aika 1,000 i aon te baonikarea are te buraati+ are n te umwa ni botaki.

7 N te tairiki anne ao e a kaoti te Atua nakon Toromon ao e taku nakoina: “Butiiai te bwai ae ko tangiria bwa N na anganiko.”+ 8 Ao e taku Toromon nakon te Atua: “Ko a tia ni kaotiota te tangira ae koaua* ae korakora nakon tamau are Tawita+ ao ko kaueaai n onea mwina.+ 9 Iehova ae te Atua, e bia kateimatoaaki am berita nakon Tawita are tamau,+ bwa ko a tia ni kaueaai i aon te natannaomata ae rangi ni bati n ai aron tanon te aonnaba.+ 10 Anganai ngkai te wanawana ao te atatai+ ni kairiia aomata aikai,* bwa antai ae kona ni motiki taekaia am aomata aika rangi ni bati aikai?”+

11 Ao e taku te Atua nakon Toromon: “Kioina ngkai aei te bwai ae e tangiria nanom, ao ko aki bubutii te bwaikoraki ma te kaubwai, te karineaki ke mateia akana riribaiko, ao ko aki naba bubutii te maiu ae abwabwaki,* ma ko bubutii te wanawana ma te atatai ni momotiki taekaia au aomata aika I kaueako i aoia,+ 12 ao ko na anganaki te wanawana ma te atatai, ma N na anganiko naba te bwaikoraki ma te kaubwai ao te karineaki, ae tuai man rereke irouia ueea ake imwaim, ao e na aki naba reke irouia akana imwim.”+

13 Mangaia are e a oki Toromon nako Ierutarem man te tabo ae rietata i Kibeon,+ mai matan te umwa ni botaki, ao e tautaeka i aoia tibun Iteraera. 14 E teimatoa Toromon ni karekei kaa ni buaka ma aoti,* ao iai ana kaa ni buaka aika 1,400 ao ana aoti* aika 12,000.+ Ao e kateiia ni kaawa ake nnen taiani kaa ni buaka+ ao n uakaan ma te uea i Ierutarem.+ 15 Ao e kabatiaa te tirewa ma te koora te uea i Ierutarem n ai aron te atibu,+ ao e kabatiaa te kai ae te tiira n ai aron aroka aika tukomorea n te Tiebira.*+ 16 A kaoaki ana aoti Toromon mai Aikubita,+ ao ana koraki n iokinibwai te uea a karekea te nanai n aoti* ni boona ae aki bibitaki.+ 17 Boon teuana te kaa ni buaka are kaoaki mai Aikubita bon 600 te mwakoro n tirewa, ao 150 boon temanna te aoti. Ao a a manga iokinibwai baikai nakoia aia uea ni kabane tibun Eta ma uean Turia.